Read Ntcham Siracide 7 Bible Online

Siracide 7 - Ntcham bible

Siracide 7

¹Isaŋki iba mun Taa ŋá tikpitil tiba, ní tikpitil tiba mun kaa làá jī a-pu dinyandi.

²Sútí kí wàatī tin kaa bí deedeeyee, ní tin kaa bí deedeeyee ń sāǹ kí wàatī-si.

³M-jipɔɔn, taa bɔ̄l̀ tin kaa bí deedeeyee daŋŋi pu, an yaa kaa sá míǹ, a làá dāá cā tin kaa bí deedeeyee miluli pu ní[33].

⁴Taa nyàab̀ mpaampeekaa ti-Dindaan cee, kí taa nyàab̀ tinyool paaŋŋu ubɔti cee.

⁵Taa dàkà yii a sá deedeedaan ti-Dindaan nimbiin, kí taa dàkà yii a sá uciŋfiti ubɔti nimbiin[34].

⁶Taa nyàab̀ kí nīn sá ubɔsoonli ŋyunti ŋun aa ŋūǹ kí kúntí inaamuulee. Yaa sá fám, unikpaan ubɔ ŋūǹ kí yàntī á ŋá tin aa lèe, ní á fá a-bulcinti[35].

⁷Á taa ŋá a-tiŋkin nib ikpiti, yaa sá fám, a làá fá a-jilmau bi-kɔkɔ nimbiin.

⁸Taa ŋá ikpitibaanti mili pu, dibabaja ŋmāntì á jī dibɔkpil.

⁹Taa lì yii: «Yilpu fɔ́ŋŋŋ Nimbɔtiu làá kpèè m-saraabi nín wīikí puee. M yaa dū-bi ki tīī, u làá kíí kí fōō.»

¹⁰Taa nín̄ mèé ki gùgufī, kí taa súntí kí pɔ̄ biwɔfib tiwan.

¹¹Á taa lā unil un bíi jīǹ falaayee. Di sá yii Unimbɔti un sīntiǹ-u taapuee ŋūǹ kí fàtīí yòon̄-u yilpu[36].

¹²Taa mɔ̄ntì kí túń a-nabiki pu, àá a-bɔɔ pu.

¹³Á nīn nyí nì a-ba kí taa pée mɔ̄ntì nnyimɔn, kí nīn nìkì kí mɔ́ntí inyimɔnee kaa tìì tiwammɔntiil tiba.

¹⁴Bitindaŋkpilib yaa kpáfèe, á taa nín̄ sòoǹ fám fám, kí taa nín̄ sòoǹ ki bùsī anyɔɔbumbaanti a-wimmeem poon[37].

¹⁵Taa nín̄ ná ditundi din pɔ̄ɔ̄yee, àá asaatuun ŋin Yilpu Fɔ́ŋŋŋ Nimbɔtiu náańee.

¹⁶Taa kūtì bikpitiŋaliibi pu. Téetí yii Unimbɔti ŋuul kaa làá tàan̄.

¹⁷Sìntīǹ a-ba taapu taapu, kun puee unikpiti tafadaaldi di sá ŋŋmi nì akoosibil. Kubɔɔtiiu nì kunabitiiu bɔti

¹⁸Animbil puee, á taa nyāfì a-bɔɔ, kí taa dū a-nabiki tiŋman pu yɔu kí kpántí Oofiiri tiŋki sindaariyau.

¹⁹A yaa ká unimpuciŋfiti nì umɔntee, á taa gùgufì kí cáá-u. Di sá yii u-nyaaŋku ŋān̄ ki jítiǹ sindaariya.

²⁰Taa sàaǹ uyumbu un tūǹ ditundi tiŋanee, àá utɔntɔnli un tūǹ ditundi nì dipɔbil dibee.

²¹A yaa cáá utɔntɔnli un cáá dinyilee, á nīn néeń-u kii sii a-bee. Á taa yíí kí tīī-u dibatɔl.

²²A yaa cáá tiwaŋkutee, á nīn kpèé-tì tiŋan. A yaa páatì ti-puee, nín̄ gbíntìi ŋúb́-tì.

²³A yaa cáá mbiyaamuee, á dàkà-mu. Mu-biyatinee, á dàkà-mu mú nīn tɔ́ mara.

²⁴A yaa cáá mbinimpubiyaamuee, kpèè-mu mú taa bīil̀, taa pɔ̄-mu nnimbiin.

²⁵A yaa pú a-bisal ticatee, a túń dituŋkpaandi dee, ama á dū-u kí tīī uninja un cáá dinyilee.

²⁶Unimpu un fáatì a-pɔbil a cááyee, á taa jà-u. Ama á taa nín̄ máká unimpu un aa néeńee pu.

²⁷Á nīn tɔ́ a-baa nì a-pɔbil kɔkɔ, kí taa súntí a-na falaabi pu[38].

²⁸Á téetí yii bíǹ di màl̄-si. Ba ní a ŋūǹ kí ŋá kí tīī-bi tin bi ŋá ki tīī-see pu? Tin sá á ŋá kí tīī bisaraaŋaliibee

²⁹Nín̄ jáaḿ ti-Dindaan nì a-pɔbil kɔkɔ, ní kí nīn tɔ́ u-saraaŋaliibi.

³⁰Nín̄ néeń un di náań-see nì a-pɔbil kɔkɔ[39], kí taa fàtī a-boon kí tīī bin bí u-tundinee.

³¹Nín̄ fàŋkí ti-Dindaan ní kí nīn tɔ́ bisaraaŋaliibi. Tīī-bi tin kɔkɔ bi tīī-si mara á tīī-bee: tijincɔ̀fikaal, nì ikpiti pɔ̄tam saraau[40], nì tiwaŋkuti tin a kūū ki ŋá saraayee booku, nì bi yaa dū ubɔ àá tiba ki sú ti-Dindaanee saraau, nì tiwampeekaal tin bi cāabìń kí dūú sú Unimbɔtee. Tin sá á ŋá kí tīī biwɔfibee

³²Pɔ̄ biwɔfib nì tiniti ní a-biindi ń nīn sá dimɔndi[41].

³³Nín̄ pūǹ binifoobi kɔkɔ nì dipɔbil diba, kí taa yíí kí ŋá bin kpíìyee tiŋan.

³⁴Taa fàtī a-boon kí tīī bin bíi sūǹee, kūtì bin bíi yáliŋkée pu ní yāliŋkì[42].

³⁵Taa gùgufì kí cùú màntī bibunliibi pu. A yaa ŋáań mimmee, binib làá nīn néeń-si ní[43].

³⁶Kun kamaa ní a yaa ŋáańee, á taa súntí a-maŋfal wiiŋyi kúntitam pu. Mimmee a pée kpá kí ŋá ikpiti.