Read Ntcham Siracide 31 Bible Online

Siracide 31 - Ntcham bible

Siracide 31

¹Ugaaja gìŋ́ŋi Tigaajati nín kaa yàntī ugaaja gèeǹee puee, see ú dúntí, ní ilandɔkɔ yàntī ŋgeem gíti kpá-u.

²Ilandɔkɔ in yàntī waa gèeǹee sá kii kuweeŋkpiiuee ní. I yàntī unil kaa ŋūǹ kí ŋùŋfì ní ki jì ŋgeem.

³Ugaaja gì ki kōontí tigaajati ki kpūkuntí, u yaa kāl̀ kí ŋùŋfèe, án sá yii u bíi jīǹ mmɔn ní.

⁴Uwɔfi tūǹ ditundi kaa kpáàa kāntí gba kí jī, u yaa gbēeǹee, u kɔ́ falaakpaan poon dee.

⁵Unil un néeń sindaariya tikpilee kaa lóotí ikpiti diŋál. Un jòó ki pá animbil boonee, see animbil ń kīil̀-u.

⁶Sindaariya yāntì binib tikpil nāaǹ, ní asaluu gbáń-bi tikpil[175].

⁷Di sá yii sindaariya sá kii kutaliŋŋuee ní ki tīī binib bin nimbiliŋ máǹ u-puee. Bin kɔkɔ kaa cáá nlandɔkɔee jéetì ku-poon.

⁸Ugaaja un pu baa kāntí tiba kí lì ní u-nimbiliŋ kaa máǹ sindaariya puee bí mmɔnneeee!

⁹An niliu gbanti bí la tí pàkà-u? Di sá yii u bíi ŋáań tin nyáń ti-bee u-nibul kansikin.

¹⁰Ŋma di kɔ́ icɔŋki gbantin? Udaan cáá nsan kí nīn dàkà u-ba. Ŋma ní diyimɔɔl pú-u ú ŋá ikpiti ní waa ŋá? Ŋma ní nsan dōoǹ ú yìntī ní waa yīntì?

¹¹An nibee gaajawanti làá báań inyaan, ní samaa làá nīn máafí tiŋan tin bi ŋée. A yaa bíi jīǹ tijinee...

¹²Bi yaa yíiń-si kucaŋu ní a kāl̀ kí jī tijinee, á taa nín̄ kā ki wāā kinyɔkɔ ki lì yii: «Tijimmɔntiil di wīikí yéèee!»

¹³Téetí yii nnimbifɔkɔn kaa sá tiwammɔntiil. Tiba kaa sá kuwaŋkpiiu ki bàn̄ dinimbil. An pu ní díǹ pée sūǹ kaa gbèentí.

¹⁴Taa tàntī a-ŋal kí lēē dinaŋkúndi din ubɔ bíi kpèéyee. Yaa sá fám ni-liitil ŋalii làá kpōofì tɔb disambilin.

¹⁵Sisi a-ba ń dáań kí béé tin ní a-juti lèe, ní kí dàkafì kí ŋá tin kamaa a làá ŋée[176].

¹⁶Jī tijin kii unil un ní bi dàkā didàkamɔntiilee, taa nín̄ ŋmàfī kí yàntī binib naŋki ń nyā nì si.

¹⁷Nín̄ sá unipeekaa kí fíntí a-ŋalii kí dàkà yii a sá unil un di fōō didàkamɔntiilee. Taa nín kā ki jīǹ tikɔkɔ kí kɔ́ǹ bin kíǹee icoo.

¹⁸Sii nì binib tikpil yaa kā ki jīǹee, taa péé kí lēē tijin kí kíń bin kíǹee.

¹⁹Unil un ní bi dàkā didàkamɔntiilee, tijin fiii ní u jīǹ kí díkí. Mimmee u yaa dōoǹ kí gèeǹee, u fòotī tiŋan ní.

²⁰Un jīǹ ki ŋmàntīǹ u-poolee gèeǹ mmɔntiim ní. U fìntī malaa ní ki tɔ́ u-ba. Unil un sàfī tijinee kaa gèeǹ tiŋan, ní ki wùliŋkī ní u-poon mútikí.

²¹Bi yaa páb́-si ní a jíń ki lákatì a-ba puee, á nyā kí wùliŋkì, án làá ŋá-si fòooo.

²²Pīlifiǹ-mi, m-jipɔɔn, taa kpèè m-bɔti fám. Fool boonee, a làá dāá gbìl̄ m-nyɔɔbuŋŋi taapu. Tin kamaa ní a ŋáańee, á taa pée lákatí mara pu. Mimmee a kpá kí būŋkì.

²³Unil yaa ŋá diinakpaan ki fōō binibee, báà ŋma sòoǹ ki pàkà-u ní. An di dàkà yii udaan lafun sá ulaŋŋaŋfiti.

²⁴Ama unil yaa ŋá diina ki fōō binib ní ki ŋmāntì tijin ki tīī-bee, báà ŋma làá nīn sòoǹ u-pu kitiŋin ní. An di dàkà yii u lafun sá ukummunti. Ndaam bɔti

²⁵Baa nyù ndaam kí dàkà tininjati, di sá yii mì yāntì binib tikpil bíil̀.

²⁶Ŋŋmi yàntī bí béé tikúti pɔŋŋu nín sá puee. Míǹ mbaantiim ní ndaam yàntī bí béé bilambidambi bin bíi jáàyee nín sá anicil ŋiŋyee.

²⁷Binib ceeyee, ndaam sá kii dimaŋfalee ní ŋyunti ŋun bi yaa nyùn̄-mì ki ŋmāntèe. Ndaam yaa kpá, binib ŋūǹ kí nīn báaa? Di sá yii Unimbɔti náań-mì unil ń nīn nyù ki fàal̀ ní.

²⁸Unil yaa nyùn̄ ndaam ki ŋmāntì nì ŋyunti ŋun an máaǹee, mì tìì-u dipɔɔsɔŋkil nì dipɔɔpindi ní.

²⁹Ama unil yaa nyùn̄ ndaam ki lákatì u-ba puee, mì tìì-u ntuntun, ki nyàatī-u ní ki yàntī u còom̄ ki kpìntī.

³⁰Ugbaan yaa gbí ndaamee, an lùkutī u-ŋuul ní ki kɔ̄ntí-u agìńni. U-pɔŋŋu bàtī ní an yàntī bí gbá-u aŋaŋkul[177].

³¹Bi yaa yíiń-ni diina ní ndaam bí binib nyùee, á taa wòoǹ a-juti ŋyunti ŋun an nyāatì-uee. Taa sòoǹ-u tibɔti tin làá wà-uee, kí taa bàlifì-u dipɔndi din u cáá-see.