Read Ntcham Siracide 5 Bible Online

Siracide 5 - Ntcham bible

Siracide 5

¹Taa nín̄ gúntí a-ba fám Taa nín̄ máká a-gaajati pu, kí taa lì yii: «Tì ŋmāntiǹ-mi!»

²Á taa yàntī a-kpɔkɔsib nì a-pɔŋŋu ń téé-si á ŋá min a-pɔbil lèe[22].

³Taa lì yii: «Ŋma di ŋūǹ kí nīn cáá m-pu mpɔn?» Di sá yii báà án ŋá pu ti-Dindaan làá dáaĺ a-tafal.

⁴Taa lì yii: «M ŋá ikpiti ama tiba kaa ŋá-mi!» Di sá yii ti-Dindaan cáá kimɔtii tikpil[23].

⁵Taa nín̄ máká yii a làá ká a-kpitii pɔ̄tam ní kí nīn mɔ̀tīi ŋáań ikpiti ki kútí ikpiti pu.

⁶Taa lì yii: «U-poon mɔ̄ tikpil, u làá dū m-kpiti kupaau nee kí pɔ̄-mi.» Di sá yii úǹ di cáá disaasɔl ní ki cáá diŋuul mun, ní u làá dāá fōō mbum tikpil bikpitiŋaliibi pu.

⁷Taa tàan̄ kí fàtīí gítiń ti-Dindaan cee, kí taa nín̄ cáa nákà. Di sá yii ti-Dindaan ŋuul làá dāá bàń dicilpu dicilpu ní, ní án dāá nàan̄-si ditafadaaldi wiiŋŋu.

⁸Taa nín̄ máká tigaajati tin a dī isaŋkpiti pu ki kée, di sá yii tàa làá dāá kèetī-si dinimbinaamandi wiiŋŋu[24].

⁹Taa nín̄ càatī a-kpaajinti kubuŋu kun kamaa yaa jītée[25] poon, kí taa nín̄ còom̀ nsan kamaa pu. Di sá yii unikpiti di ŋáań míǹ.

¹⁰Taa nín̄ kpántí a-landɔkɔi baabadal, kí nīn yú nì tin a sòon̄ee.

¹¹Á nīn yáb̀ tibɔti dipilifil poon, ama kí taa nín̄ yáb̀ dikiil poon[26].

¹²A-juti yaa bālifì-si tiba ní a nyée, á kíí-u, ama a yaa kaa nyée, á táb́ a-nyɔkɔ.

¹³Tin a sòoǹee di làá tīī-si jilma àá kí kɔ́ǹ-si icoo, tin nyēē unil nyɔkɔnee ŋūǹ kí kɔ́ǹ-u dinimbinaamandin[27].

¹⁴Taa yàntī bí nīn yíì-si yii ubɔmbɔtukul, kí taa sòoǹ kí kīil̀ a-juti. Di sá yii icoo yaa cútí unaayuuyee, ditafadaaldi din pɔ̄ɔ̄yee dɔ̄ ki cí unyimɔndaan mun ní.

¹⁵Taa pée yìntī fiii ní kaa nín yīntì tikpil.