Read Ntcham Siracide 38 Bible Online

Siracide 38 - Ntcham bible

Siracide 38

¹Dɔkɔta nì igbaŋween bɔti Tīī dɔkɔta jilma ditundi din u tūǹee pu, kun puee ti-Dindaan di náań u mun.

²Di sá yii Yilpu Fɔ́ŋŋŋ Nimbɔtiu cee ní dicáaǹdi nyēeń, kii tiwampɔkaal tin unil fòol̄ ubɔti ceeyee.

³Dɔkɔta nyil pu ní u còom̄ u-yil gáań, ní binikpaambi tɔ́-u.

⁴Isunyaan in cāantée nyánní kitiŋ ní, an dàkà yii ti-Dindaan di náań inyɔkɔfi. Unil un cáá nlandɔkɔee kaa kpèé ki sìŋkīǹ-i.

⁵Didɔgindi ní Mooyiisi dūu tɔ́ nnyimin ní mì mɔ́ɔkì[207]. An yāntì binib béè Unimbɔti pɔŋŋu.

⁶U tīī binib dinyil bí dūú nyɔ̄ŋkì-u u-maamaaci tuuŋŋi pu.

⁷Tíǹ ní dɔkɔta cáa cāantí iween ní ki bàtī iwàlfi pu.

⁸Tíǹ ní un nyāntí inyɔkɔfee cáa ŋmàlintí ki ŋáań inyɔkɔfi, án nín làá ŋá pu ti-Dindaan tuuŋŋi ń taa nín̄ cáá dikúntilee. Ŋgbampɔn nyánní u-cee ní ki kpátì ki gbí kitiŋ kɔkɔ pu.

⁹M-jipɔɔn, a yaa būǹee á taa dūú ŋá bugbambu, ama á mèè ti-Dindaan, u làá cáaǹ-si[208].

¹⁰Fá a-kpitii kí ŋá min kítèe, kí ŋá a-pɔbil circir kí nyā ikpiti kɔkɔn.

¹¹A yaa cáá ŋŋmamee, á nyàab̀ ŋyim diŋaaŋkul nì talaalutuukaa nì ŋkpam kí ŋá Unimbɔti saraa.

¹²Míǹ boonee á yàntī dɔkɔta ń kpèè-si, kun puee ti-Dindaan di náań u mun. Yàntī dɔkɔta ń nīn bí ki kɔ́ĺ-si, di sá yii a nyàab̀-u ú cáaǹ-si ní.

¹³Ŋyunti ŋubɔee a-cáaǹtam làá nyānní dɔkɔtab cee ní.

¹⁴Di sá yii bi mun làá mèè ti-Dindaan ní. U làá yàntī bí ŋmā kí bàtī ubunli weeŋyi pu, ní kí cáaǹ-u ú nīn bí dimaŋfalin.

¹⁵Un di yaa yīntiǹ u-náanliuee, udaan ń kɔ́ dɔkɔta ŋaan! Tin a máaǹ kí ŋá unil yaa kpíìyee

¹⁶M-jipɔɔn, sɔ̄ unil un kpíìyee pu. Tóoń ŋkpiisilan kí dàkà a-nimbaaku. Míǹ boonee á síb́-u kí nóó nì akoobil nín sá puee, kí taa súntí kí tīī dikaakul din poon bi síb́-uee tinyool.

¹⁷Yāliŋkì u-pu tikpil, kí sɔ̄ u-pu lɔ̀lɔlɔ. Kāl̀ u-kpool min ní an máaǹ-uee, ŋwiin ŋubɔ kii ili binib ń taa sòoǹ a-pu. Míǹ boonee á sɔ̀ŋkì a-pɔbil a-nimbaaku pu.

¹⁸Di sá yii kunimbaau ŋūǹ kí kpɔ̀ unil. Unil un pɔbil bíil̀ee kaa ti cáá mpɔn.

¹⁹A yaa kɔ́ nnaabunee, kunimbaau kaa lèekī a-pu. A yaa kā kunandaŋuee, an sá mbusu ní.

²⁰Taa yàntī kunimbaau ń jī mpaan a-pɔbil poon, jà-ku ní kí nīn dàkafī a-kúntitam pu.

²¹Taa súntí yii a yaa kpíì aa ti gítiń dimaŋfalin. A-nimbaaku kaa làá kèetī utaŋkpiil báà tiba, ní siiyee, a bí ki náatí a-ba fám.

