Read Ntcham Siracide 48 Bible Online

Siracide 48 - Ntcham bible

Siracide 48

¹Eelii Míǹ boonee ní Unimbɔti bɔnaatiliu Eelii yíkì kii ŋŋmee, ní u-nyɔɔbundi nìn wù kii ŋŋminaapoolee.

²U nìn cáań ŋkùm ki tɔ́ Isirayeel yab pu, ní difaŋgiil din u nìn cáá ti-Dindaan puee puee, u nìn kūū ki céetì binib tikpil[291].

³U nìn dū ti-Dindaan nyɔɔbundi pu ki pīiǹ kutagbɔŋu, ní ki tí yāntì ŋŋmi nyánní yilpu ki kpákatìń kitiŋ mita pu[292].

⁴Eelii, a ká tinyool atuŋkpaan ŋin ní a ŋáaǹee pueeee! Ŋma di ŋūǹ kí gāā u-bindi yii u nì si ŋmà?

⁵A dū Yilpu Fɔ́ŋŋŋ Nimbɔtiu nyɔɔbundi pu ki yāntì utaŋkpiil nyánní ditaŋkpiilin ki gítìń dimaŋfalin[293].

⁶Sii di téé bibɔtiibi ki lúkú ki nāaǹ-bi ní ki téé binikpaambi bi-bunlidooi pu ki tɔ́ dikaakulin[294].

⁷Siinaayi, Ooreeb jool puee, ti-Dindaan wòon̄-si a gbìl̄, ní u sòon̄ ki tùkū-si ditafadaakpaandi pu[295].

⁸Sii di kāaǹ bibɔtiibi bí tɔ̀ ti-Dindaan pɔntooŋyi, ní ki sītì Unimbɔti bɔnaatiliibi yiliŋ pu ŋkpam bí fōō a-yil[296].

⁹Sii ní an yōoǹ ŋŋmi naakpaabuŋku poon, a kāl̀ janjatɔrɔku un ŋŋmi taamui dátée ki jɔ́m̀ yilpu[297].

¹⁰Sii pu ní Tiŋmaŋmabiti sòon̄ yii a làá sɔ̀ŋkì ti-Dindaan ŋuul ní dí nín pōō. A làá yàntī ubaati nì u-jipɔɔn ń mɔ̄ɔkì ní kí fàtīí gíiǹ Jaakɔb naakɔti kí kàan̄ ti-paaŋŋu[298].

¹¹Bin làá dāá ká-si ní kí nīn néeń ti-Dindaan kí kpúee bí mmɔnneeee! Di sá yii ti mun làá dāá nīn pée bí dimaŋfalin ní. Eeliisee

¹²Eelii nín nìn wáŋkì kunaakpaabuŋŋu poonee, u-fam nìn gbí Eeliisee ní. Eeliisee maŋfal wiiŋyi kɔkɔ poonee, uyidaan ubɔ kaa nìn ŋúń ki cīŋkì-u, ní báà unil mun kaa nìn ŋúń ki jíń u-pu dinyandi.

¹³Báà tiba kaa nìn pée pɔ̄ɔ̄ u-cee. Ki kpáaǹ u-kúm boonee, u-wunti nìn gbíntìi tūǹ Unimbɔti bɔnaatiliu tundi ní.

¹⁴U nín nìn bí dimaŋfalinee, u nìn túń maamaaci tuuŋŋi. ní u-kúm boonee, u gíti ŋáaǹ maamaacikpaambi[299].

¹⁵Nì míǹ kɔkɔee Isirayeel nibul kaa nìn kpántì bi-ba, baa nìn fātì bi-boon ki tīī bi-kpitii, áli bi dāa cúú-bi ki cūnnì kuyuŋu ki yàl̄ duulinya kɔkɔ poon ki wāatì bi-tiŋki. An nìn pée kíǹ bikaaŋkaabi pu yéè ní[300], nì ubɔti un nyánní Daafiidi dicaŋkunee.

¹⁶Bi-kansikin biba nìn ŋá tin fáatiǹ Unimbɔtee, ní bin kíǹee mɔ̄tìi dū bi-ba ki múĺ ikpitin. Ubɔti Eeseekiyaasi nì Unimbɔti bɔnaatiliu Yeesaya

¹⁷Eeseekiyaasi nìn máń digundi ki tú Jeerusaleem tiŋki, ní ki nìn kɔ́ǹ nnyim kitiŋ poon. U nìn dū tikúti ní ki lùkū ditaŋkpal ki cátì nnyinsan, ní ki gbìn̄ dinyimbɔbil kí kpāafì nnyim[301].

¹⁸U-beel yuntiŋuee, Seenakeeriibi nìn dɔ́miń kí jáǹ Jeerusaleem tiŋki. U nìn tú u-janjakpiliu Rabsakeesi ní u nìn dúkutì u-ŋal ki dàkā Siiyɔn tiŋki u-lambikpaandi poon.

¹⁹Niinee Jeerusaleem tiŋkinee, binib pɔbiliŋ nìn bíil̀ ní bi-wunti gbáà kpàkpakpa, ní tiweendi cúú-bi kii unimpu un kā imatiŋween puee[302].

²⁰Bi nìn kúuǹ ki yíiń ti-Dindaan ulaŋŋaŋfiti, ki nìn yōoǹ bi-ŋalii ki túĺ u-watil pú. Circir Nimbɔtiu nìn kíiń-bi malaa doooo yilpu, ní ki nìn dī Yeesaya pu ki fīī-bi.

²¹Ti-Dindaan nìn jáń nì Asuur yab janjakitil ní u-tuuŋŋu nìn kūū ki céetì bi-kɔkɔ múb[303].

²²Di sá yii Eeseekiyaasi nìn ŋá tin fáatiǹ ti-Dindaanee. U nìn nóó u-naanja Daafiidi tabɔbiliŋ ní deedee. Unimbɔti bɔnaatiliu Yeesaya un leedakaŋ nìn sá ibaamɔnee di nìn tīī-u mara ú ŋá míǹ[304].

²³Yeesaya yuntiŋu ní ŋwìiń nìn sútì ki gítì ŋu-boon ní ubɔti maŋfal wiiŋyi fɔ̄kɔǹ ki kútì[305].

²⁴Mpɔŋkpaan ŋun Unimbɔti nìn tīī-uee nìn yāntì u wál̀ tin làá dāá jītí iyuntijoolkaa poonee, ní u nìn ŋméeǹ Siiyɔn yab bin nìn kā dikpoolee[306].

²⁵U nìn sòon̄ tin làá dāá jītí iyuntijoolkaa poonee bɔti, nì tibɔti tin nìn bál̀ kaa láá nyáń mpaampiin puee pu.