Read Ntcham Siracide 34 Bible Online

Siracide 34 - Ntcham bible

Siracide 34

¹Tidamintiil Dimákakulindi kíiĺ bigbaambi. Tidamintiil yàntī bin kaa cáá ilandɔkɔee túkù ifeen.

²Á dū tidamintiil kí tɔ̄ ditundee, an bí kii unil di là kí cúú mboon, àá kí sāǹ kí páań kubuŋu boonee ní.

³Kudamintiiu poonee, tibɔŋman naŋku ní bi kāntí. Míǹ mbaantiim ní digitil poonee, bi kāntí nnimbiin naŋku ní.

⁴Bi ŋūǹ kí lēē tin wāĺ kílkilee tijɔkɔndinaaa, ibaamɔn ní bi ŋūǹ kí ká inyimɔnni[190]?

⁵Dibɔɔbɔl nì ibɔɔnyeen nì tidamintiilee, tíǹ kɔkɔ sá kii kubuŋuee ní. Unimpu un kā imatiŋween puee di dàkafī tíǹ kɔkɔ pu[191].

⁶Taa dūú yíiń tiba, see Yilpu Fɔ́ŋŋŋ Nimbɔtiu baba di yaa lēē-tì ki dàkā-si.

⁷Di sá yii tidamintiil kíil̀ binib tikpil, ní bin nìn máká ti-puee kaa ká tiba poon.

⁸Ti-Dindaan marau ŋān̄ ní ki dátiǹ tinyimɔmbɔti gbanti, ní Iciin di nyēē deedeedambi nyɔmmun. Unil ń cù nsanee, án kèetī ní

⁹Un cá isan tikpilee bífí tiwan tikpil mun ní. Un ká tiwan tikpil ki nyée sòoǹ nì dinyil ní.

¹⁰Un kaa jíń falaayee kaa cáá dinyil tikpil.

¹¹Ama un cōom̀ isan tikpilee nyí bi nín ŋáań tiwan tikpil mun puee ní.

¹²M-saŋyi poonee, m ká tiwan tikpil, ní tin taapu m gbìl̄ee jítiǹ tin m ŋūǹ kí sòoǹee.

¹³Iyunti tikpilee, m ká dinimbinaamandi ki bàà làá kpú, ama m nín cōom̀ cōom̀ isan ki kántì tiŋyee di fīī-mi. Á fàŋkì ti-Dindaan

¹⁴Binib bin fàŋkí ti-Dindaanee làá ká mmaŋfafɔkɔn.

¹⁵Di sá yii bi máká un di ŋūǹ kí fīī-bee pu ní.

¹⁶Un di fàŋkí ti-Dindaanee kaa fàŋkí tiba. Tifaandi kaa cútí-u, di sá yii u máká u-pu ní[192].

¹⁷Un di fàŋkí ti-Dindaanee bí mmɔnneeee!

¹⁸Ŋma pu ní u dìntī ní? Ŋma di sá u-tikinliu ní?

¹⁹Yilpu fɔ́ŋŋŋ Nimbɔtiu nimbil cɔ́ bin di néeń-uee pu ní. U sá-bi digbampɔɔl nì ŋkpandɔ ŋun di pɔ̄ɔ̄yee. Kubuŋu kun tùm̀ kpaŋkpamee yaa bāańee, ti-Dindaan di sá bi-kɔŋkooŋŋu, ní ki sá-bi mboon ki lìkintí-bi kuwiŋkaŋu tuntuŋku pu, ki fìil̄-bi ki nyāntí aganlaka poon, ki wúǹ bi-pu bí taa lítí.

²⁰U tìì unil kunyannyaau, ki yàntī u-nimbiin ń bútí, ki tìì-u ŋgbampɔn nì dimaŋfal nì dibiindi. Dinimbɔtinoobaamɔndi

²¹A yaa fìkī kuwaŋkuluu ki dūu ŋá ti-Dindaan saraayee, a bíi bèel̄-u dee.

²²Ti-Dindaan kaa fòol̄ binib bin kaa nóó u-marauee wampɔkaati.

²³Yilpu fɔ́ŋŋŋ Nimbɔtiu kaa fòol̄ binikpitib saraabi. An kaa sá tiwaŋkuti tin bi làá kpɔ̀ kí ŋá saaraabee wíiŋŋu pu ní u pūǹ ikpiti.

²⁴Unil ń dū uwɔfi wanti kí ŋá saraayee, an bí kii bi nín làntī kibiki ki-baa nimbiin puee ní.

²⁵An pɔ̄ɔ̄ biwɔfib ń ká kí jī kí nīn bí dimaŋfalin. Un ŋmìntī-bi tijinee sá unikpɔl ní.

²⁶A yaa yōoǹ tin a-juti cáá kí jī kí nīn bí dimaŋfalinee, a kūū-u dee.

²⁷A yaa kaa pàn̄ upaadaan u-tundi paatee, a ŋá nnikpaakoon dee[193].

²⁸Di sá yii ubɔ māā ní un kíǹ gbáà ki wìil̄. Mimmee ba ní bi-liitil páatì? Dituŋfandi dee.

²⁹Ubɔ gbāā ki mèé, un kíǹ tòó mbusuee, bi-kansikin ŋma ní ti-Dindaan làá pīlifì?

³⁰Unil yaa gbēē dinikpil ki kɔ́ tijɔkɔndin ní ki fùl̄ ki ŋá u-ba circir ní ki fātìi gbēē dinikpilee, mimmee u ŋá u-ba circir fám dee yaa[194]!

³¹Míǹ ní an sá ki tīī unil un di bóob́ kinyɔkɔ kí ká u-kpitii pɔ̄tam, ní ki fātìi gítì ki bíi ŋáań ikpiti gbanti ibaantee. Ŋma gíti làá pīlifì an niliuee wimmeem? Mimmee u bóob́ kinyɔkɔ fám dee[195].