Read Ntcham Siracide 45 Bible Online

Siracide 45 - Ntcham bible

Siracide 45

¹Unimbɔti nìn néeń-u ní binib mun nìn néeń-u. Unil gbanti di sá Mooyiisi. Ti yaa téetì u-puee, ti jáaḿ Unimbɔti ní.

²Ti-Dindaan nìn tīī-u ituun nyooti juti ní. U nìn yāntì u cáá mpɔn ki nìn kɔ̄ntí binannanliibi dinyoondi[252].

³U nìn sòoǹ ní Unimbɔti yàntī maamaaci tuŋkpaaŋŋi ŋáań, ki nìn yāntì u ká tinyool bibɔtiibi nimbiin. Ti-Dindaan nìn tīī-u u-marab u cáa tīī u-nibul, ní ki nìn lēē u-nyooti fiii[253] ki dàkā-u.

⁴Mooyiisi nìn yú nì Unimbɔti deedee ní ki nìn mɔ̄. An pu ní Unimbɔti nìn gāntì-u ki yóoǹ u-ba, ki nìn lēē-u inifunaan kɔkɔ kansikin[254].

⁵U nìn yāntì Mooyiisi gbìl̄ u-neel ní ki nìn kɔ́ǹ-u ditagbambɔndi poon. Bi nìn yú ki túĺ tɔb ní u dū marab ki ŋúbiǹ-u, marab bin tìì dimaŋfal nì dinyilee. Ti-Dindaan nìn dàkā Jaakɔb naantiibi dipoondi bɔti, ki dàkā Isirayeel yab u-bɔkpaaŋi[255]. Aarɔn

⁶Unimbɔti nìn yōoǹ Aarɔn mun yilpu. U mun nìn sá circir niliu kii Mooyiisee ní, ki nìn sá Mooyiisi maan, ki nìn nyánní Leefii naakookun.

⁷Unimbɔti nìn pōoǹ-u dipoondi din làá nīn bí ki cá jaanjaanee. U nìn dū disaraaŋal tundi ki ŋúbiǹ-u. Ti-Dindaan nìn tīī-u dipɔɔpindi ki nìn yāntì u pèentí circir wampeeŋkaati tinyaandi, ní ki nìn dū tinyool bɔkutifɔkɔl ki pēeǹ-u.

⁸U nìn pēeǹ-u tiwampeeŋkaal timɔmmɔntiil, ní ki nìn kítì-u tidaandi tin dàkà u-pɔŋŋuee, an dàkà yii kicukutigiŋ nì dibɔkutifɔkɔl nì eefoodi.

⁹Bi nìn ŋáĺ greenaadi subiliŋ ki nyɔ̄kɔntì dibɔkutifɔkɔlee taapu, nì sindaariya waŋkilimmu tikpil. U yaa còom̄ee mu gbáà tɔb, ní bi nìn gbìl̀ mu-siim pu kunimbɔtidiin ní ki nìn téetí ti-Dindaan nibul u-bítam pu.

¹⁰Unimbɔti nìn tí pēeǹ Aarɔn circir bɔkutifɔkɔl din biwanluliibi nìn dū gulfab bin cáá sindaariya nyimee, nì bin máǹ gùŋgumee, nì bin máǹ cínciŋee ki lùn̄ee. U nìn gíti pēē dibalifil lɔbiki kin poon ní Uriim nì Tumiim kēe.

¹¹Uwanlul nìn dū gulfaman ní ki lùn̄ kilɔbiki gbanti, ní bi dū ataŋkpanyaan ki nyɔ̄kɔntì. Ataŋkpee gbanti puee, bi nìn cáká Isirayeel naakɔti saalaa nì tilee kii bi nín cákà kijalii kin bi cáa nyìitī tiwan puee Unimbɔti ń nīn téetí ti-pu. Utɔntɔnli nìn dū sindaariya ki mɔ́ɔ́ tifukuŋkaal ní bi dū ataŋkpeeyee ki fúuń.

¹²Sindaariya kpáakaati nìn náká ŋŋaabu ŋun nìn fìn̄ Aarɔn yilee pu. Bi nìn cáká tikpáakaalee pu yii: «Un bi dūu sú ti-Dindaanee». An nìn sá tinyool daaŋku kun bi nìn mɔ́ɔ́ tiŋan puee, ki nìn mɔ̄ nnimbikpee ní bi nìn nyáantì-ku tiŋanee[256].

¹³Kí dāá sāā Aarɔn yuntiŋuee, tiwampeeŋkaal tiba kaa nìn bí ki ŋān̄ ki bàn̄ u-yati gbanti. Unifantanti ubɔ kaa nìn pēeǹ tiwan gbanti ki ká, see u-jipɔmbi nì bi-naantiibi di cáá nsan kí nīn pèentí-tì kí nīn cáa cá jaanjaan.

