Read Ntcham Siracide 41 Bible Online

Siracide 41 - Ntcham bible

Siracide 41

¹Ŋkúm Óò ŋkúm, an sá ntuntun ní ki tīī unil ń dàkafì a-pu, ŋyunti ŋun ní u-pɔbil sɔ̀m̀, tigaajati māntìi tú-u, tiba kaa páb́-u, tikɔkɔ bútì-u, ní u gíti ŋūǹ kí jī tijimmɔntiilee[229].

²Óò ŋkúm, a dòoń ŋyuntimɔnti ki tīī unandaan un kaa ti cáá mpɔn, ki tīī un púĺ kɔ́tí kɔti, tibɔti tikpil páb́-uee, ki tīī unil un kaa kíikí u-ba pu kaa ti cáá kimɔtiiyee[230].

³Taa fàŋkì ŋkúm ŋyunti ŋun ŋu yaa lēē kí dāan̄ee. Téetí bin di līntiǹ-si nì bin di làá dāá páań a-boonee pu.

⁴Ŋkúm sá tiwan tin ti-Dindaan sòon̄ ki síiǹ unifoo kamaa puee ní. Ba pu ní á nīn bí ki kpākantí tin Yilpu Fɔ́ŋŋŋ Nimbɔtiu lēē ki síiǹ báà ŋmee? A ŋūǹ kí kàl̄ kitiŋ pu abin saalaa, àá abin dilaataal àá kutuku, ubɔ kaa làá wòoǹ-si a-maŋfal wiiŋyi pu ditaŋkpiilin. Tin dɔ̄ ki cí binikpitibee

⁵Binikpitib biyaamu kpántí ntimbiil biyaamu ní. Mu cáà bin di kaa nyí Unimbɔtee dumpui ní.

⁶Bikpitiŋaliibi biyaamu fakal làá nàan̄ ní, icoo di làá nīn dī mu-naantiibi kí nīn cá jaanjaan.

⁷Ubaati un sá unikpitee biyaamu làá dāá wòoǹ-u. Di sá yii u-pu ní icoo dī-mu.

⁸Mbusu dɔ̄ ki cí nimbi binikpitib bin di dū Yilpu Fɔ́ŋŋŋ Nimbɔtiu Marau ki fée.

⁹Daliŋkin bi màl̄-nee, mbusu di dɔ̄ ki cí-ni, ni yaa tí kpíìyaaa, mbusu di dɔ̄ ki cí-ni.

¹⁰Tin kɔkɔ pée nyánní ntaminee làá fàtīí gítí ntamin ní. Míǹ mbaantiim ní an sá ki tīī binikpitib: bi làá nyā mbusun ní kí kɔ́ dinàandin[231]. Diyimmɔntiil

¹¹Unil yaa kpíìyee, bi kàal̀ u-kpool ní, ama bikpitiŋaliibi yimbiiku làá pítí ní.

¹²Yàntī a-yindi bɔti ń nīn páb́-si, di sá yii a-kpátam boonee, di làá nīn bí kí yúntí kí jītíǹ asindaariyakpuku kutuku pu.

¹³Nnaam kaa yúntí, ama diyimmɔntiil díǹ bí ní ki cá jaanjaan. Ba di máaǹ kí kɔ́ǹ unil icoo?

¹⁴Mbiyaamu, nín̄ ŋúb́maan m-dàkatam tiŋan. Dinyil din bál̀ee nì tigaajati tin baa wāĺee kèetī tilati poon?

¹⁵Unil un bāal̀ u-gbaandee sɔ́ǹ un bāal̀ u-ciiŋyee.

¹⁶An puee m làá tùkù-ni tin di máaǹ kí nīn cáá-ni icooyee. Di sá yii an kaa ŋān̄ unil ń nīn pée bí icoon. Kí kūtèe báà ŋma kaa kpèé ki wāĺ tiwan mbaantiimin.

¹⁷Á nīn cáá icoo kí dòon̄ nì unimpu a-baa nì a-na nimbiin. Ubɔti nì unikpaan nimbiinee, án nīn cáá-si icoo á mɔ̄ntì.

¹⁸Ubɔsoonli nimbiinee, án nīn cáá-si icoo á ŋá tikpitil. Unimbɔti nibul nimbiinee, án nīn cáá-si icoo á yìntīǹ Unimbɔti Marau. A-bɔɔ nì a-ŋeenaatɔ nimbiinee, án nīn cáá-si icoo á ŋá tin kaa ŋān̄ee.

¹⁹A-kɔŋkɔnnaatɔb nimbiinee, án nīn cáá-si icoo á yɔ̀. Án nīn cáá-si icoo yii a nín pūtì ki pōoǹ kí ŋá puee, aa ŋá míǹ. Án nīn cáá-si icoo yii a dū a-ŋaŋkpancɔ ki nyīī teebil pu ki jīǹ tijin, àá a kpēē ki sīŋkiǹ tin bi tīī-see àá tin a tīī ubɔee.

²⁰Án nīn cáá-si icoo yii bi jáam̀-si aa kíí, àá a yú ki kpèé kinimpulaakpaai.

²¹Án nīn cáá-si icoo yii a gbáfì a-nabiki kaa pílifiǹ-kì, àá a fìkī unil wanti àá tin bi pú-uee. Án nīn cáá-si icoo yii a kpēē ubɔ nimpuu,

²²àá a mɔ̄nnì a-tɔntɔnliu unimpu, àá a sútì ki pìl̄ u-lambaŋki. Án nīn cáá-si icoo yii a sīī a-bɔɔbi, àá a pú-bi tiba ki pɔ́ntì-bi.