Read Ntcham Siracide 33 Bible Online

Siracide 33 - Ntcham bible

Siracide 33

¹Nnaabu ŋubɔ kpá ki làá bàń unil un fàŋkí ti-Dindaanee, báà u yaa kɔ́ icɔŋkin, u làá nyā[183].

²Uciŋfiti kaa ŋūǹ kí nīn ná ti-Dindaan Marau, ama un ŋáań kii u nóó Mara gbanti kaa nóóyee bí kii meela un dēē tiŋku un pu kubuŋkpaaŋŋu jītée ní.

³Unil un cáá dinyilee máká Unimbɔti nyɔɔbundi pu. U tìì u-Marau kudapɔɔu kii usaraaŋal nyɔɔbundee ní. Ugbaan nì un bèel̄ binibee bɔti

⁴A yaa là bí pīlifiǹ-see, bɔ́ntí tin a là kí sòoǹee. Kpāfì tin kɔkɔ a nyée kí nīn kíí.

⁵Ugbaan bimbim nì u nín dàkafì puee kpántí ŋyunti kamaa ní. An màntī kii ditɔrɔkutaalee ní.

⁶Ubɔɔti un di bèel̄ binibee sá kii utaamu un di sūǹ ŋyunti ŋun kamaa utanjakal yaa jɔ́m̀ ki kāl̀ u-puee ní. Tiwan nín kaa ŋmà puee

⁷Dibindi poonee, ŋwìiń di ŋmíntí iwiin kɔkɔ. Kin an ŋá mana ní iwiin iba sá ikpaan ki jítiǹ in kíǹ?

⁸An sá ti-Dindaan di ŋá-i í taa nín̄ ŋmà, ní ki lēē iyunti iba í nīn sá jiŋaal wiiŋyi.

⁹U lēē iba ki yāntì i sá ikpaan ki ŋá-i circir, ní ki yāntì in kíǹee íǹ sá iwiŋfantanti[184].

¹⁰Inifunaan kɔkɔ nyánní ntamin ní, titan ní Unimbɔti dūu máń Adam[185].

¹¹Ama ní ti-Dindaan nì u-ciiŋkpaaŋyi poonee, u lēē báà ŋma ń nyā u-ba. U yāntì báà ŋma nóó isan in nyáń i-bee.

¹²U bīiǹ bi-kansikin biba pu ki yōoǹ-bi yilpu, ki gāntì bi-ba ki síiǹ u-ba bí nīn nákáǹ-u. Biba muee, u tɔ́-bi mbusu ki sīntiǹ-bi taapu ki jìn̄-bi mpaan ŋun pu bi nìn bée[186].

¹³Kuyɔkɔu kā uyɔɔmaati ŋaan ní ú dū-ku kí mā kun u lèe. Míǹ mbaantiim ní binib mun kā bi-náanliu ŋaan ní úǹ di lèekī tin u lèe kí tīī un sá kamaa[187].

¹⁴Tikpitil nimbiinee, tiŋan di bí, ní ŋkúm nimbiinee, dimaŋfal mun bí. Míǹ mbaantiim ní bin yú nì ti-Dindaan deedeeyee caŋinee, bikpitiŋaliibi mun bí.

¹⁵A yaa kpēē Yilpu Fɔ́ŋŋŋ Nimbɔtiu tuuŋŋee, a làá ká yii tì nóó tili tili ní, ní ki jáà nì tɔb.

¹⁶Mamee, man di lúŋkì boon kí tɔ̄ ditundi, kii bi yaa kītì fiinyi subiliŋ ki dóò un pá boon ki lúlifée.

¹⁷Ama ti-Dindaan bīiǹ m-boon m jìn̄ ki cúú bin līntiǹ-mee. Ma mun ŋúń ki ká asubil ki gbéeǹ m-kabiku kii bisubikitiliibi bin kíǹee.

¹⁸Béémaan yii an kaa sá man baba pu ní m bíi gì, ama an sá ki tīī bin kɔkɔ nyàab̀ dinyilee ní. Á tɔ̄ a-ba kí taa nín̄ bí ubɔ pu

¹⁹Pīlifìmaan-mi, dinibul yidambi. Nimbi samaa kpilib, kpòom̄maan ditafal kí pīlifì.

²⁰A-maŋfal wiiŋyi poonee, á taa yàntī a-jipɔɔn àá a-nimpuu àá a-nabiki àá a-bɔɔ ń jī a-pu dinyandi. Taa dū a-gaajawanti kí tīī unil ubɔ fám. Án làá dāá wà-si ní á fàtīí bàlifì ti-pu.

²¹A yaa bí dimaŋfalin ki fòotēe, taa yàntī ubɔ ń nīn cáá a-pu mpɔn.

²²An sɔ́ a-biyaamu ń nīn mèé-si tiwan ki jítiǹ sii ń nīn mèé múǹ.

²³Tin kamaa a ŋáańee poonee, nín̄ cáá ti-pu mpɔn kí taa yàntī ubɔ ń kpèè kí sìŋkīǹ-si.

²⁴A-winjoolkaai poon, ŋyunti ŋun a làá kpúee poon ní á dū tin a làá tīī difakalee kí yàkatī. Unil nín máaǹ kí ŋúb́ uyumbu puee

²⁵Kun sá ki tīī kimaŋee di sá timool nì ndɔ nì atún, ama kun sá ki tīī uyumbuee di sá tijin nì ditafadaaldi nì ditundi.

²⁶A yaa yāntì a-yumbuu tūǹ ditundee, a làá ká diŋuŋfil. A yaa yāntì u kā ki kpàl̄ iŋalee, u làá dāá nyàab̀ kí sāǹ ní.

²⁷Idɔkpalikaa nì ŋŋmii ní bi dùú kpàl̄ unaa ú tìntī u-yil, ama tigbati nì diwɔ́bil di yàntī utɔntɔŋkpiti ń pɔ̀fin̄.

²⁸Tīī-u ditundi ú tɔ̄, ú taa nín̄ kā ki jòon̄ iŋal fám.

²⁹Di sá yii unil yaa kā fámee ní u bífí atuŋkpiti diŋál.

³⁰Yàntī ú tɔ̄ ditundi di sá yii kun pu u bée dee. U yaa kaa pílifiǹ-see á bā-u abaa. Ama á taa nín ŋá ntoom kí lákatí mara pu, kí taa ŋá tiba mun an kaa nóó deedee saŋŋu[188].

³¹A yaa cáá utɔntɔnli ubɔbɔee, dū-u kí ŋá kii u sá sisi a-bee. Di sá yii a dá-u kudapɔɔu ní. A yaa cáá utɔntɔnli ubɔbɔee, dū-u kí kpántí a-nabiki. Di sá yii u cáá kudapɔɔu a-cee kii sisi a-bee ní.

³²A yaa bíi sàantí-uee, u làá dāá sāǹ kí kátí ní.

³³Kin u yaa sáǹ, a làá ŋá mana ní kí nyàab̀-u[189].