Read Ntcham Siracide 49 Bible Online

Siracide 49 - Ntcham bible

Siracide 49

¹Joosiyaasi Binib téetí Joosiyaasi pu, kii bi nín téetí utalaaluŋal nín ŋmālim̀ tiwan tin sɔ́fì ki ŋá talaalumɔnti puee ní. U-yindi mɔ̄ kinyɔkɔ kamaa poon kii tisiilee ní, àá kii bi nín gà ilan diina poon puee ní.

²U nìn nóó deedee saŋŋu ki kpántì dinibul pɔbil, ní ki kúntì ntimbiil waaŋi.

³U nìn fātì u-pɔbil ki túĺ ti-Dindaan. Ŋyunti ŋun binib kaa nìn dū u-marab ki yíiń tibee, u nìn dū ti-Dindaan tundi ki līntì nsan. Juuda bɔtiibi biluŋkikaabi nì Unimbɔti bɔnaatiliu Yeereemii

⁴Bibɔtiibi kɔkɔ nìn ŋáaǹ ikpiti an kaa cáá bí lì, asee Daafiidi nì Eeseekiyaasi nì Joosiyaasi baba. Bi-kɔkɔ nìn dū Yilpu Fɔ́ŋŋŋ Nimbɔtiu Marau ki fá. Juuda bɔtiibi kɔkɔ nìn wáŋkì.

⁵Bi nìn dū bi-pɔŋŋu kɔkɔ ki tīī biba, ní ki nìn dū bi-nyooti ki tīī ditimbuncandi diba.

⁶Bi-nannanliibi nìn sēē circir tiŋki kin Unimbɔti nìn lēēyee ŋŋmi. Ki-daŋŋi nìn kíǹ ki dɔ̄ fám ní. Unimbɔti bɔnaatiliu Yeereemii nín nìn sòon̄ pu ki síiǹee dee.

⁷Binib gbanti nìn yāntì u jíń falaa tikpil. Too, ti-Dindaan mun di nìn lēē-u doooo u-na poon ú nīn sá u-bɔnaatiliu kí kpìkitī, kí bīil̀ ní kí nàan̄, ama ní kí fàtīí mā kí cóoń mun[307]. Eeseekiyeel

⁸Eeseekiyeel di sá un nìn ká ti-Dindaan nyootee. Unimbɔti nìn dàkā-u tinyool gbanti keerubimbi bin tɔ́kɔ́ tɔrɔkub puee ní[308].

⁹U nìn téetì binannanliibi pu utaaja poon, ní ki nìn ŋá bin nóó deedee saŋŋuee tiŋan. Unimbɔti bɔnaatiliibi saalaa nì bili bɔti

¹⁰Unimbɔti bɔnaatiliibi saalaa nì bilee dáá gbíntìi dɔ̄ bi-kaakuliŋin. Ama ti-Dindaan ń yàntī bin làá téeǹ bi-yil puee ń nyā. Di sá yii bi nìn tīī Jaakɔb maaliŋun yab kunyannyaau, ní ki nìn fīī-bi kun puee baa nìn fá bi-mákal. Sooroobabeel nì Joosuwa

¹¹Mana ní unil ŋūǹ kí pàkà Sooroobabeel? U nìn sá kii kibɔmbiki kin fúuń ti-Dindaan ŋaŋgiilee ní[309].

¹²Míǹ mbaantiim ní Jooseedeeki jipɔɔn Joosuwa bí. Ŋyunti gbantee, bi-liitil nìn fātìi máń kunimbɔtidii. Bi nìn máń circir kɔŋkooŋŋu ŋun làá nīn cáá tinyool kí nīn cá jaanjaanee ki tīī ti-Dindaan[310]. Neeyeemiya

¹³Neeyeemiya mun nìn túń atuŋkpaan ŋin unil máaǹ kí téetée pu. U nìn fātìi máń ti-tiŋki guŋŋi ŋin nìn lítèe. U nìn kpántì ti-punuubi nì ti-kpàlkaati, ní ki fātìi máń ti-diiŋŋi. Eenɔki

¹⁴Binib bin kɔkɔ ti-Dindaan náań kitiŋ puee, baa ŋūǹ kí dū bi-kansikin ubɔ kí ŋmàntīǹ Eenɔki. Di sá yii an yōoǹ-u kitiŋ pu doo ní ki cáa jɔ́ntiǹ yilpu[311].

¹⁵Unil kaa nìn tí bí ki bàn̄ Jooseefi. U nìn sá u-nabiyaamu kpiliu, ní ki nìn sá u-nibul tíkinliu. Bi nìn tīī u-kpabiŋ tinyool[312].

¹⁶Seem nì Seeti nìn ká tinyool binib kansikin, ama Adam di jítiǹ binifoobi bin ní ti-Dindaan náańee kɔkɔ[313].