Read Ntcham Siracide 8 Bible Online

Siracide 8 - Ntcham bible

Siracide 8

¹Nín̄ nyí nì a-ba Á taa kpákáǹ upɔɔl, yaa sá fám a ŋūǹ kí dāá kɔ́ u-ŋaan.

²Taa cùnnì ugaaja ibɔsoon, yaa sá fám, aa làá nīn cáá nnyiŋfi ŋubɔ u-cee. Di sá yii sindaariya yāntì binib tikpil lítì, ki ŋéeb́ gba bibɔtiibi biba nyɔmmu.

³Sii nì kufuudaan ń taa kpáká, taa kūtì idɔ u-ŋmiŋu pu.

⁴Taa jī kunifaŋu tinaacin, yaa sá fám, u làá sìì kí kpáaǹ a-naanjab.

⁵Taa wòoǹ unil un béè u-kpitiiyee. Á téetí yii ti-kansikin ubɔ kpá ki bí deedee.

⁶Á taa kpèè utikpil fám, di sá yii ti-kansikin biba bíi púl̀ ní nee.

⁷Ubɔ kúm ń taa nīn mɔ̄ǹ-si. Téetí yii ti-kɔkɔ làá pée kpú ní[44].

⁸Taa nín̄ kpèé biciŋfitiibi dàkatam fám, ama á nīn pée bífí alaŋkpan ŋin bi gèe. Di sá yii ŋíǹ di làá dàkà-si ní á ká dinyil, ní kí bīfì-si á nīn bí binikpaambi tundin.

⁹Taa dū bitikpilib dàkatam kí ŋá ŋkpaŋkpamboon. Di sá yii bi mun bífì-tì bi-baabi cee ní. Bi-cee ní a làá bīfì kí gbìl̄ tibɔti taapu, ní ŋyunti ŋun an máaǹee, á nīn cáá tin a làá kííyee.

¹⁰Taa tūū ukpitiŋal kooŋŋi ŋŋmi, yaa sá fám ŋu-ŋmifaam dāa ŋūǹ kí wà-si.

¹¹Á taa jáǹ ulambidaan ní nīn bíi kpákà, u dāa ŋūǹ kí yàntī á nīn bíi sòoǹ tibɔfan.

¹²Taa pìnnì unil un pɔ̄ɔǹ-see animbil. Ama a yaa pīnnì udaanee, á béé yii a fá a-nimbiliŋ dee.

¹³Taa yūĺ unil boon ú pìnnì animbil ŋin jítì a-pɔŋŋu nyɔkɔmee. A yaa ŋá míǹ, á bɔ́ntí kí dāá pà dipɔndi.

¹⁴Taa yíiń ubɔsoonli ibeeyiin. Di sá yii bi làá sòoǹ kí pɔ̀-u, kun puee úǹ tundi dee.

¹⁵Si nì naayeeku ń taa còom̀ nsan, yaa sá fám, u làá kɔ́ǹ-si agìń tikpilin. Di sá yii u làá nīn ŋáań u nín là puee, ní kí dū u-waatiiku kí fìn̄-si kí cùnnì ŋkúmin.

¹⁶Taa já kujaau nì unil un ŋáań tipɔmbɔtee, sii nì u ń taa táá kí cù kuteeun. Di sá yii kí kpɔ̀ unilee kaa sá u-cee tiba, u ŋūǹ kí kpɔ̀-si laakin ubɔ kpá kí fīī-see[45].

¹⁷Sii nì ugbaan ń taa sòoǹ kí bɔ́ntí tiba, di sá yii waa làá ŋmā kí báĺ ni-bɔɔŋŋi.

¹⁸Taa ŋá tiba dibalin unicaan nimbiin, di sá yii aa nyí udaan nín làá ŋá puee.

¹⁹Taa dū a-poon bɔti kɔkɔ kí māafì un ní a yaa pée kée. Ubɔ kaa làá jāam̀-si.