Read Ntcham Siracide 4 Bible Online

Siracide 4 - Ntcham bible

Siracide 4

¹M-jipɔɔn, taa ŋmìntī usoodaan tin u làá dūú kpíiǹ u-bee, taa yàntī unandaan ń cīití u-nimbiliŋ ń tin lóoĺ[19].

²Taa yàntī un ŋkùm cááyee ń jī falaa, taa yàntī un bí kunandaŋunee ń gíí diŋuul.

³Taa dū digìńdi kí kūtì-u. U nyàab̀ tiba a-cee, taa yàntī ú kàl̄ kí gīī.

⁴Taa jà unil un an páb́ u bíi mèé-si tibee, taa fàtī a-boon kí tīī usoodaan.

⁵Taa fàtī a-boon kí tīī unandaan, kí taa tīī ubɔ diyimɔɔl ú tɔ̄-si mbusu.

⁶Di sá yii u-nyɔkɔ yaa túŋkì ní u yaa tɔ́-si mbusuee, u-náanliu làá fōō u-wimmeem.

⁷Yàntī bí nīn néeń-si samaa poon, a yaa ká unikpaanee, á tìntī a-yil kí tīī-u jilma.

⁸Kpòon̄ a-tafal kí pīlifì ufalaadaan bɔti, ní kí kíí-u nì kinyɔɔmɔɔi nì ŋgbansɔŋfi poon.

⁹Fīī unil un bi wɔ́b́ee u-wɔ́biliu ŋaan. A yaa cáá tibɔti kí sòoǹee, á taa fàŋkì.

¹⁰Nín̄ sá kii ubaatee ki tīī ataŋkpiibil, ní kí nīn sá kii calee ki tīī bi-na. Niinee a làá nīn sá Yilpu fɔ́ŋŋŋ yɔu jipɔɔn, ní ú nīn néeń-si ki jítiǹ a-na nín néeń-si puee. Iciin dàkà un nyàab̀-iee ní

¹¹Iciin yòontí i-jipɔmbi yilpu, i kpèé bin nyàab̀-iee tiŋan ní.

¹²A yaa néeń Iciinee, a néeń dimaŋfal dee. Bin péetí kutaafaau pɔ̀lpɔl ki nyàab̀-iee làá dāá nīn bí mmɔnni.

¹³Unil un yaa cáá-iee làá ká tinyool. laakin u yaa cée, ti-Dindaan làá bìin̄ u-boon[20].

¹⁴Binib bin bí i-tundinee sá Circir Nimbɔtiu yab ní. Binib bin yaa néeń i-bɔtee, ti-Dindaan mun néeń-bi ní.

¹⁵Unil un pílifí i-bɔtee làá nīn sá deedee bɔsoonliu, ní un dū u-ba ki nákáǹ-iee làá nīn pée bí ŋgbansɔŋfin.

¹⁶Un yaa máká i-puee, làá dāá fōō-i kii difakalee, ní u-naantiibi ń dāá nīn yì-i kí nīn pée cáa cá jaanjaan.

¹⁷I làá péé kí kpòotī-u kí tàkan̄ asaŋgɔŋgɔlin, kí yàntī tifaandi nì dinyoondi ń kɔ́-u. I làá dàkà-u kí dáaĺ u-tafal kí tin sāā ŋyunti ŋun ní i làá nīn kíǹ ki cáá u-pu dimákalee. I làá dū i-bɔkpaaŋi kí cɔ̄ŋkì-u.

¹⁸Míǹ boonee ní í fàtīí gítiń u-cee, kí yàntī án mɔ̄ɔkiǹ-u ní kí dū u-bɔbalkaati kí dàkà-u.

¹⁹Ama udaan yaa kākatì ki wāatì Iciin saŋŋuee, i làá dū-u kí fá ní kí yàntī ú wāŋkì. Taa nín cáá a-ba pu icoo

²⁰Nín̄ dāantí ki kpèé tin bí ki jītée kɔkɔ kí kpāafì a-ba kí taa ŋá ikpiti, kí taa nín̄ cáá a-ba pu icoo.

²¹Di sá yii icoo iba bí ki cáǹ unil ikpitin, ní iba mun cáǹ unil tinyool nì kulaŋŋaŋfitiiun.

²²Taa kpèè kí sɔ́kɔ́ a-ba, kí taa yàntī icoo ń nàan̄-si.

²³Án yaa bālifì á sòoǹee, sòoǹ.

²⁴A-sooŋyi poon ní bi béetí yii a sá uciŋfiti, ní anyɔɔbun ŋin nyēē a-nyɔkɔnee di dàkà a-nyil.

²⁵Á taa sòoǹ kí jáǹ ibaamɔn, ama á yàntī icoo ń cúú-si tin saa nyée pu.

²⁶Á bìitī a-kpitii puee ń taa nín̄ cáá-si icoo, di sá yii saa ŋūǹ kí pìin̄ dimɔɔl nsan dí taa pùub̀.

²⁷Taa yàntī ugbaan ń jɔ̄m̀ kí tɔ́kɔń a-pu, kí taa yàntī upɔɔl ń jī a-pu dinyandi.

²⁸Já áli kí tin kpú ibaamɔn pu, ti-Dindaan Unimbɔti làá já kí tīī-si.

²⁹Á taa dàkà tininjati isoon poon, kí taa nín̄ dàkà diwutijool nì didɔndi a-tundin.

³⁰Taa nín̄ sá kii gbikintee a-cindin, kí nīn sá ufaantija a-tɔntɔnliibi kansikin.

³¹A-ŋal ń taa nín̄ wāā ki cí kí fōō, ama ní an yaa tin sá á tīīyee, á dū-ŋu kí ŋúb́[21].