Read Ntcham Siracide 50 Bible Online

Siracide 50 - Ntcham bible

Siracide 50

¹Usaraaŋakpil Siimɔn Usaraaŋakpil Siimɔn, Ooniyasi jipɔɔn, di nìn fātìi ŋáŋkì kunimbɔtidii. Úǹ di nìn mɔ̄tìi pɔ́ɔkì circir kɔŋkooŋŋu ŋyunti ŋun ní u nìn dáá bí dimaŋfalinee.

²Úǹ di nìn yāntì bi cóoǹ kunimbɔtidii gundi di fɔ̀kɔ̀ mili puee nyeel. Úǹ di nìn máń digundi din māntìi tú kunimbɔtidiiyee ki tɔ́kɔǹ.

³U-yuntiŋu ní bi nìn gbìn̄ dinyimbɔbil. Dinyimbɔbilee nìn wāā kii kunimbɔtidii kupeekaau sampeekuee ní.

⁴U-landɔkɔŋu di nìn pée sá yii ú pìin̄ nsan u-nibul ń taa nàan̄. U nìn máń digundi ki māntìi tú kitiŋ an yaa sá yii binannanliibi dɔ́miń kí jáǹ-kèe.

⁵U yaa nìn nyáń circir kɔŋkooŋŋun, ki yaa nìn còom̄ ki màntī kunimbɔtidiiyee, u nìn gbí tinyooleeee!

⁶U nìn bí kii utaafaaŋmalbija un di ŋmíntí atagban kansikinee, ní ki nìn bí kii uŋmal un ŋá dikuŋkundee.

⁷U nìn bí kii ŋwìiń ŋun ŋmíntí Yilpu fɔ́ŋŋŋ Nimbɔtiu Diikuee, ní ki nìn bí kii dikuntinyindi din jìl̀ tinyool tagbaŋŋi poonee.

⁸U nìn bí kii nsupumpukum min mātì dipeepɔndinee, ki bí kii nsupumpukum min yú ibun caŋinee, ní ki bí kii Leebanɔn sufii dipeel puee.

⁹U nìn bí kii talaalutuukaa un bi tūū nsaraafan puee, ki bí kii sindaariya sampeeku kun bi dū ataŋkpanyaan kɔkɔ nì ŋi-bulifi ki nyáantèe.

¹⁰U nìn bí kii ɔliifi subu bun lòon̄ sàka sakee, ki bí kii siipreesi subu di fɔ̄kɔǹ ki tin tūū atagbanee.

¹¹U yaa nìn dū u-saraaŋabɔkutifɔkɔl ki pēeǹ, ki yaa nìn pēeǹ u-wannyaanti tin kíǹee kɔkɔ ní ki jɔ́m̀ Unimbɔti saraafaŋŋu puee, u nìn yàntī tinyool gbéè circir kɔŋkooŋŋu cindi kɔkɔ ní.

¹²U nìn yūlifí ki kɔ́l̀ nsaraafan, ní ki fòol̄ bisaraaŋaliibi ŋaan dijandi din u làá dūú ŋá saraayee. U-nabiyaamu mun nìn māntìi tú-uee nìn bí kii kibeefuuliiyee, a lì kii Leebanɔn sufii in bi yíì seediree, a lì kii ibafi sujaatii di yú ki māntìi tú-uee.

¹³Aarɔn jipɔmbi kɔkɔ pēē bi-bɔkutinyaaŋŋi. Bi nìn ŋúb́ ti-Dindaan saraau Isirayeel samaau kɔkɔ nimbiin.

¹⁴Siimɔn nìn pāantí saraabi nsaraafan pu, ki tìì Yilpu Fɔ́ŋŋŋ Nimbɔtiu, Mpɔŋkɔdaan.

¹⁵U nìn tàntī u-ŋal kí yòon̄ kɔŋkɔnnyɔkaa, ní kí bàtī ndamam min sá fiinyi subiliŋee ki féeń nsaraafan nyeel pu. An nìn sá talaalu un sɔ́fì ki kóò Yilpu Fɔ́ŋŋŋ Nimbɔtiu, duulinya kɔkɔ bɔtiu fíŋfiŋfiŋee ní[314].

