Read Ntcham Siracide 51 Bible Online

Siracide 51 - Ntcham bible

Siracide 51

¹Siiraki jipɔɔn Yeesu wimmeem Ti-Dindaan Ubɔti, m là kí jāam̀-si. Unimbɔti m-fiiliu, m làá gāā ilan kí nyɔ̄ŋkì-si. Sii ní m bíi jáaḿ,

²kun puee sii di wúń m-pu. A jòoń-mi ki fīī-mi ŋkúm ŋaan. A fīī-mi ki nyántì bin sòoǹ m-pu tinyimɔmbɔti nì binyimɔndambi talintin. A fīī-mi ki nyántì bin bí ki kɔ́kɔĺ-mee ŋaan[316].

³A nín fīī-mi ki nyántì bin nìn nyàab̀ kí tɔ̀ntī-mee ŋaanee, a dàkā yii a-poon lafun mɔ̄ ní a-yindi sá dikpaandi. A fīī-mi ki nyántì bin nìn nyàab̀ kí kpɔ̀-mee ŋaan, nì agìń tikpil ŋin nìn bāań-mee poon.

⁴A nìn fīī-mi ki nyántì ŋŋmifaam min nìn māntìi tú-mee, nì aŋmilimbil ŋin maa nìn sēēyee poon.

⁵A nìn yāntì m ŋmátì ki nyáń ditaŋkpiil, nì tibɔkpitil nì inyimɔn,

⁶nì dilimbikpitil piiŋyi ŋaan. M nìn sútì ki pìl̄ ŋkúm, ki sīntì ki tin bàn̄ ditaŋkpiil punyɔkɔki[317].

⁷M-nannanliibi nìn māntìi tú-mi an kɔkɔ pu, ní báà ubɔ kaa nìn bí kí jòoń-mi. M nìn nyàab̄ ubɔ ń jòoń-mi, ama kaa ká báà uniseen.

⁸Niinee ní m téetì sii ti-Dindaan poommɔŋŋu pu, nì a-ŋanti tin bí ki cá jaanjaanee pu. M nyí yii a fìil̄ binib bin di máká a-puee, a fìil̄-bi ki nyāntí bi-nannanliibi ŋaan[318].

⁹Doooo kitiŋ pu doo ní m fáá m-biil ki yíiń-si ní ki gbāam̀-si yii á fīī-mi ŋkúm ŋaan.

¹⁰M nìn kúuǹ ki yíiń-si ki lī yii: «Ti-Dindaan, sii di sá m-Baa, taa dū-mi ki fá dinimbinaamandi yuntiŋu poon, ŋyunti ŋun ní m bí bilambidambi nimbiin kaa cáá un di làá jòoń-mee.

¹¹M làá nīn nyɔ́ŋkí a-yindi ní kí nīn pée cá jaanjaan, ní kí nīn pée gà ilan ki jáaḿ-si.» Niinee ní a fōō m-wimmeem.

¹²Di sá yii a fīī-mi an kaa nāaǹ-mi, a fīī-mi nnaabu yuntiŋu poon. An pu ní m là kí jāam̀-si, kí gāā ilan kí nyɔ̄ŋkì sii ti-dindaan, ní kí lì tin ní a ŋá ki tīī-mee. Unil bí ki nyàab̀ iciin

¹³M nín nìn dáá pɔ̀ɔǹee, kí wàatī ḿ nìn búntí diyiindee, m nìn mèé ti-Dindaan, kaa nìn bāal̀ yii m nyàab̀ kí nīn cáá iciin.

¹⁴M nìn mēē kunimbɔtidii nyɔkɔpu ki nyàab̄-i, ní ki làá nīn pée nyàab̀-i kí tin sāā m-kúm dal.

¹⁵I kpītì kii fiinyi subiliŋ ŋin bíi bīīyee, ní ki yāntì m ká dipɔɔpindi. M nìn kíǹ ki tàkā nsammɔnti pu, doooo m-pɔntinee, m pée nóó i-tabɔbiliŋ ní.

¹⁶M nìn pée kpōoǹ m-tafal ŋyunti fiii pu yéè ní ki ŋúń ki ká-i. I yāntì m ká didàkamɔntiil ki tīī m-ba.

¹⁷Iciin di yì-tì ní m cūtì nyɔkɔpu, an pu ní m jáaḿ un di tīī-mi-iee.

¹⁸M lēē m-ban yii m làá dū-i kí tɔ̄ ditundi, m nyàab̄ kí ŋá tiŋan nì difaŋgiil ní icoo kaa kɔ́-mi.

¹⁹M mɔ̀n̄ nì dibaatandi kí nīn ŋúb́-i. M cúú m-ba tiŋan kí nīn tɔ́ Unimbɔti marau. M yōoǹ m-ŋalii ki túĺ kutaa, ki gbāam̀ tin m yīntiǹ-i kaa nyée pu.

