Read Ntcham Siracide 9 Bible Online

Siracide 9 - Ntcham bible

Siracide 9

¹Binimpoobi Taa ŋá ipoompoon a-nimpuu un a néeńee pu, taa tīī-u nlandɔkɔ ú ŋá-si tin kaa ŋān̄ee.

²Taa dū a-ba kí líiǹ unimpu ubɔ, di sá yii u ŋūǹ kí jī a-pu dinyandi.

³Taa sútí kí pìl̄ kinimpulaakpaai, a ŋūǹ kí dāá kɔ́ u-laantin[46].

⁴Taa yūĺ kí yúntí unimpu un sá ulaŋgaalee cee, u ŋūǹ kí dāá ŋmàtiǹ-si á mɔ̀nnì-u.

⁵Taa dū a-nimbikpeeŋu kí báań usapɔɔn pu dímmm, án nín làá ŋá pu bí taa sòoǹ kí kpɔ̀ u-bɔti kí kpáaǹ-see[47].

⁶Taa dū a-ba kí líí nì nnimpulaakpaamu, án nín làá ŋá pu aa taa fá a-fakalee.

⁷Taa nín̄ làaǹ a-nimbikpeeŋu kitiŋ saŋkaŋkpiliŋ kɔkɔ pu, kí taa nín̄ tú ki yìiǹ laakin binib kaa bée.

⁸Fàtī a-nimbiin kí taa kpèè. Á taa dū a-nimbikpeeŋu kí báań unimpunyaan un saa yèe pu[48]. Di sá yii unimpu nyaaŋku yāntì binib tikpil wáŋkì. Kun puee, dineendi fòol̄ lìblib kii ŋŋmee ní.

⁹Taa pée kàl̄ kí kɔ́ĺ unimpu un mɔ́ǹee, sii nì u ń taa kàl̄ kí nyɔ̀ ndaam kí jī jiŋaal. Yaa sá fám, u ŋūǹ kí kɔ́-si á nīn kíǹ ki là-u, dilal gbantee ń dāá yàntī á lítí kí wāŋkì. Unil nín máaǹ kí nīn bí nì u-jutiibi puee

¹⁰Taa dū ubɔɔtikpiki kí fá, di sá yii ubɔɔtipɔɔn kaa ŋūǹ kí fōō u-paaŋŋu. Ubɔɔtipɔɔn sá kii ndapɔmee ní, mì yaa yúntèe ní mì mɔ̄ dinyɔl.

¹¹An yaa bútì ukpitiŋalee, án taa nín̄ cáá-si nnimbitaataam, di sá yii saa nyí u-maŋfal nín làá kúntíǹ puee[49].

¹²An yaa bútì bikpitiŋaliibee, á taa pàkà-bi, téetí yii kí wàatī bí kpúee, asee bí fōō ditafadaaldi.

¹³Nín̄ bí ki dátiǹ unil un di cáá mpɔn kí kpɔ̀ u-nijutee, mimmee aa làá nīn fàŋkí ŋkúm. Ama a yaa sútì ki pìl̄-uee, á nīn nyí kí taa yìntī, an yaa kaa sá míǹ u ŋūǹ kí lēē a-maŋfal. Á béé yii titalindi kansikin ní a còom̄ ní ki tɔ́kɔ́ kitiŋ gundi pu ki yìiǹ.

¹⁴Pée ŋá a nín ŋūǹ puee kí nīn cá a-jutiibi cee, ní kí nín fōoń biciŋfitiibi cee isaŋki.

¹⁵Nín̄ sòoǹ nì bin di cáá dinyilee, tin kɔkɔ a yaa cáá kí sòoǹee ń nīn tɔ́kɔ́ Yilpu fɔ́ŋŋŋ Marau pu[50].

¹⁶Yàntī sii nì deedeedambi ń nīn kpáfí ki jīǹ, á nīn mɔ̀ɔǹ a nín fàŋkí ti-Dindaanee pu. Biyidambi bɔti

¹⁷Iŋal pu tɔntɔnliibee, tin bi pàkèe di sá tin bi mɔ́ɔ́yee, ama uyidaanee, tin bi pàkèe di sá iciin in u cáá ki sòoǹee.

¹⁸Kitiŋinee, binib fàŋkí ubɔcafil ní ki ná kubɔcaau daan.