²²Á téetí yii kun bāań-uee di làá pée bàń sii mun. Úǹ cee fu jítì fool, sii cee di sá díǹ.

²³Unil yaa kpíì ki kɔ́ diŋuŋfilinee, á taa ti dàkafì u-pu. U tin lì yii u sìntēe, á sɔ̀ŋkì a-pɔbil. Ŋŋal pu tuuŋŋi nín cáá agìń puee

²⁴Kí kpántí unyilee, see á nīn cáá iyunti tikpil ki kɔ̀ntī a-nimbiliŋ. Un pu ditundi kaa múkúee di kpántí uciŋfiti.

²⁵Mana ní un ŋúb́ inaa ki kù tikpaalee làá kpántí uciŋfiti? Kun pée tìì-u mmɔnee di sá ú nīn ŋúb́ ndɔ ki péetí u-naai. U cáá-i ki tūǹ ditundi kaa gbèentí ní ki sòoǹ u-najapɔmbiliŋ baba bɔti.

²⁶Tin pée páb́-uee di sá ú cátí adan, ní kunyeeuee ú kpíiǹ u-nasalii.

²⁷Míǹ ní an sá ki tīī ŋŋal pu tɔntɔnliibi nì bin kpítí tiwanee. Bi tūǹ ditundi ŋwiimpu nì kunyeeu ní. Kpèè, bin di cákà njalimu mun bi cáá nyìitī tiwan puee. Bi bí ní ki kpántí tiwan daanti kaa gbèentí. Bi dù bi-pɔbil kɔkɔ kí lēē kun naŋku bi là kí lēēyee, ní kí dū tinyati kí dóó bi-tundi.

²⁸Míǹ mbaantiim ní an sá ki tīī ucaa un kā ki kɔ́ĺ dicaataŋkpalee. U-nimbikpeeŋu pée cɔ́ tikúti tin u làá dūú tɔ̄ ditundee pu ní. Ŋŋmi tuntuŋku píl̀ u-wunti ní u bí ki mɔ̀ nì kucaapuu. Aama un u cáa gbáà tikútee kpáà u-tafaliŋ. U-nimbiliŋ pée cɔ́ kun ní u bíi mɔ́ɔ̀yee pu ní. U dù u-pɔbil kɔkɔ kí tīī kí tɔ̄ u-tundi tiŋan pu, ní ki kpìtī u-geem kí ŋmā kí dɔ́ntí-dì.

²⁹Míǹ ní an sá uyɔɔmaati un kā ki tūǹ u-tundee. U cáá u-taaŋi ki màntī u-jantiliiki. U-landɔkɔŋu pée kā u-tundi pu ní, ní u pɔ̄ɔntí kí ŋmā kí mā tiwan tikpil.

³⁰U dù u-taaŋi kí tāā kuyɔkɔu, ní kí dū u-ŋalii kí kúntí. U dù u-pɔbil kɔkɔ kí tīī kí jɔ̀lifì ní kí kpìtī u-geem ki bɔ́ntí laakin u làá púĺee.

³¹Binib nee kɔkɔ máká bi-ŋalii pu ní, ní báà ŋma nyí u-tundi tiŋan.

³²An yaa kaa sá bíǹ puee, baa bàà ŋūǹ kí náań kitiŋ, kaa bàà ŋūǹ kí nīn kóò ki-ni, ní kaa bàà ŋūǹ kí còom̀ ki-ni. Ama bitindaŋkpilib kpafil poonee, baa bàlifī bi-pu.

³³Samaa poonee, baa cáá tinyool paaŋŋu. Bi kpá ki làá kàl̄ ubɔsoonli jal pu. Baa kàal̀ ubɔsoonli jal pu, kaa nyí marab poon tiba. Baa cūtì sukul kaa ŋūǹ marab. Baa kútì bin gà alaŋkpanee poon.

³⁴Ama bíǹ di kpèé tin náań ki bí ki cá jaanjaanee, ní bi-wimmeem di sá bí ŋmā kí tɔ̄ bi-tundi tiŋan. Ama an kaa sá mbaantiim ki tīī un di dū u-ba ki tīī ki dàkafī Yilpu Fɔ́ŋŋŋ Nimbɔtiu Marau puee[209].