Read Ntcham Siracide 47 Bible Online

Siracide 47 - Ntcham bible

Siracide 47

¹Unimbɔti bɔnaatiliu Natan nì ubɔti Daafiidi Samiyeel boonee, Naatan di nìn kpántì Unimbɔti bɔnaatiliu Daafiidi yuntiŋu[277].

²Kii bi nín lèekī mpèé saraau kpam puee, míǹ ní Unimbɔti nìn lēē Daafiidi mun Isirayeel yab kansikin[278].

³Kí cúú gbikintibee nìn sá u-cee kii bi nín cútí ŋŋɔbiyaamu puee ní, ní kí cúú agbiŋgbilee nìn sá u-cee kii bi nín cútí mpibiyaamu puee[279].

⁴U-naacimpɔnti poonee, úǹ di nìn kūū kujawɔkɔu, ní ki nìn nyántì Isirayeel nibul icoon. U nìn dū u-jaataafuŋku ki tɔ́ ditaŋkpal ki yá Gooliyaati un nìn gbí dilambilee ki kūū-u[280].

⁵Di sá yii u nìn kúuǹ ki yíiń ti-Dindaan Yilpu Fɔ́ŋŋŋ Nimbɔtiu. Úǹ nìn dū mpɔn ki ŋá u-ŋaŋgiilin ú ŋmā kí kpɔ̀ ujanjakpaan gbanti, ní kí lēē u-nibul pɔŋŋu kí dàkà.

⁶An pu ní bi nìn tīī-u tinyool kii u nìn kūū binib kutukub saalaayee. Bi nìn gāā ilan ki nyɔ́ŋkì-u ki jáam̀ ti-Dindaan ní ki nìn dū tinyool beefuuliiki ki cíkiǹ-u[281].

⁷Di sá yii u nìn kūū ki céetì binannanliibi bin nìn māntìi tú-bee. U nìn kúntì u-pulincɔntiibi Fiiliistii yab, ní ki nāaǹ bi-pɔŋŋu ki dāa sāā díǹ.

⁸Daafiidi tuuŋŋi kɔkɔ poonee, u nìn tīī Yilpu Fɔ́ŋŋŋ Nimbɔtiu un bí circiree tinyool. U nìn gà ipampakalan nì u-pɔbil kɔkɔ, ki dàkā yii u néeń u-náanliu.

⁹U nìn lēē bilaŋgaaliibi ki yóoǹ nsaraafan nyɔkɔpu, ní bi nìn gà ilan in mɔ̄ee.

¹⁰U nìn tīī jiŋaalib jilma, ki nìn bɔ́ntì-bi tiŋan tiŋan. U nìn yāntì bi nyɔ́ŋkí ti-Dindaan yindi ní kí yòon̄ ntaafaabɔmbɔmee, bi nìn gbìl̀ ilan pu circir kɔŋkooŋŋun[282].

¹¹Ti-Dindaan nìn pítì Daafiidi kpitii ki nìn tīī-u mpɔŋkpaan kí nīn cá jaanjaan. U nìn pōoǹ-u tibɔtiil, ki nìn yāntì u jíń dibeel nì tinyool Isirayeel tiŋki pu. Saloomɔn

¹²Daafiidi kúm boonee, u-jipɔɔn uciŋfiti di nìn fōō u-yil. Daafiidi puee, ti-Dindaan nìn yāntì u bí ŋgbansɔŋfin[283].

¹³Saloomɔn nìn jíń dibeel ŋgbansɔŋfi yuntiŋu ní. Unimbɔti nìn tīī-u diŋuŋfil u-tiŋki kɔkɔn. An di yì-tì ní u nìn ŋúń ki máń kudii ki tīī ti-Dindaan, ní ki nìn bɔ́ntì circir kɔŋkooŋŋu ŋun bí ki cá jaanjaanee[284].

¹⁴Saloomɔn, a-naacimpɔntinee, a nìn lafun cáá iciin, dinyil gbí-si kii dimɔɔl nín gbéè puee!

¹⁵A-nyil nìn kpátìi gbí kitiŋ kɔkɔ pu, a-bɔŋmantikaati nì a-pɔɔŋyi nìn gbí ki-pu.

¹⁶A-yindi nìn bàn̄ ntindandatimu mun nnyim māntìi túee, ní binib nìn néeń-si a-gbansɔŋfiŋu pu.

¹⁷Binib nìn pàkà a-laŋyi nì a-laŋkpaŋŋi nì a-bɔŋmantikaati nì a-bɔsooŋyi[285].

¹⁸Ti-Dindaan Unimbɔti yindi pu, úǹ un bi yíì Isirayeel Nimbɔtiuee puee, a nìn kóoǹ sindaariya ki kpúkuǹ kii tikúpinee, ki nìn kóoǹ animbil kúti ki kpúkuǹ kii tikúbɔnee.

¹⁹Ama ní a nìn dū a-wunti ki fītiǹ binimpoobi, ní bi-wunti puee, a kpántì bi-yumbuu[286].

²⁰Min ní a ŋá ki bíil̀ a-nyooti ki kɔ́ǹ a-dicaŋkun yab tijɔkɔndi, ki dáaĺ ti-Dindaan ŋuul ki tɔ́ bi-pu. A-gbaantundi gbanti nìn kɔ́ǹ-bi kunimbaau.

²¹Di sá yii a-beel nìn cúu yākatì mili, ní Eefiraayiim naakookun yab nìn yíkì kaa kíí bi-ba pu ki náań bi-beel[287].

²²Ama ti-Dindaan kaa nìn fātì u-boon ki tīī u-laŋŋaŋfitiiku, ní kaa yāntì u-pooŋyi mun gbíntì fám. Waa nìn kúntì un u nìn lēēyee naantiibi. Waa nìn kūū ki céetì un u nìn néeńee nibooliŋu. U nìn yāntì Jaakɔb naantiibi bikaaŋkaabi ŋmátì. Míǹ mbaantiim ní u nìn yāntì Daafiidi maaliŋun yab biba kíǹ ki fòol̄ u-yil[288]. Rooboowaam nì Jeerooboowaam

²³Saloomɔn nìn kpíì ki cūtìi ŋàl̄ u-baabi. Úǹ boonee u-jipɔmbi kansikin ubɔ di nìn fōō u-yil. U nìn gbí digbaandi kaa nìn pée cáá dinyil báà fiii. Di sá yii Rooboowaam nìn lēē dileel din di nìn yāntì dinibul yíkì kaa kíí di-ba pu ki bíi jáà nì uee[289]. Neebaati jipɔɔn Jeerooboowaam mun nìn yāntì Isirayeel yab ŋá ikpiti. U nìn dàkā Eefiraayiim yab ikpiti saŋŋu.

²⁴An pu ní bi-kpitii nìn būtì tikpilku ní bi dāa cúú-bi ki cūnnì kuyuŋu ki wāatì bi-tiŋki.

²⁵Bi nìn ŋáaǹ atuŋkpiti kɔkɔ nì ŋi-bulifi áli ki dāa fōō ditafadaaldi[290].