Read Ntcham Siracide 35 Bible Online

Siracide 35 - Ntcham bible

Siracide 35

¹Mara nì saraabi bɔti Á nīn nóó ti-Dindaan marauee sá kii unil nín ŋáań saraabi kupaau puee ní[196].

²Á dū a-ba kí yā kí nákáǹ Unimbɔti marabee sá kii unil nín ŋáań mpèé saraau puee ní.

³Á ŋá unil tiŋan sá kii unil nín dù ŋyimmɔntiim kí ŋá saraa puee ní.

⁴Á pɔ̄ uwɔfi tiwanee sá kii unil nín ŋáań inyɔŋki saraau puee ní[197].

⁵Tin fáatì ti-Dindaanee di sá unil ń fàtī u-boon kí tīī ikpiti. Á yíí kí taa ŋá ikpitee sá kii unil nín ŋáań ikpiti pɔ̄tam saraa puee ní.

⁶Ama á taa cù ti-Dindaan nimbiin iŋaŋkulim[198].

⁷Di sá yii u tīī-ti mara tí ŋá saraabi gbanti kɔkɔ.

⁸Deedeedaan saraau sá saraamɔnti ní nsaraafan pu. U-sɔnsɔfiŋu jɔ́ḿ ní kí tin bà Yilpu Fɔ́ŋŋŋ Nimbɔtiu nimbiin.

⁹Unimbɔti fòol̄ deedeedaan saraau ní, ní u kpá kí súntí dijandi din u lēē ki wùn̄ ŋŋmi nsaraafan puee.

¹⁰A yaa làá nyɔ̄ŋkì ti-Dindaanee á nyɔ̄ŋkì-u nì tiniti poon. A yaa làá ŋá a-jincɔfikaati saraauee, á taa jōō kí bàtī tin sá á cáańee pu.

¹¹A yaa bíi ŋáań saraa kamaayee, á bútí a-nimbiin. Yòon̄ a-saalaatiiti kí cáań nì dipɔɔpindi[199].

¹²Tīī Yilpu Fɔ́ŋŋŋ Nimbɔtiu kii u nín tīī-si puee, dàkà tiniti kí nóó nì a-ŋmam.

¹³Di sá yii ti-Dindaan làá pà-si kí téeǹ, u làá téeǹ-si miluli pu ní.

¹⁴Taa màkan̄ yii a làá dū a-wampɔkaati kí ŋéeb́ ti-Dindaan nyɔkɔ, waa làá fōō a-wanti gbanti.

¹⁵Taa dū tiwan tin a fìkēe kí ŋá saraa kí nīn kā ki cɔ́tí. Di sá yii ti-Dindaan sá ubɔsoonli ní kaa gàntī ubɔ[200].

¹⁶Waa pɔ̀ uwɔfi gandi, ama u pílifí un bi wɔ́b̀ee wimmeem ní.

¹⁷Waa fàtī u-boon kí tīī ditaŋkpiibil gbaamii, àá ukpiipu un di sūǹ ki yáliŋkée.

¹⁸U wāĺ nnyinnyim nín bàtifī ukpiipu taŋkpunti pu miŋyee ní.

¹⁹U yaa sūǹ ki kɔ́kɔĺ un di yāntì u sūǹee, ti-Dindaan kaa làá gbìl̄aaa?

²⁰Un di tūǹ ti-Dindaan tundi nì dipɔbil dibee, ti-Dindaan làá fōō-u, ní u-wimmeem ń jɔ̄m̀ kí bà doooo yilpu.

²¹Tiŋman bin sìntīǹ bi-ba taapuee wimmeem jɔ́ḿ ki bà yilpu ní. Mì yaa kaa bàn̄ ti-Dindaan cee, màa ŋùŋfī. Yilpu fɔ́ŋŋŋ Nimbɔtiu yaa kaa fōō-mì, màa gbèentí,

²²see mí sòoǹ kí pɔ̀ deedeedambi bɔti. Ti-Dindaan kaa làá tàan̄, waa làá jī bin sàantí-bee pu kimɔtii. U làá nyīī kí kóoĺ bin kaa sūǹ binib saayee cammu.

²³U làá tɔ̀ atimbun ŋin kíǹee ipɔntoon. U làá kúntí bilambidambi kitil kɔkɔ, ní kí nàan̄ bikpitiŋaliibi pɔŋŋu.

²⁴Ti-Dindaan làá pà unil kamaa nín ŋá tiŋyee paati. U làá pà binib tuuŋŋi paati kí nóó nì bi-landɔkɔi[201].

²⁵U làá sòoǹ kí pɔ̀ u-nibul, ní kí yàntī u-laŋŋaŋfitiiku ń tīī-bi mmɔn.

²⁶Dinimbinaamandi poon ní u dàkà u-laŋŋaŋfitiiku, kii atagban ŋin cáá nnyimee nín lúntí pu ŋweel yuntiŋuee.