¹⁶Niinee ní Aarɔn jipɔmbi bisaraaŋaliibi ń fáá ŋwiliili ki búǹ bi-kantáŋŋi ŋin sá tikútee. Bi nìn ŋáań kuwoou tikpil míǹ samaa ń gbìl̄ kí téetí Yilpu Fɔ́ŋŋŋ Nimbɔtiu pu[315].

¹⁷Dicilpu niinee ní dinibul kɔkɔ ń tàtīí gbàan̄ bi-yigbeeŋi tūū kitiŋ, ní kí kíĺ ki bíi jáaḿ di-Dindaan Mpɔŋkɔdaan, Yilpu Fɔ́ŋŋŋ Nimbɔtiu.

¹⁸Niinee ní bilaŋgaaliibi ń nìn kíĺ ki gà ilan ki nyɔ́ŋkí-u. Kunimbɔtidii poon nìn fòol̄ kí píĺ dàii ní nlan ŋun bi nìn gèe nìn mɔ̄ dipilifil.

¹⁹Dinibul nìn gbàam̄ ti-Dindaan, Yilpu Fɔ́ŋŋŋ Nimbɔtiu. Bi nìn gbāā Unimbɔti un poon mɔ̄ee nimbiin ki mèé áli bí dāá ŋá saraabi kí tīī ti-Dindaan kí ŋá akoobil nín sá puee kɔkɔ kí dóó.

²⁰Niinee ní Siimɔn ń kpákatí nsaraafan pu. U nìn yòontí u-ŋalii yilpu kí túĺ Isirayeel samaau, ní kí wàan̄ kinyɔkɔ kí mèè ti-Dindaan kí bìin̄ bi-pu. Úǹ ní bi nìn tīī jilma ú yíiń ti-Dindaan yindi.

²¹Míǹ boonee ní samaa ń fàtīí gbàan̄ nliliitiim bi-yigbeeŋi tūū kitiŋ kí fōō Yilpu fɔ́ŋŋŋ Nimbɔtiu biindi. Dibiindi wimmeem

²²Kɔŋkɔnnee ní jāam̀maan duulinya kɔkɔ Nimbɔtiu. U tūǹ atuŋkpaan ijaan kɔkɔ pu, ki yòontí-ti yilpu doooo ŋyunti ŋun bi màl̄-tee, ní ki dàkà-ti u-laŋŋaŋfitiiku.

²³Ú tīī-ti dipɔɔpindi, ifaal ti-pɔbiliŋ poon kí tīī ti-yuntiŋu nee nib ŋgbansɔŋfi kii u nín nìn ŋá pu njaminee.

²⁴U-ŋanti ń nīn pée gbíntìi bí ti-cee, ní kí nīn fìil̄-ti ti-maŋfal wiiŋyi kɔkɔ poon. Anibul ata bɔti kaa fáatì-mi

²⁵Anibul ali di bí m-nimbil kaa là kí wāl̀-ŋi, ní ditataatiil díǹ kaa kpáàa bàn̄ dinibul gba.

²⁶An nibee di sá binib bin kóò Seeyiir jool puee, nì Fiiliistii yab nì bigbaambi bin kóò Siikeem tiŋkinee. Tibɔkuntikaal

²⁷Siiraki jipɔɔn Yeesu, Eelasaar un kóò Jeerusaleemee naantiiu ŋmàn̄ kugbɔŋu nee poon iciin nì dinyil dakaŋ. U dū iciin in di gbí u-pɔbilinee ki yāaǹ kitiŋ pu kii utaayee.

²⁸Un di yaa kàaǹ ki bùsī tibɔti nee bí mmɔneeee! Un di yaa dū-tì ki ŋá u-pɔbilinee làá kpántí uciŋfiti.

²⁹Di sá yii u yaa dū-tì ki túń ditundee, u làá nīn pɔ̄ɔ̄ tikɔkɔ poon, di sá yii u làá nīn fàŋkí ti-Dindaan u-saŋkindi poon.