Read Ntcham Siracide 43 Bible Online

Siracide 43 - Ntcham bible

Siracide 43

¹Kutagbɔŋu nì ŋwìiń Kpèèmaan kutagbɔŋu kun dàn̄ yilpu nee nín ŋān̄ ki wāĺ kílkil puee[235]! Kpèè u-nyaaŋku nín mɔ̄ nnimbikpee puee!

²Ŋwìiń yaa gbīitìń kí nyēe, ŋu sòoǹ Yilpu fɔ́ŋŋŋ Nimbɔtiu tuuŋŋi nín mɔ̄ dikpeel puee ní.

³Kuwiŋkaŋu puee ŋu yàntī kitiŋ ń kpā ní. Ŋma di ŋūǹ kí yūĺ ŋu-tuntuŋku poon?

⁴Ucaa pàá u-ŋmiŋu kí tɔ̄ u-tundi ní. Ama ŋwìiń ŋun gbáà ajoonee tùm̀ ki jítiǹ míǹ ŋfunyɔm mita pu ní. Ŋu tūǹní ŋu-tuntuŋku ki tòoń ŋu-wintaabiliŋ, ki yàntī unil kaa ti wāĺ.

⁵Ti-Dindaan un di náań-ŋuee sá ukpaaneeee! U kpòotī-ŋu ní ŋu còom̄ ŋu-saŋkindi[236]. Uŋmal

⁶Uŋmal mun kuluku yaa pée gbáńee, see ú nyā. U dàkà iyunti ní ki sá kudaaŋŋu kí nīn cá jaanjaan.

⁷Uŋmal di dàkà jiŋaal yuntiŋu, úǹ un bàtī fiii fiii áli kí dāá wāŋkì kɔkɔee.

⁸Úǹ pu ní bi dì kí pɔ̄ uŋmal kamaa diyindi. Ŋu yaa fātìi nyáń ki bíi gbìfintée, an cáá kunyaaŋŋu ní! Úǹ di sá iŋmalbi kitil in bí yilpu ki ŋmíntée walifiŋu. Iŋmalbijaa

⁹Iŋmalbijaa walifiŋu di yì kutagbɔŋu nyaaŋku, i-walfiŋu di nyɔ̀kɔntī yilpu ti-Dindaan cee.

¹⁰Ti-Dindaan un bí circiree yaa tīī maree, i cá ní kí yūĺ laakin u síiǹ-iee. Ubɔ kaa féeń mpaan ŋun u yúee. Dikuntinyindi

¹¹Kpèè dikuntinyindi ní kí jāam̀ un di náań-dèe. Dì yaa nyáń ki làl̄, dì cáá kunyaaŋŋu an kaa cáá bí lì.

¹²Dì lùtī kulaguŋu kun cáá tinyoolee kutagbɔŋu pu. Un píĺ butɔbu gbantee di sá Yilpu Fɔ́ŋŋŋ Nimbɔtiu.

¹³Ti-Dindaan tìì mara ní ntaayim nyēeń kutaa pu ki lítí, u tūǹ itaaŋmɔŋmɔ ní i cá ki ŋáań tin u lēe.

¹⁴Míǹ ní u pìitī laakin u kpáafì atagbanee ní ŋíǹ ń nyā ki ŋàaǹ kii inoonee.

¹⁵Ti-Dindaan pɔŋŋu yàntī atagban ń pɔ̄ɔkì, ní kí cúú wìil̀ wìil̀ kí kpántí ataanyiŋkumbil.

¹⁶U-taadundi yàntī kitiŋ cìŋkī.

¹⁷Ti-Dindaan yaa páaǹnée, ajoon cìŋkī ní. U yaa lèe ní ú yàntī ŋgiil pú buŋku,

¹⁸àá ŋgan pú buŋkpaaŋku àá kunaakpaabuŋŋu ń jītí[237]. Kii unoon nín ŋàaǹ ki sìntīń puee, míǹ ní u yàntī ntaayim lítí. Mì lítiń kii inaakitoon nín kpákatiń kitiŋ pu puee ní[238].