²⁰M ŋá m-ba circir ki fātì m-ba ki túĺ iciin, ní ki dāa ká-i. Íǹ di kíĺ ki tīī-mi dinyil. I pée kpá kí fá-mi dalba dalba.

²¹M nìn nyàab̄-i nì m-pɔbil kɔkɔ, an pu ní m ká tigaajawammɔntiil gbanti[319].

²²Tipaal tin ti-Dindaan tīī-mee di sá dilimbil. An pu ní m làá dū-dì kí nyɔ̄ŋkì-u.

²³Nimbi bin kaa cáá dinyilee, ní dāam̄maan m-cee. Ní dāam̄maan ḿ bīfì-ni[320].

²⁴Ba pu ní ní nīn kā ki ŋmìntī ni-ba Iciin, ŋyunti ŋun ní i-nyinnyooŋu cáá-nee?

²⁵Man di wāaǹ m-nyɔkɔ ní ki lī yii: «Ní dā iciin kí taa pà[321].

²⁶Ní tàntīmaan ni-sil í kpàl̄-ni ní tɔ̄ i-tundi, ní í dàkà-ni. I pée bí ni-caŋin gbiisii yéè, ni ŋūǹ kí ká-i[322].

²⁷Nimbi ni-ba ń dáań kí kpèè m nín kaa gīī tikpil pu ní ki ká diŋuŋfikpaandee.

²⁸Ní dū kunimbigbaau kí bīfì didàkal, dì làá yàntī ní ká sindaariya tikpil[323].»

²⁹Nín̄ bímaan dipɔɔpindin ti-Dindaan ŋanti pu, án taa nín cáá-ni icoo ní gāā ilan kí nyɔ̄ŋkì-u.

³⁰Ní tɔ̄maan ni-tundi din sá ní tɔ̄ee ní ŋyunti ŋun bi yóoǹ-nee ń nín bàń. Ti-Dindaan làá dāá pà-ni ni-paati ŋyunti ŋun sá ú dāá pà-nee[324]. Inyɔŋki laŋyi in bi dūu kútì kugbɔŋu kun bi ká Keeri tiŋkinee puee

³¹Nyɔ̄ŋkìmaan ti-Dindaan, di sá u ŋān̄, di sá yii u-neendi bí ní ki cá jaanjaan.

³²Nyɔ̄ŋkìmaan Unimbɔti, di sá yii u-neendi bí ní ki cá jaanjaan.

³³Nyɔ̄ŋkìmaan un cí Isirayeelee, di sá yii u-neendi bí ní ki cá jaanjaan.

³⁴Nyɔ̄ŋkìmaan duulinya Náanliu, di sá yii u-neendi bí ní ki cá jaanjaan.

³⁵Nyɔ̄ŋkìmaan un dá Isirayeel ki líìyee, di sá yii u-neendi bí ní ki cá jaanjaan.

³⁶Nyɔ̄ŋkìmaan un kóoǹ Isirayeel yab bin yàl̄ee ki kpáfèe, di sá yii u-neendi bí ní ki cá jaanjaan.

³⁷Nyɔ̄ŋkìmaan un māā u-tiŋki nì u-kɔŋkooŋŋuee, di sá yii u-neendi bí ní ki cá jaanjaan.

³⁸Nyɔ̄ŋkìmaan un yāntì ŋyin ŋubɔ cɔ́tì Daafiidi dicaŋkunee, di sá yii u-neendi bí ní ki cá jaanjaan.

³⁹Nyɔ̄ŋkìmaan un di lēē Saadooki naantiibi bí nīn sá bisaraaŋaliibee, di sá yii u-neendi bí ní ki cá jaanjaan.

⁴⁰Nyɔ̄ŋkìmaan Abraam gbampɔɔl, di sá yii u-neendi bí ní ki cá jaanjaan.

⁴¹Nyɔ̄ŋkìmaan Isaaki taŋkpanaakooku, di sá yii u-neendi bí ní ki cá jaanjaan.

⁴²Nyɔ̄ŋkìmaan un sá Jaakɔb pɔŋŋuee, di sá yii u-neendi bí ní ki cá jaanjaan.

⁴³Nyɔ̄ŋkìmaan un di lēē Siiyɔŋyee, di sá yii u-neendi bí ní ki cá jaanjaan.

⁴⁴Nyɔ̄ŋkìmaan un sá bibɔtiibi bɔtiibi kɔ Bɔtiuee, di sá yii u-neendi bí ní ki cá jaanjaan.

⁴⁵U làá fàtīí yòon̄ u-nibul pɔŋŋu yilpu, an di sá kun pu bin kɔkɔ yú nì u deedeeyee nyɔ́ŋkí-uee, Isirayeel biyaamu, dinibul din di pìl̄-uee. Aleeluya.