Read Ntcham Siracide 42 Bible Online

Siracide 42 - Ntcham bible

Siracide 42

¹Icoo ń nīn cáá-si yii a tùkū mbɔmbɔtuku ki bīitì a-nabiki bɔɔŋŋi pu. Niin ní a làá béé kun di sá icoo tiŋman pu yayee, ní báà ŋma ń tīī-si mmɔ́ɔn. Tibɔti tin kaa máaǹ kí nīn cáá-si icooyee Taa nín̄ cáá tin m làá sòoǹ nì si nee pu icoo, kí taa ká nnaakpal kí ŋá ikpiti.

²Án taa nín̄ cáá-si icoo á nīn tɔ́ Yilpu fɔ́ŋŋŋ Nimbɔtiu Marau nì u-Poondi, àá kí pɔ̀ unikpiti u-bɔti yaa ŋān̄.

³Án taa nín̄ cáá-si icoo á gbá a-bɔɔ àá si nì un bí ki còom̄ nsanee akɔntaa, àá kí yàkatī a-fakal kí tīī bin kíǹee.

⁴Án taa nín̄ cáá-si icoo á nīn cáá saniya nì tikúŋmantikaal tin bí deedeeyee, àá kí ká ipaati fiii àá tikpil,

⁵àá á nyāfì tiwan kí ká ipaati. Án taa nín̄ cáá-si icoo á nīn dátí a-biyaamu tafal múlmul, àá kí lùfì utɔntɔŋkpiti kiŋkinti mbambaan áli fatiku ń tin nyā.

⁶A yaa cáá unimpu un là kí nīn wāĺ tikɔkɔee, an ŋān̄ yii á nīn pìintí a-wanti pu. A yaa cáá binib tikpil bin pu aa mákée, an ŋān̄ yii á nīn pìintí ki kpàl̀ a-wanti pu.

⁷A yaa làá síiń unil cee animbilee, á kàaǹ-ŋi ní kí ŋmàntī-ŋi. Á ŋmà tin kamaa a tììyee nì tin bi tìì-see ki sīintí.

⁸Án taa nín̄ cáá-si icoo á kpòotī ujɔti nì ugbaan àá utikpil un ŋá tilaakpaal bi cúú-uee. Án di làá dàkà yii a lafun fōō didàkamɔntiil, ní báà ŋma làá tīī-si mmɔ́ɔn. Ubaati landɔkɔi in u cáá u-bisal puee

⁹Usapɔɔn tìì u-baa ilandɔkɔ tikpil, báà u yaa kaa nyí míǹ. U nín dàkafī u-bisal pu miŋyee kaa yàntī u gèeǹ. Di sá yii u-bisal yaa láá pɔ̀ɔǹee, u dàkafī yii án taa ŋée ú wíiǹ kí càatī dicamɔndi pu. U yaa tí mɔ́ǹ muee, ní u fàŋkí yii án taa ŋée u-cal ń taa ti nín̄ là-u.

¹⁰U yaa kaa láá béè uninjee, ní u-baa fàŋkí yii uninja ubɔ ń taa ŋá kí dòon̄ nì u mpɔn ú nīn kā úǹ u-ba cindin kí cáá dipool. U yaa mɔ́ǹ, u ŋūǹ kí taa yūĺ nì u-cal deedee. U yaa tí gbíntì ki kā u-dumpu, an ŋūǹ yii ú kpántí uŋmaŋŋmanti.

¹¹A-bisal yaa kaa ŋūǹ kí cúú u-bee, á mɔ̀tīí nīn cɔ́ŋkí-u tiŋan. An yaa sá fám u làá yàntī a-nannanliibi ń lā-si. Kitiŋin nib làá nīn sòoǹ an pu ní samaa yaa kóoǹ ki kpáfì laakiŋyee, tíǹ ní bi làá nīn sòoǹ. Niinee ní ú kɔ́ǹ-si icoon dikpafikpaandi poon.

¹²Taa dū a-nimbikpeeŋu kí báań báà unil nyaaŋku pu, kí taa nín̄ kàal̀ binimpoobi kansikin.

¹³Tiwampeeŋkaal poon ní mpɔkɔfimu nyēē, míǹ ní ntoom mun nyēē unimpun.

¹⁴Uninja toom sɔ́ǹ unimpu ŋanti. Unimpu di kɔ̄ntí u-cal icoo kí yàntī binib ń kpèè kí sɔ́kɔ́-u. Unáanli kpaanti

¹⁵Kɔŋkɔnnee m làá téetí tin ti-Dindaan ŋée kɔkɔ pu, m làá māafì tin m kée. Ti-Dindaan sòon̄ anyɔɔbun ní ki ŋá tikɔkɔ. Tin kɔkɔ u náańee ŋáań u nín là puee ní.

¹⁶Ŋwìiń ŋun ŋmíntí nee kpèé tikɔkɔ ní, ti-Dindaan nyooti gbí tin kɔkɔ u ŋée poon ní.

¹⁷Ki kpáaǹ ti-Dindaan circir tuuŋyi kaa ŋūǹ kí māafì maamaaci tuuŋŋi kɔkɔ, ŋin ní ti-Dindaan Mpɔŋkɔdaan ŋá ki síiǹ, duulinya ń mɔ̀tīí báań inyaan u-nimbiin kí nīn cáá tinyoolee.

¹⁸U kpèé tiŋku nì unil pɔbil poon ki wāĺ tin kɔkɔ bál̀ poonee. Di sá yii Yilpu Fɔ́ŋŋŋ Nimbɔtiu nyí tikɔkɔ, ní ki kpèé ki kpáaǹ iyunti daanti kɔkɔ.

¹⁹Úǹ di sòoǹ tin jítèe nì tin bí ki dòońee, ní ki lèekī tiwan tin bál̀ee taapu ki dàkà[232].

²⁰Nlandɔkɔ báà ŋubɔ kaa bí yii waa nyí-ŋu dinyɔɔbundi diba kpá ki bál̀ u-cee[233].

²¹Atuŋkpaan ŋin ti-Dindaan bɔ́ntì u-ciiŋyi poonee, ŋáań ki dī u nín bɔ́ntì puee ní. U pée sá ubaanti ní ki yōoǹ talku kí nīn cá talku. U-tuuŋŋi kɔkɔ poonee, tiba kaa bí bí gbéeǹ àá bí bàtī ní waa nyàab̀ ubɔ ń sāŋkì-u.

²²Tin kɔkɔ ti-Dindaan ŋée mɔ̄ dikpeel, ki kpáaǹ kiŋmiyatiyaalii kin ní unil ŋūǹ kí wāl̀ee.

²³Tíǹ kɔkɔ nee bí kí nīn cá jaanjaan ní, ki cí kí ŋá tin an yaa bàlifī tí ŋée.

²⁴Tin kɔkɔ ní Unimbɔti náańee nóó tɔb tili tili ní, ní waa pée náań tiba tíǹ kaa ŋān̄[234].

²⁵Tiwan kɔkɔ dàkà tin kíǹee dapɔɔku ní. Ŋma di ŋūǹ kí lì yii u kpēē ti-Dindaan nyooti ki gīī?