Read Ntcham Siracide 36 Bible Online

Siracide 36 - Ntcham bible

Siracide 36

¹Unimbɔti nibul pu wimmeem Ti-Dindaan, duulinya kɔkɔ Nimbɔtiu, sɔ̄ ti-saai!

²Yàntī atimbun kɔkɔ nib ń fàŋkì-si[202]!

³Dúkutí a-ŋal atimbuncaan pu ní ŋí ká a-pɔŋkpaaŋŋu.

⁴A dáaĺ ti-tafal ki dàkā-bi yii a sá circirdaan. Míǹ mbaantiim tāā kí bīikì bi-pu kí dàkà-ti yii a sá ukpaan.

⁵Ti-Dindaan, yàntī ŋí béé-si, kii timbi tiba nín béè yii Unimbɔti ubɔ kaa ti bí ki kútì sii ti-Dindaan pu puee[203].

⁶Fàtīí dàkà a-tuŋwambiti kii njaminee, a nín nìn ŋáaǹ maamaaci tuuŋŋi puee.

⁷Dàkà a-pɔŋkpaaŋŋu kí tīī a-ba tinyool.

⁸Yàntī a-ŋuul ń pōō kí dū-dì kí yàaǹ,

⁹kí nàan̄ ti-pulincɔntiibi, kí kúntí ti-nannanliibi.

¹⁰Téetí ŋyunti ŋun a yóoǹee, kí yàntī ŋú bàń malaa. Niinee binib làá māafì a-tuŋkpaaŋŋi pu.

¹¹Yàntī a-ŋuul din fòol̄ lìblib kii ŋŋmee ń wà bin kíǹ ki bí dimaŋfalinee. Nàan̄ bin sàantí a-nibulee.

¹²Tāā kí mátí ti-nannanliibi bɔtiibi, bíǹ bin lì yii: «Ubɔ kaa ti bí kii timbee!»

¹³Fàtīí kpāfì Isirayeel naakɔti kɔkɔ,

¹⁴kí fàtīí gíiǹ bi-tiŋki kí tīī-bi kii a nín nìn dū-kì tīī-bi ŋkilkaamin puee.

¹⁵Ti-Dindaan, sɔ̄ a-nibul din ŋúb́ a-yindee saai, sɔ̄ Isirayeel nibul din a dūu ŋá a-jipɔŋkpiliuee saai[204].

¹⁶Sɔ̄ a-circir tiŋki saai, Jeerusaleem tiŋki kin poon a kóòyee saai.

¹⁷Yàntī binib ń gbí Siiyɔn tiŋkin kí nīn nyɔ́ŋkí-si. Yàntī a-nyooti ń gbí a-diiku.

¹⁸Dàkà yii bi sá a-nibul, bíǹ bin a náań doooo ŋkilkaaminee. Yàntī tin kɔkɔ a dī a-bɔnaatiliibi pu ki sòon̄ee ń ŋá.

¹⁹Pà bin kɔkɔ máká a-puee bi-paati. Niinee bi làá ká yii a-bɔnaatiliibi nìn cáá ibaamɔn.

²⁰Ti-Dindaan, sii un dàkà a-nibul kulaŋŋaŋfitiiuee, fōō a-tɔntɔnliibi wimmeem. Niinee kitiŋ pu nib kɔkɔ làá béé yii sii di sá ti-Dindaan, jaanjaan Nimbɔtiu. Á béé kí gàntī tin ŋān̄ee

²¹Dipool díǹ fòol̄ tijin kɔkɔ nì ti-bulifi ní. Ama tijin tiba bí ki ŋān̄ ki jítiǹ tin kíǹ.

²²Dilimbil nyí kí gàntī tipeenan kamaa mɔŋŋu. Míǹ mbaantiim ní unyil béetí tinyimɔmbɔti.

²³Dipɔɔkpitil daan kɔ̄ntí unil kunimbaau ní, ama unil un cáá dinyilee tēentí-u tin máaǹ-uee ní. Á béé kí lēē a-nimpuu

²⁴Unimpu kíikí kí mɔ̄ǹ uninja un u yaa pée kée, ama bininjab là bisapɔmbi biba ki jítiǹ bin kíǹee.

²⁵Uninja yaa kpēē u-nimpuu nyaaŋkuee an mɔ̄ǹ-u ní. Tin uninja pée nyàab̀ee dee.

²⁶U-sooŋyi poon kulaŋŋaŋfitiiu nì mmɔn yaa bée, u-cal gíti bí mmɔnni ki jítiǹ bininjab kɔkɔ.

²⁷Un cáá unimpuee bīitì tigaajati pu dee. Unimpu sá ŋŋàl ŋun náań nì uee, dikaakpal din tíkí-uee.

²⁸Kusaau kun baa bàkēe, bi fúkuĺ-kù ní. Uninja yaa kaa cáá unimpuee, u gbí falaa ní kaa nyí laakin u cée.

²⁹Baa ŋūǹ kí nīn máká unaayuciin un tú ki yìiǹ ki póotí ntimuee pu. Míǹ mbaantiim baa ŋūǹ kí nīn máká uninja un kaa cáá ŋkɔŋkoon, ki gbíntí ki dɔ̀ laakin kunyeeu yaa mɔ́-uee pu.