Read Ntcham Siracide 37 Bible Online

Siracide 37 - Ntcham bible

Siracide 37

¹Bibɔɔtiibi bí tɔbin Ubɔɔti kamaa ŋūǹ kí tùkù-si yii: «Man mun sá a-bɔɔ ní!» Ama biba ceeyee, bi sá bɔɔbi diyindi fám ní.

²A-bɔɔmɔnti yaa kpántì a-nannanliuee, an sá kunimbaau kun cáǹ-si ŋkúminee ní!

³Kun téekí-ti ti ŋáań ikpitee nyánní la ní ki yāntì inyimɔn gbí kitiŋ kɔkɔ pu míǹ?

⁴Ubɔɔti ubɔ nóó-si nnaam yuntiŋu ní, ama nnaabu yaa kɔ́-see ní ú kpántí a-nannanliu.

⁵Ubɔɔti ubɔ kíikí si nì u ń jī falaa ú ká kí jī, ní dikɔ̀ndi poonee ú sāǹ kí báĺ u-gbampɔɔl boon.

⁶Á taa súntí a-bɔɔ pu a-pɔbilin, ní kí téetí u-pu a yaa ká tigaajatee. Bisaŋkiliibi

⁷Usaŋkil kamaa làá lì yii úǹ saŋkii di ŋān̄, ama biba bíǹ sáŋkí binib ki kpàkaǹ njim ní.

⁸Nín̄ nyí nì a-ba nì bisaŋkiliibi. Bàlifì a-ba kí béé kun udaan nyàab̀ee. Di sá yii úǹ u-ba pu ní u sáŋkí-si. Yaa sá fám u ŋáań míǹ ki nyàab̀ kí fōō tin sá a-yatee ní.

⁹U ŋūǹ kí lì-si yii: «A tàkā nsammɔnti pu.» U làá kàkatī u-ba ki yú kudandaŋu kí kpèè tin làá bàń-see.

¹⁰Taa bàlifì isaŋki unil un ŋèeǹ nì see cee, kí taa māafì bin ná-see tin a là kí ŋée.

¹¹Taa yàntī unimpu ń tīī-si isaŋki u-yɔnti pu, kí taa bàlifì isaŋki kujaau pu ufaantija cee, kí taa bàlifì isaŋki tin a làá dēe pu uwannyafil cee, kí taa bàlifì isaŋki tin a làá nyāfèe pu uwandal cee. Ubɔ yaa ŋá-si tiŋan ní a là kí jāam̀-uee, taa cù un cáá nnimbitaataamee cee kí fōō isaŋki, kí taa bàlifì isaŋki tiniti pu utɔŋfiti cee, kí taa bàlifì isaŋki ditundi pu uwutijoodaan cee, kí taa bàlifì isaŋki ditundi dóotam pu utɔntɔnli un bi pà dibindee cee, kí taa bàlifì isaŋki dituŋkpaandi pu utɔntɔnli un kaa yáb̀ee cee. Taa nín̄ cɔ́tí an nibee pu yii bí tīī-si isaŋki.

¹²Ama nín̄ pée cáà un fàŋkí ti-Dindaanee cee. A nyí yii u nóó marab, ní ki dàkafī kii siiyee. Tin a làá ŋée yaa kaa cōom̀ee, u làá tíkiń-si.

¹³Nín̄ máká tin a-pɔbil bí-si yii á ŋée pu, di sá yii díǹ di sá deedee saŋkiliu.

¹⁴Iyunti ibee unil landɔkɔjaatiŋu kpáafí-u ki jítiǹ biciitiliibi biluli bin tɔ́kɔ́ sintil difɔkɔku pu ki cée.

¹⁵Ama mpeepeekaamee, bàlifì Yilpu Fɔ́ŋŋŋ Nimbɔtiu ú kpòotī-si kí tàkan̄ ibaamɔn saŋŋu pu. Iciin in sá imɔntee nì in kaa sée

¹⁶Kí wàatī á kíĺ ditundi kamaayee, see á sòoǹ kí bɔ́ntí. Kí wàatī á ŋá tin kamaayee, see á dàkafì.

¹⁷Unil landɔkɔi kífí u-pɔbilin ní.

¹⁸Dì ŋūǹ kí tɔ̄ apan anaa: tiŋan nì tikpitil, dimaŋfal nì ŋkúm. Ama kun di lèekī tin sá á ŋée di sá dilimbil[205].

¹⁹Binib biba yáb̀ kí dàkà bin kíǹee, ama ní kaa ŋūǹ kí kèetī bíǹ bi-ba tiba poon.

²⁰Biba mun sá bibɔsoonnyaambi. Ama ní binib kaa là bi-bɔti ní bí kpú ŋkùm.

²¹Di sá yii ti-Dindaan kaa pú-bi diyimɔɔl. An pu ní baa cáá iciin báà fiii.

²²Biba cáá iciin bíǹ bi-ba cee ní. Kii bíǹ bi-ba nín sòoǹ puee, bi ŋūǹ kí nīn máká bi-nyil pu.

²³Ama uciŋfiti úǹ dàkà u-nibul ní. Tin bi ŋūǹ kí ká u-nyil poonee, bi ŋūǹ kí nīn máká an pu.

²⁴Unil un cáá iciinee kāntí dibiindi tikpil ní, ní bin kɔkɔ kāntí-uee lì yii u bí mmɔnni.

²⁵Bi ŋūǹ kí kàaǹ unifoo maŋfal wiiŋyi, ama baa ŋūǹ kí kàaǹ Isirayeel nibul yai.

²⁶Binib cáá un cáá iciin u-nibul kansikinee pu dimákal ní. U-yindi làá nīn bí ní ki cá jaanjaan. Á jī kí ŋmàntīǹ a-pool

²⁷M-jipɔɔn, á nīn cɔ́ŋkí a-ba ŋyunti ŋun ní a dáá bí dimaŋfalinee. Béé tin kaa ŋān̄ee kí yíí kí taa ŋá-tì.

²⁸Di sá yii tikɔkɔ di kaa ŋān̄ ki tīī báà ŋma, ní tikɔkɔ di kaa kàaliǹ báà ŋma[206].

²⁹A yaa ká tijimmɔntiilee, á jī kí ŋmàntīǹ a-pool, taa páatíí jēetí tijin pu ki jīǹ ŋmàŋma.

³⁰Di sá yii tijin tikpil dijilee tìì igbaŋween ní, ní un jīǹ ki lákatí u-ba puee poon làá wà.

³¹Tijin tikpil dijil yāntì binib tikpil kpíì, ama un nyí nì u-bee, u-maŋfal fɔ̀kɔntí ní.