Read Ntcham Siracide 39 Bible Online

Siracide 39 - Ntcham bible

Siracide 39

¹U bífí dooooyee kpilib ciiŋyi, ní u-nimbikɔntiwanti di sá ú nīn dàkafī Unimbɔti bɔnaatiliibi bɔti pu.

²U kpáafí tin bi máafí binib bin nìn nyáń diyindee. U gbìl̄ ki cíl̀ alaŋkpan taapu kɔkɔ nyíki nyiki[210].

³U nyàab̀ kí béé alaŋkpan bɔti taapu, ní ki yòontí ŋyunti kí béé ipɔɔn taapu.

⁴U tūǹ atuun binikpaambi cee, ní bi kāntí-u bibɔtiibi kansikin. U còom̄ ki cá ntincamun, di sá yii u nyí tin ŋān̄ee nì tin kaa ŋān̄ee binib cee.

⁵Kutaafaau pɔ̀lpɔlee, u pɔ̄ɔntí ki cá ti-Dindaan un náań-uee cee. U mèé Yilpu Fɔ́ŋŋŋ Nimbɔtiu nimbiin. U wàantí u-nyɔkɔ ki mèé-u ní ki gbàam̄ u-kpitii pu[211].

⁶Ti-Dindaan un di sá Ukpaanee yaa lèe, u làá yàntī dinyil fam ń gbí-u. Niinee ní ú dū iciin nyɔɔbuŋŋi kí yàaǹ. U-wimmeem poonee, u làá jāam̀ ti-Dindaan.

⁷U làá nīn cáá dinyil nì ŋyam ibɔsoon poon, ní kí nīn dàkafī Unimbɔti bɔbalkaati pu.

⁸U làá yàntī tin u bífèe ń ŋmíntí kii ŋwalifee, ní án nīn mɔ̄ǹ-u mara un di sá dipoondi din bí ti-Dindaan nì u-nibul kansikinee pu.

⁹Binib tikpil làá pàkà-u u-nyil pu, ní ki kpá kí súntí u-pu. Baabadalee bi làá nīn pée téetí u-pu, ní u-yindi ń nīn bí ki cá abin abin[212].

¹⁰Atimbun nib làá dāá sòoǹ u-ciiŋyi pu, ní bí dāá nyɔ̄ŋkì-u dikpafikpaandi poon.

¹¹U yaa yúntì kitiŋ puee, u làá nyā diyindi kí jītíǹ binib kutukub pu. U yaa tí kpíìyaaa, an mɔ̄ǹ-u ní. Tin kɔkɔ Unimbɔti ŋáańee ŋān̄ ní

¹²M yaa bíi dàkafēe, ilandɔkɔ tikpil dòoń-mi ní, ní m náań nì uŋmal un ŋá dikuŋkundee. An pu ní m gíti là kí sòoǹ.

¹³M-jipɔmbi bin yú nì unimbɔti deedeeyee, wíim̀maan kii nsupumpukum min yú dibuŋgbándee.

¹⁴Nín̄ sɔ́fìmaan kii talaalutuukaayee. Púkuḿmaan kii liisi supumpukumee, kí gbìtī ni-sɔnsɔŋfiŋu. Tí gāāmaan nlan dicilpu, kí jāam̀maan ti-Dindaan tin kɔkɔ u ŋée pu.

¹⁵Lìmaan yii: «Unimbɔti sá ukpaan!» Gāāmaan ilan kí bɔ̀ɔ̀ tibati kí tīī-u tinyool. Anyɔɔbun ŋin ni làá dūú gāā ilan ki nyɔ̄ŋkì-uee sɔ̀.

¹⁶Ti-Dindaan tuuŋŋi kɔkɔ ŋān̄ ní, ní tin kɔkɔ u yaa tīī mara yii án ŋée, tì ŋáań ŋyunti ŋun ní an sá tí ŋée ní.

