Read Ntcham Siracide 46 Bible Online

Siracide 46 - Ntcham bible

Siracide 46

¹Joosuwa nì Kaleeb Nuuni jipɔɔn Joosuwa nìn sá ubaatandaan ní. Úǹ di nìn fōō Mooyiisi yil ki kpántì Unimbɔti bɔnaatiliu. U nìn fōō Mooyiisi yindi. Di sá yii ti-Dindaan nìn yāntì u kpántì dinibul din u lēēyee fiiliu. U nìn jáń ki pɔ́ɔkiǹ binannanliibi bin nìn yíkí ki jáà nì uee, ní ki yāntì Isirayeel nibul fōō di-tiŋki[265].

²U nìn nyáń diyindi ŋyunti ŋun u nìn dúkutì u-ŋal ki fɔ́fì u-tàataajiki kí jáǹ ntimuee[266].

³Ŋma di nìn péeǹ Joosuwa ki dàkā dibaatandi? Úǹ di nìn līī nyɔkɔpu ki jáà ti-Dindaan jaaku[267].

⁴Úǹ di nìn tīī mara ní ŋwìiń yúl̀, ní ŋwimbaanti dūu fɔ̄kɔǹ kii ilee?

⁵Ŋyunti ŋun binannanliibi nìn māntìi gíb́-uee, u nìn kúuǹ ki yíiń Yilpu Fɔ́ŋŋŋ Nimbɔtiu, Mpɔŋkɔdaan, ní ti-Dindaan un sá Ukpaanee kíiń-u. U nìn yāntì ataanyiŋkumbil nìn lítì nì mpɔŋkpaan.

⁶U nìn páatìi jéetì binannanliibi janjakitil pu, ki kūū u-nannanliibi bin nìn bíi sáń ki wúntí dijoolee. Tiŋman, an nìn bālifì yii atimbun ŋin nìn bíi jáà nì ti-Dindaanee ń béé u-janjawanti kɔkɔ, di sá yii Joosuwa nìn nóó Mpɔŋkɔdaan marab ní[268].

⁷Doooo Mooyiisi yuntiŋu ní Joosuwa dàkā yii u yú nì Unimbɔti deedee, u nì Yeefunee jipɔɔn Kaleeb. Bi-liitil nìn kpákáǹ samaa kɔkɔ, ki nìn pīiǹ nsan dinibul ń taa ŋá ikpiti, ní ki nìn yāntì binib bin nìn bíi gbùkum̄ee ŋmíl̀.

⁸Bijanjaliibi bin còom̄ ataa puee kutukub biluu kansikinee, bíǹ liitil ja di nìn ŋmátì. Bi nìn ŋúń ki cáá ti-Dindaan nibul ki kɔ́ǹ kitiŋ kin bi làá nìn fōō kí nīn yèe poon, kitiŋ kin poon ní nnaabiim nì tisiil còol̀ee[269].

⁹Ti-Dindaan nìn tīī Kaleeb mpɔŋkpaan. Ki kpáaǹ gba u-puti poonee, u nìn ŋúń ki jáń ki fōō ajoon pu timmu mun dāa dūu kpántì u-naantiibi fakalee[270].

¹⁰Míǹ ní Isirayeel yab kɔkɔ béè yii an ŋān̄ unil ń nīn nóó ti-Dindaan. Bibɔsoonliibi

¹¹Tí téetímaan bibɔsoonliibi mun pu[271]. Báà ŋma nì u nín ŋá pu ki nyáń diyindee. Baa nìn fātì bi-boon ki tīī ti-Dindaan ki cūtìi bíi tòotī awaa. Tí téetí bi-pu kí jāam̀ ti-Dindaan.

¹²Bi-kpabiŋ dáá gbíntìi dɔ̄ bi-kaakuliŋin. Ti-Dindaan ń yàntī bin làá nóó bi-tabɔbiliŋee ń nyā kí páań bi-boon. Bi-jipɔmbi ń yàntī bí fàtīí nyā diyindi. Samiyeel

¹³Ti-Dindaan nìn néeń Samiyeel. U nìn sá u-bɔnaatiliu ní ki nìn náań dibeel. U nìn bātì ŋkpam ki sītì bikpilib yiliŋ pu ki nìn kāaǹ-bi bí nīn kpòotī u-nibul[272].

¹⁴U nìn sòon̄ samaa bɔti ki nóó nì ti-Dindaan marau, ní ti-Dindaan nìn bīiǹ Jaakɔb naantiibi boon.

¹⁵U nín nìn sí deedee nì Unimbɔti puee di nìn dàkà yii u nìn lafun sá Unimbɔti bɔnaatiliu. Tibɔti tin u nìn nàatēe di nìn yāntì binib nìn béè yii u nìn sá unil un wāĺee tiŋman pu[273].

¹⁶Ŋyunti ŋun binannanliibi nìn māntìi gíb́-uee, u nìn kúuǹ ki yíiń ti-Dindaan Mpɔŋkɔdaan ní ki nìn dū dipibipɔmbil ki ŋá-u saraa.

¹⁷Ti-Dindaan nìn yāntì utaa fáá didundi kutagbɔŋu pu, ní ki yāntì bi gbìl̄ u-neel pu dibintiŋkpaandin.

¹⁸U nìn kúntì Tiir yab kpilib nì Fiiliistii yab yidambi kɔkɔ[274].

¹⁹Kí wàatī ú dòon̄ u-ŋaliŋu puee, u nìn lēē seera ti-Dindaan nì ubɔti nimbiin yii: «Maa fìkī ubɔ wanti ki ká, báà anaataka kpaŋkpan gba». Ubɔ kaa nìn ŋúń ki ká tiba ki kɔ́kɔl̀-u[275].

²⁰Báà u-kúm boonee gba, un nìn nāatì Unimbɔti bɔti ki tùkū ubɔti min ní u làá dāá kúntée. U nìn sòon̄ní doooo kitiŋ taapu taapu, ki nìn nāatì Unimbɔti bɔti kí pítí u-nibul kpitii[276].