Read Ntcham Siracide 6 Bible Online

Siracide 6 - Ntcham bible

Siracide 6

¹Taa kpántí a-bɔɔ nannanliu, di sá yii diyimbiildi cāabìń icoo nì disiibil ní. Míǹ ní an sá ki tīī biibiidaan.

²Taa yàntī a-kpɔkɔsib ń kpáaǹ-si, yaa sá fám a-pɔŋŋu làá yàaǹ kii unajee ní.

³A làá dāá ŋmɔ́ a-faati, a-subiliŋ ń dāá gbátí ní kí dāá kíń busukulimbu.

⁴Kukpɔkɔsikpiiu nàantí un cáá-kùee ní, di-puee, u-nannanliibi làá nīn bèel̄-u ní. Kubɔɔtimɔntiiu nì kubɔɔtikpiiu

⁵Dinyɔɔbummɔɔndi bùtī bibɔɔtiibi ní, kinyɔɔmɔɔi yàntī bí kíí-si kinyɔɔmɔɔi ní[28].

⁶A ŋūǹ kí nīn nyí binib tikpil, ama binib kutuku poonee, unibaanti ń nīn sá a-saŋkiliu.

⁷A yaa làá píí unil kubɔɔtiiuee, á cɔ̄ŋkì-u kí wàatī. Á taa jìkì kí dū a-mákal kí páań u-pu.

⁸Unil ubɔ bée, tiba pu ní u sá a-bɔɔ, ama a yaa kɔ́ dinimbinaamandinee, waa ti nyí-si.

⁹Ubɔɔti ubɔ bí ki ŋūǹ kí kpántí a-nannanliu, kí dū sii nì u-jaaku kí māafì kí kɔ́ǹ-si icoo.

¹⁰Ubɔɔti ubɔ bí sii nì u jīǹ disambibaantiilin, ama a yaa kɔ́ dinimbinaamandinee, waa ti nyí-si.

¹¹An yaa bútì-see, u làá nīn bí kii sisi a-bee ní, u làá nīn tìì a-tɔntɔnliibi marab nì dimákal.

¹²Ama a yaa kɔ́ dinimbinaamandinee, u làá nīn kíǹ ki jáà nì si, ní aa ti làá wāl̀-u[29].

¹³Nín̄ dátiǹ a-nannanliibi, nín̄ nyí nì a-ba nì a-bɔɔbi.

¹⁴Ubɔɔtimɔnti sá kibalilaŋ tiŋman pu ní, un di yaa ŋúń ki ká-uee ká tigaajati ní.

¹⁵Ubɔɔtimɔnti pɔ̄ɔ̄ kudaau ní, u-daaku kaa cáá bí dūú ŋmàntī.

¹⁶Ubɔɔtimɔnti sá nnyɔkɔ ŋun tìì dimaŋfalee ní. Bin fàŋkí ti-Dindaanee di kāntí-u.

¹⁷Unil un fàŋkí ti-Dindaanee nyí bi nín píikí kubɔɔtiiu puee ní. Di sá yii u nín bí puee, míǹ ní u-bɔɔ mun bí.

¹⁸M-jipɔɔn, nín̄ néeń bí dàkà-si a-naacimpɔntin. A-yikpiti dāa píiĺee a ká Iciin.

¹⁹Sútí kí pìl̄ Iciin kí cīití nì kimɔtii, i-subimɔntiŋi bí kii ukpaal nì uwambɔlilee ní. Di sá yii a làá gīī digìńdi ŋwaam ní kí kpɔ̀-i, ama án kaa làá yúntí ní á jī tin i làá lòoǹee[30].

²⁰Iciin bɔti pɔ̄ɔ̄ ki tīī bigbaambi, bin lóò dinyilee kaa ŋūǹ kí nīn bí i-cee.

²¹I bí kii ditaŋkpal din unil dúkutí kí dàkà u-pɔŋŋuee, ama baa làá sūŋkì ní kí dūú fá.

²²Di sá yii Iciin yindi baasii máaǹ-i ní, binib bin wāĺ-iee pée sá fiii yéè ní.

²³M-jipɔɔn, pīlifì kí fōō tin m dàkafēe, taa fá m-saŋkii.

²⁴Dū Iciin kusakai kí bóob́ a-taaŋi, kí dū i-kpancikiliu kí léeń a-neen[31].

²⁵Dū a-boon kí tīī kí túń i-waŋgul, jī kimɔtii kí léeń i-kpancikiliu.

²⁶Sútí kí pìl̄-i nì a-pɔbil kɔkɔ, nóó i-saŋyi nì a-pɔŋŋu kɔkɔ.

²⁷Dī i-boon kí nyàab̀-i, i làá yàntī á béé-i. A yaa cúú-iee, á taa ti gíiǹ-i kí líí.

²⁸Di sá yii án dāa kúntée, a làá dāá ká i-cee diŋuŋfil, ní a-gìŋ́ŋi ń dāá kpántí mmɔn.

²⁹Niinee i-kusakai làá nīn sá a-cee kii diwundi din pɔ̄ɔ̄yee, ní kpancikil un lá a-neenee ń kpántí tiléeŋkaal tin cáá kudapɔɔuee.

³⁰I-kpancikiliu làá nīn sá-si sindaariya léeŋkaati ní i-kusakai ń nīn sá-si dambalanyaan uman.

³¹A làá dāá dū-i kí pèen̄ kii dijiŋaabɔkutilee, ní á dāá cíkiń-i kii ifaal beefuuliikee.

³²M-jipɔɔn, a yaa là, a làá bīfì kí nīn nyí, a yaa pɔ́ɔǹ, a làá cíkití.

³³A yaa néeń ki pílifí tibɔtee, a làá bīfì kí cíkití, a yaa kpòontí a-tafalee, a làá kpántí uciŋfiti.

³⁴Nín̄ néeń ki kàal̀ bijaŋkpilib kansikin, dū a-ba kí nákáǹ iciin in bi dàkèe.

³⁵Nín̄ néeń ki pílifí tibɔti tin kɔkɔ nyánní Unimbɔti ceeyee, taa yàntī iciin laŋkpandi diba ń ŋmátí kí nyā a-ŋaan.

³⁶A yaa ká unyilee, á péé kutaafaau pɔ̀lpɔl kí cù u-cee, a-taaŋi ń nīn tà ki kùbitī u-diiku nyɔkɔpu.

³⁷Nín̄ dàkafī ti-Dindaan marab pu, kí ŋá tin u-bɔkpaaŋi bí yii á ŋée tiŋan. U làá tīī-si mpɔn ní kí tīī-si iciin in ní a lèe[32].