Read Ntcham Siracide 32 Bible Online

Siracide 32 - Ntcham bible

Siracide 32

¹Nín̄ nyí nì a-ba diinab poon Bi yaa lēē-si á nīn sá ukpil diina ubɔ poonee, taa nín̄ dàkà a-ba. Nín̄ bí bin bi yíińee cee, kí nīn ŋáań kii bi nín ŋáań puee. Kpèè bíǹ laŋki ní boonee á cùú kàl̄[178].

²A yaa túń tin sá á tɔ̄ee ki dóòyee, ní á gítí kí cùú kàl̄ a-paaŋŋu. Án nīn mɔ̄ǹ-si bi nín jíń bi-pɔbil sɔ̄ŋkèe pu, ní kí fōō kibeefuulii kin sá dibɔ́ntil dimɔntiil paatee.

³A yaa sá un cíkitèe, sòoǹ, di sá yii sii di máaǹ kí sòoǹ. Ama á sòoǹ tin ní a nyée baba pu, kí taa fōō agbiil paaŋŋu.

⁴Binib yaa bíi pílifí agbiil nì ilanee, á taa nín̄ bí ki sòoǹ an kaa kúntí. An kaa sá ŋyunti gbanti ní a làá dàkà a-ciiŋyi.

⁵Bi yaa bíi jīǹ diina ní agbiil bée, an bí kii ditaŋkpanyaandi din di bí sindaariya bɔmbiki puee ní.

⁶Bi yaa bíi nyù ndamɔntiim ní ki pílifí ilammɔntee, an sá kii ditaŋkpanyaandi din bi yíì eemeeroodi an fúuń sindaariya fukuŋkaatinee ní.

⁷A yaa sá kiwaayee, á sòoǹ an yaa bālifì yii á sòoǹee. Ama á pée sòoǹ mili ja ŋyunti ŋun ní bi yaa bālifì-si tibɔtee[179].

⁸Sòoǹ a-bɔti tí nīn bí kúlkul, sòoǹ anyɔɔbun fiii ní tibɔti tikpil ń nīn bí poon. Dàkà yii a sá unil un di gbìl̄ tibɔti, ama ní kaa là kí sòoǹ-tèe.

⁹Laakin ní binikpaambi yaa bée, taa nín̄ dàkà a-ba kii si nì bi ŋmèe. Laakin binicikitikaabi yaa bée, á taa nín̄ sòoǹ tikpil.

¹⁰Kii utaa nín ŋmóò pu kí nín téeńee, míǹ ní binib ŋáań un kaa dàkà u-bee tiŋan.

¹¹Kukuluu yaa gbáńee, yīkì kí taa gbíntí boon, sāǹ kí nīn kùǹ, kí taa nín̄ tú ki yìiǹ.

¹²A-dumpuee, a ŋūǹ kí gbīil̀, kí ŋá a nín là puee, ama á taa nín̄ sòoǹ ki gà a-bindi ní kaa nín ŋá ikpiti.

¹³Tíǹ kɔkɔ puee, á jāam̀ un di náań-see, un di gbēentí-si u-ŋantee[180]. Á fàŋkì Unimbɔti

¹⁴Unil un fàŋkí ti-Dindaanee fòol̄ u-saŋkii ní, bin bin nyàab̀-u doooo kutaafaauee kāntí u-ŋanti ní.

¹⁵Un di bífí u-Marauee, udaan làá ká tin u nyàab̀ee. Ama un di ŋáań kii u nóó Mara ní kaa nóóyee, Mara gbanti di làá lúkú-u.

¹⁶Bin di fàŋkí ti-Dindaanee béetí tin u lèe ní. Bi-tunnyaaŋŋi jìl̀ kii ŋwalifee ní.

¹⁷Ukpitiŋal kaa kíikí bí wòoǹ-u. Úǹ pée kāntí inaakpal kí ŋá u nín là puee ní[181].

¹⁸Ulandɔkɔdaan kaa súntí kí dàkafì, ama unikpiti nì ulambidaan bíǹ kaa fàŋkí tiba.

¹⁹Taa pée ŋá tiba kaa dākafì ki wāatì, mimmee aa làá yāliŋkì tin a làá ŋée pu.

²⁰Taa còom̀ nsan ŋun pu aganlaka bée, án nín làá ŋá pu á taa gbéetí ataŋkpeeyee.

²¹Taa nín̄ máká nsan ŋun tèen̄ee pu.

²²Nín̄ nyí nì a-ba nì sisi a-ba biyaamu gba.

²³Nín̄ nyí nì a-ba nì tin kamaa a ŋáańee poon. An mun ní bi yíì yii a nóó ti-Dindaan marab.

²⁴Un di máká Unimbɔti Marau puee nóó u-bɔkpaaŋi ní. Un kamaa yaa dū u-mákal ki tɔ́ ti-Dindaan puee, tikpitil tiba pée kpá kí bàń-u[182].