Read Ntcham Siracide 40 Bible Online

Siracide 40 - Ntcham bible

Siracide 40

¹Unil falaau Ti-Dindaan náań agìń kí tɔ́ binifoobi kɔkɔ pu. U dū diwaŋgul din di nyìm̀ee ki nyīkiǹ bi-pu kí yòon̄ ŋwiin ŋun bi nyáń bi-na poonee. Án làá nīn nyìkī bi-pu míǹ kí tin sāā ŋwiin ŋun bi làá fàtīí gítí kitiŋ kin sá binifoobi kɔkɔ nee cee[221].

²Bi dàkafī tin dɔ̄ ki cí-bee pu nì kunimbaau kaa gbèentí, an dàkà yii bi-kúm wiiŋŋu. An di baasii fàantí-bi[222].

³An sá tiwambaantiil ní ki tīī báà ŋma: kí yòon̄ ubɔti un kā u-beejal pu nì tinyoolee kí tin cáá sāā unandaan un kā kitiŋ ŋfantaminee,

⁴kí yòon̄ un pēē abeebɔkuti ki cíkí kibeefuuliiyee kí tin cáá sāā un pēē ŋŋaafantanti wantee.

⁵Báà ŋma dáká diŋuul nì ipoompoon nì agìń nì dipɔɔbiildi nì ŋkúm faaŋku nì kináŋ nì kujaau ki ká. Ní bi yaa dōoǹ kí bàà ŋùŋfèe, ní ilandɔkɔ kupaau ń dūú múkúǹ bi-pu bi-geem poon.

⁶Udaan tin pée lì yii u dɔ̀ kí ŋùŋfèe. ní ú kíĺ ki bíi dámintí ní kí kɔ́ agìńni kii an sá ŋwiimpuee. An páb̀-bi tin bi kāntí bi-damintiiti poonee pu, kii ujanjal un di sáǹ ki ŋmátì dikɔ̀ndinee[223].

⁷Ŋyunti ŋun ní an sá bí ká difiilee ní bí cúú fìntī ní án ŋá-bi bitii yii bi fāŋkì fám.

⁸Kun dɔ̄ ki cí tin kɔkɔ pée cáá kufoou, kí yòon̄ unil kí tin sāā kuwaŋkuluuee dee, ama án làá nīn pɔ̄ɔ̄ binikpitib cee miluli pu ní.

⁹An di sá ŋkúm nì nnikpaakoon nì kinikpɔŋkpɔkɔu nì kujaau nì inaabu nì ŋkùm nì dinàandi nì bìlbil kúm.

¹⁰Tin bí nee kɔkɔee, Unimbɔti náań-tì binikpitib pu ní. Bíǹ gbanti pu ní nnyiŋgbeen dɔ́miń kitiŋ pu[224].

¹¹Tin kɔkɔ nyánní kitiŋinee làá fàtīí gítí kitiŋin, ní tin kɔkɔ nyánní nnyiminee ń fàtīi gítí tiŋkun. Inaamuul kúntitam

¹²Á ŋéeb́ ubɔsoonli nyɔkɔ ú pɔ̀-see nì inaamuul kɔkɔ bí ki làá kúntí, ama tibulcin tíǹ làá nīn bí ní kí nīn cá jaanjaan.

¹³Binikpitib gaajawanti làá kúntí kii mbun nín fóotí puee, tì làá jītí kii utaa nín fátí didundi mpɔn utaaja poon puee ní.

¹⁴Unikpiti yaa ŋúbitì u-ŋalee, an mɔ̄ǹ-u ní. Míǹ mbaantiim ní bin yìntīǹ maree làá dāá kúntí múb.

¹⁵Binikpitib dicaŋku maaliŋu kaa bùtī. Bijɔkɔŋfub gbanti nyaaŋyi làá nīn pá ditaŋkpal pu ní.

¹⁶Kukaluu kun nyáń nnyim caŋin dibuŋgbándee ní bi péetí kí fùkù ní kí nín fùkù timool tin kíǹee.

¹⁷Ama tiŋan diŋál sá kii dibiindi kpaabuee ní, ní tiwan tin a pú uwɔfee làá nīn bí ní ki cá jaanjaan[225]. Unimbɔti faaŋku di sá tin ŋān̄ páaayee

¹⁸Á nīn tɔ́ a-ba kí nīn sá utɔntɔnlee sá tiwan tin mɔ̄ee ní. Ama un ká tigaajatee sɔ́ǹ bi-liitil[226].

¹⁹Á nīn cáá mbiyaamu tikpil kí náań kitiŋee yàntī unil yindi ń nīn bí ki cá ní. Ama á ká unimpumɔntee jítiǹ tikɔkɔ.

²⁰Ndaam nì ilan sɔ̀ŋkī dipɔbil ní. Ama unil ń nīn néeń iciin bɔtee sɔ̀ŋkī ki jítiǹ tikɔkɔ.

²¹Diwul nì kubeeu mɔ̄ dipilifil. Ama nneen ŋun mɔ̄ee jítiǹ tiwan gbanti liitil[227].

²²Tin bí gbàlgbalee nì tin ŋān̄ee mɔ̄ nnimbikpee ní. Ama bukpaa bun sɔ̀m̀ fílfilee mɔ̄ ki jítiǹ tiwan gbanti liitil.

²³Ubɔɔti nì u-bɔɔ kpáfí ŋyunti ŋyunti. Ama unimpu nì u-cal bíǹ kpáfí múlmul ní.

²⁴Nnabiyaamu nì ulaŋŋaŋfiti kèetī nnaabu yuntiŋu. Ama unil ń pɔ̄ biwɔfib tiwanee gíti kèetī tikpil.

²⁵Sindaariya nì animbil kúti yàntī a máká a-ba pu. Ama binib gíti tìì isaŋkimɔnti disíndi.

²⁶Tigaajati nì mpɔn tìì dimákal ní. Ama unil ń nīn fàŋkí ti-Dindaanee di sɔ́. A yaa fàŋkí ti-Dindaanee, tiba kaa lóotí-si, ní aa ti nyàab̀ dijòońdi laaba[228].

²⁷Ti-Dindaan faaŋku sá kii dibiindi kpaabuee ní, ní ki wúǹ unil pu ki jítiǹ tinyool kɔkɔ. Taa nín̄ sá unil un mèéyee

²⁸M-jipɔɔn, taa nín sá unil un di mèéyee. A yaa kpíì, an sɔ́ǹ á nīn bí ki mèé.

²⁹Unil un kpèé u-juti sambil poon nì nnimbitaataamee kaa ŋman bí dimaŋfalin dee. Udaan cáá tijin tin waa túń ditundi ki kée ki cáa kɔ̄ntí u-ba tijɔkɔndi. Ama unil un cáá dinyil ki fōō didàkamɔntiilee kpá kí ŋá míǹ.

³⁰Unil un kaa cáá icooyee, tijin tin u mēē ki jíńee mɔ̄ u-nyɔkɔn cɔ́ncɔncɔŋ ní. Ama tì yaa kɔ́ u-poonee, an wù kii ŋŋmee ní.