¹⁴Saraabi bin Aarɔn nìn ŋáań mili pu ŋwiin, kí nīn cáa cá jaanjaanee nìn máaǹ kí wà kɔkɔ ní múb[257].

¹⁵Mooyiisi di nìn kāaǹ-u disaraaŋal tundin, ki nìn bātì circir kpam ki sītì u-yil pu. An nìn sá-u dipoondi din làá nīn bí kí nīn cá jaanjaanee, ki kpáaǹ u-naantiibi. Iwiin in kɔkɔ kutagbɔŋu kun dàn̄ kutaa pu nee làá nīn bée, dipoondi gbanti mun máaǹ kí nīn bí ní. Bi-tundi di sá yii bí nīn sá ti-Dindaan saraaŋaliibi ní kí nīn bìintí u-nibul u-yindi pu[258].

¹⁶Ti-Dindaan nìn lēē-u binifoobi kɔkɔ kansikin ú nīn ŋáań saraabi ki tìì-u, kí nīn tùutī talaalutuukaa nì diteetil talaaluu án nīn sá kudaaŋŋu, ní kí ŋá akoobil nín sá puee dinibul ń ká di-kpitii pɔ̄tam[259].

¹⁷U nìn tīī Aarɔn ŋŋmam ú lēē marab taapu kí dàkà Isirayeel yab u-lammi, ní kí dū u-marab kí ŋmíntí u-nibul[260].

¹⁸Kuteeunee, bin kaa nìn sá u-dicaŋkun yabee nìn ŋá-u ipoompoon. Bi nìn gíí u-pu diŋuul ŋkpitim pu ní ki yíkì ki jáń nì u. Bíǹ di nìn sá Datan nì Abiiram nì bi-naacimbi, ki kpáaǹ Kooree nikitil yab.

¹⁹Ti-Dindaan nín ká mimmee, an kaa nìn mɔ́ɔkiǹ-u. U nìn fōō bi-pu diŋuukpaandi, ní bi-puee, u nìn ŋáaǹ maamaaci tuŋkpaaŋŋi: Circir ŋmilimbiliŋ nìn wùn̄-bi ki nāaǹ-bi[261].

²⁰Ti-Dindaan nìn gíti tīī Aarɔn diyimɔɔl diba mun: u nìn dū tikpaajin ticɔfikaal ki tīī u nì u-biyaamu án nīn sá-bi difakal. An dàkà yii u nìn tīī-bi tijikaal bí nīn jīǹ ki díkì[262].

²¹Di sá yii tijin tin bi nìn cāabìń ki ŋáań ti-Dindaan saraayee ní bisaraaŋaliibi nìn jīǹ. Ti-Dindaan di nìn dū-tì ki tīī Aarɔn nì u-naantiibi.

²²Ama waa nìn fōō ditinjandi difakal Isirayeel nibul kansikin. Baa nìn fōō ditinjandi difakal kii Isirayeel nibul din kíǹee, di sá yii ti-Dindaan nìn tùkū-u yii: «Mama m-ba di sá a-tinjandi nì a-gaajati[263]». Piinaasi

²³Eeleeyasaar jipɔɔn Piinaasi sá unitataati un nìn nyáń diyindee. Di sá u nìn cáá difaŋgiil kí mɔ̄tì ti-Dindaan nyooti pu. U nìn ká dipɔbil ki nìn jáń nì dinibul din nìn yíkì ki jáà nì ti-Dindaanee, ní ki nìn yāntì ti-Dindaan dū Isirayeel yab kpitii ki pú-bi.

²⁴An pu ní ti-Dindaan nìn pōoǹ-u ŋgbansɔŋfi poondi, ki nìn lēē-u yii ú nīn sá circir kɔŋkooŋŋu nì u-nibul kpiliu. Míǹ ní ti-Dindaan nìn dū usaraaŋakpil tundi ki tīī u nì u-naantiibi kí nīn pée cáa cá jaanjaan.

²⁵Ti-Dindaan nìn pōoǹ Daafiidi, Jeesee un nìn sá Juuda naakookunee jipɔɔn mun dipoondi. U nìn pōoǹ-u yii ubɔti yaa kpíìyee, u-jipɔɔn ubɔ di máaǹ kí fōō u-yil kí jī dibeel, ama án nīn sá u-jipɔɔn ubɔbɔ ní. Ama Aarɔn úǹ fakal sá ki tīī u-naantiibi kɔkɔ ní[264].

²⁶Nimbi Aarɔn dicaŋkun yab, m mèé ti-Dindaan yii ú tīī-ni iciin. Niinee, ni làá dū ibaamɔn kí sòoǹ u-nibul bɔti, ní kí nīn bí ki cée, tinyool nì jilma bin ni cáá nee ń taa nyā ni-ŋalin dalba dalba.