¹⁷An kaa cáá bí bàlifì yii: «Ba pu ní an bí yéè? Ba pu ní an sá yéè?» Di sá yii tibɔti kɔkɔ taapu làá dāá nyā kí páań mpaampiin pu ti-yuntiŋu. Ti-Dindaan pée sòon̄ ní nnyim sāā ki yúl̀ ki dūu kpántì kubɔɔu. U sòon̄ dinyɔɔbundi dibaba ní an kpántì anyimbɔbil[213].

¹⁸U tìì mara ní tikɔkɔ ń ŋá kii u nín là puee. Ubɔ kpá kí kpákáǹ difiil din u tììyee[214].

¹⁹Binifoobi kɔkɔ tuuŋŋi dɔ̄ u-nimbiin ní mpaampiin pu, tiba kaa bí ki bál̀ waa wāĺ.

²⁰U wāĺ tin jítèe nì tin bí ki dòońee kɔkɔ, tiba kaa bí ki sá maamaaci u-cee.

²¹An kaa cáá bí bàlifì yii: «Ba pu ní an bí yéè? Ba pu ní an sá yéè?» Di sá yii Unimbɔti nyí kun pu u náań tiwan kɔkɔee[215].

²²U-biindi sá kii mbun ŋun gbí ki páaǹee, a lì kii nnyiŋgbeen ŋun di sɔ̀ŋkī kitiŋee ní[216].

²³Míǹ mbaantiim ní atimbun ŋin kíǹee paati tin bi làá fōōyee di sá u-ŋuul, kii u nín nìn yāntì nnyim kpántì ŋyaam puee[217].

²⁴U-saŋyi tèen̄ ki tīī bin yú nì u deedeeyee, ama ní ki cáá aganlaka tikpil ki tīī binikpitib[218].

²⁵Doooo ŋkilkaaminee, ti-Dindaan nìn náań tiwammɔntiil ki tīī binimɔntiibi, ní ki náań tin kaa ŋān̄ee ki tīī binikpitib.

²⁶Tiwan tin unifoo máaǹ kí nīn cáá kí nīn bí dimaŋfalinee di sá nnyim nì ŋŋmi nì tikúti nì ŋyaam nì ŋyim nì nnaabiim nì tisiil nì ndamam nì ŋkpam nì tiwampeeŋkaal.

²⁷Tíǹ kɔkɔee sá tiwammɔntiil ní ki tīī bin yú nì Unimbɔti deedeeyee, ama ní ki kpántí tin kaa ŋān̄ee ki tīī binikpitib.

²⁸Unimbɔti náań kubuŋu kubɔ kí dáaĺ bikpitiŋaliibi tafal, ní u-ŋuukpaandi yàntī ku kpántí nnaabukpaan. Ibɔsoon yuntiŋuee, ku dàkà ku-pɔŋŋu ní kí sɔ̀ŋkì un náań-kuee pɔbil.

²⁹Ti-Dindaan náań ŋŋmi nì ataanyiŋkumbil nì ŋkùm nì ŋkúm kí dáaĺ bikpitiŋaliibi tafal.

³⁰Ipeecuncuti nyiŋŋi nì inoom nì ikoowaati nì kitàataajiki kin kù binikpitibee

³¹fàal̀ kí nīn tɔ́ u-marab. Kitiŋ pu dooyee, tì pée bɔ́ntì ki cí kí ŋá tin u lèe. Ŋyunti yaa bàn̄ee, tì kpá kí yíí kaa làá ŋá tin u lēe[219].

³²M nìn pée nyí tin bí nee kɔkɔ doooo ŋkilkaamin. An pu ní m dākafì ti-pu, ní ki dū-tì ki ŋmàn̄ ki bíl̀.

³³Ti-Dindaan tuuŋŋi kɔkɔ ŋān̄ ní. U tìì tin kpée ŋyunti ŋun máaǹee.

³⁴Ubɔ ń taa lì yii: «Tin bí nee kaa ŋān̄ ki bàn̄ tin kíǹee.» Di sá yii tiwan kamaa ŋān̄ ti-yuntiŋu ní[220].

³⁵An puee kɔŋkɔnnee, nì ni-pɔbil kɔkɔee, ní kpàtī ni-neeŋyi kí gāāmaan ilan kí jāam̀ ti-Dindaan.