Read Ntcham Siracide 44 Bible Online

Siracide 44 - Ntcham bible

Siracide 44

¹Kɔŋkɔnnee tí nyɔ̄ŋkìmaan binib bin nìn nyáń diyindee, ti-naanjab kí nóó nì bi nín dī dī tɔb pu ki kāl̀ kitiŋ puee.

²Ti-Dindaan dàkā u-kpaanti ki tīī-bi tinyookpaandi doooo cannaaku. Binikpaambi bin kāl̀ kitiŋ puee

³Bibɔtiibi nìn nyáń ki kpōotì bi-beeŋi, ki dàkā bi-pɔŋŋu binib béè bi-pu. Bisaŋkiliibi mun nìn nyáń ki cáá dinyil ní Unimbɔti bɔnaatiliibi mun nìn bí.

⁴Biba nìn sá bikpilib ki sáŋkí dinibul, ní biba mun nìn sá abɔtibil ki nìn cáá dinyil tikpil. Bi nìn cáá iciin nyɔɔbuŋŋi ki dàkà dinibul.

⁵Biba nìn sá bin nāantí ilan ní ki ŋmà tibɔti bi cáa gà ilanee.

⁶Biba nìn sá bigaajab, ki nìn cáá mpɔn ní ki nìn bí ŋgbansɔŋfin bi-dumpui.

⁷Binib gbanti kɔkɔee yuntiŋu yab nìn tīī-bi tinyool, ní ki nìn yōoǹ bi-yindi yilpu ŋyunti ŋun bi nìn bí dimaŋfalinee.

⁸Bi dáá gbíntìi téetí bi-kansikin biba yiŋŋi pu, ki gà ilan ki nyɔ́ŋkí-bi.

⁹Bi-kansikin biba mun bí baa ti pée téetí bi-pu. Baa ti gbìl̀ bi-pu, a lì kii baa nìn pée kāl̀ kitiŋ pu ki kée, a lì kii binib bin baa màl̄ ki kée. Míǹ ní an sá ki tīī bi-biyaamu mun páaǹ bi-boonee. Isirayeel yab naanjab

¹⁰Ama binib nee di sá bin nìn ŋá tiŋanee, binib bin tunnyaaŋŋi pu baa súntèe.

¹¹Bi dū bi-tunnyaaŋŋi ki tīī bi-biyaamu, ní bi-biyaamu biyaamu fōō bi-fakal.

¹²Bi-biyaamu yúl̀ nì dipoondi deedee, bi-pu ní bi-naantiibi gbíntìi bí nee.

¹³Bi-naantiibi làá nīn bí kí nīn cá jaanjaan, bi-nyooti kpá kí wāŋkì dalba dalba.

¹⁴Bi síb́ bi-wunti ŋgbansɔŋfin, ní bi-yindi bí kí nīn cá abin abin.

¹⁵Atimbun làá dāá māafì bi-ciiŋyi bɔti, ní samaa ń dāá nīn gà ilan ki nyɔ́ŋkí-bi. Eenɔki

¹⁶Eenɔki bɔti nìn fáatiǹ ti-Dindaan ní úǹ nìn yōoǹ-u ki cūnnì u-cee. Kí nīn cá abin abinee, u tīī dibakpántil ŋabikau[246]. Noowa

¹⁷Noowa nìn sá deedeedaan tiŋman pu yɔu ní. Unimbɔti ŋuul yuntiŋuee, úǹ di nìn fōō inibool kɔkɔ yil. U-pu ní nnyiŋgbeen boonee, binib dáá gbíntìi bí kitiŋ pu.

¹⁸Unimbɔti nìn pōoǹ-u dipoondi din làá nīn bí ki cée, yii waa làá ti yàntī nnyiŋgbeen ń kúntí tin cáá kufoouee[247]. Abraam

¹⁹Abraam di nìn sá atimbun kupaau naanja. Báà uniseen kaa ká tinyool ki bàn̄-u dalba dalba[248].

²⁰U nìn tɔ́ Yilpu Fɔ́ŋŋŋ Nimbɔtiu Marau, ní u nì u nìn ŋá mpèé. U nìn dū mpèé gbanti daaŋku ki ŋá u-wunti pu, ki gíí-u dikpancandi. Unimbɔti nìn mākaǹ-u ki ká yii u sá deedeedaan[249].

²¹An pu ní Unimbɔti nìn pūtì ki pōoǹ-u yii u-naantiibi pu ní atimbun kɔkɔ làá ká dibiindi. Yii u làá yàntī u-naantiibi ń bùtī kii kitiŋ pu bulee, kí yòon̄-bi yilpu kii iŋmalbijaayee. Bi-tinjandi làá dāá kíĺ Ŋyaam mɔɔl kí tin cáá sāā Meediiteeranee tiŋkuu, kí dāá yòon̄ Eefiraati mɔɔl kí tin cáá sāā kitiŋgbeennyɔkɔ[250]. Isaaki

²²Ti-Dindaan nìn pōoǹ Isaaki dipoombaantiil, u-baa Abraam pu. Jaakɔb Míǹ boonee ní u lēē Jaakɔb

²³ú fōō u-poondi nì u-biindi inifunaan kɔkɔ yil pu. Ti-Dindaan nìn nyīī diŋambil yii u làá bìin̄ u-pu, ní ki dū kitiŋee ki tīī-u, ní u cúu yākatì atinjan ki tīī tinaakɔti saalaa nì tilee[251]. Mooyiisi

²⁴Jaakɔb naantiibi kansikin ní ti-Dindaan nìn lēē unimɔnti ubɔ, udaan bɔti nìn fáatì samaa kɔkɔ.