¹⁹Mì nín pīiǹ puee nyaaŋku mɔ̄ nnimbikpee, ní mì yaa bíi lítée, an mɔ́ɔkíǹ unil pɔbil.

²⁰Unimbɔti dù ntaanyiŋkumbilimu ní kí yàaǹ kitiŋ pu kii ŋyaamee, ní nsɔnsɔm ń yàntī mú kpántí kii ŋkuŋkumbiyaamuee[239].

²¹Ŋgan pú buŋku kun sɔ̀m̀ee yaa bíi jītée ní nnyim ń dūú jìlifì kí pɔ̄ɔkì. Kubuŋu gbanti jītí nnyimee nín dɔ̄ puee ní nnyimee yilpu ń dūú kìl̄ kí pɔ̄ɔkì kii digbampɔɔlee.

²²Ku wù ajoon, ki wù kuteeu ní ki wù kumɔsɔŋu kii ŋŋmee.

²³Ama atagban sɔŋfiŋu di cāabìń nnyɔkɔ malaa, ní kutuntuŋkpaaŋŋu boonee, dimalindi ń cáań dipɔɔsɔŋkil.

²⁴Unimbɔti nín là puee di sá u cúú tiŋku pɔŋŋu, ní ki cóoǹ u-ni ntimu mun nnyim māntìi túee[240].

²⁵Bin kóò meelab ki còom̄ tiŋku puee máafí dinimbinaamandi din bí u-puee. Tibɔti tin bi máafée ŋáań-ti bitii[241].

²⁶Tiŋkun ní a kāntí maamaaci nì atulim wanti, nì tiwan tin pée cáá kufoouee kɔkɔ nì ti-bulifi, nì tiwambilindi tin kóò nnyiminee kɔkɔ[242].

²⁷Unimbɔti pu ní tin kɔkɔ u tūnnèe bà ti-laŋki, tikɔkɔ bɔ́ntí ki nóó nì u-nyɔɔbundi[243].

²⁸Ti bàà ŋūǹ kí nīn nìkì ki sòoǹ ki cá, ama taa làá ŋmā kí sòoǹ kí dóó tikɔkɔ. Tin ti làá dūú kúntí ti-bɔtee di sá yii tikɔkɔwoooo nyánní ti-Dindaan cee ní.

²⁹La ní unil nín kāntí mpɔn kí nyɔ̄ŋkì-u? Di sá yii úǹ di sá Ukpaan, u jítiǹ tin kɔkɔ u náańee.

³⁰Ti-Dindaan sá kuwambiiu ní ki sá ukpaan ki jítiǹ tikɔkɔ. U-pɔŋŋu sá maamaaci pɔŋŋu ní.

³¹Ni yaa làá nyɔ̄ŋkì ti-Dindaanee, ní sòoǹ u-kpaanti pu kii ni nín ŋūǹ puee. Ama u làá nīn sá ukpaan ki jítiǹ min ni làá lèe. Ní dū ni-pɔŋŋu kɔkɔ kí gāā ilan kí yòon̄ u-yindi yilpu. Ní taa gīī, di sá yii ni pée kpá kí nyɔ̄ŋkì-u kí dóó.

³²Ŋma di ká Unimbɔti kí ŋmā kí lì u nín bí puee? Ŋma di ŋūǹ kí nyɔ̄ŋkì-u kii án nín máaǹ puee[244]?

³³U-tuŋkpaaŋŋi tikpil gíti bí ki jítiǹ ŋin bí nee, di sá yii u-tuuŋŋi ŋwaam pu ní ti wāĺ nee[245].

³⁴Ti-Dindaan di náań tikɔkɔ, ní ki dū iciin ki tīī bin yú nì u deedeeyee.