Read Ntcham Esaïe 1 Bible Online

Esaïe 1 - Ntcham bible

Esaïe 1

¹Yeesaya, Amɔtisi jipɔɔn nín nìn ká tibɔti tin Juuda beel nì Jeerusaleem tiŋki puee sèé. Ŋyunti gbantee, Oosiyasi nì Yootam nì Akaasi nì Eeseekiyaasi nìn kāl̀ kāl̀ Juuda beel pu tibɔtiil ki fōol̀ tɔb.

²Kutagbɔŋu, pīlifì! Kitiŋ, kpòon̄ a-tafal kí pīlifì! Ti-Dindaan di bíi sòoǹ nee. «M lōō mbiyaamu, ki kpēē-mu mu cíkitì, ní mu kíǹ ki bíi jáà nì mi.

³Unaa nyí u-dindaan, ní kimaŋ nyí laakin ki-dindaan ŋáań-kì tijin kì jīǹee. Ama Isirayeel yab kaa nyí báà tiba, m-nibul kaa gbìl̀ tibɔti taapu.»

⁴Mbusu dɔ̄ ki cí-ni, nimbi ditimbundi din ŋáań ikpitee, dinibul din yīntèe, nnibool ŋun ŋáań tin kaa ŋān̄ee, mbiyaamu mun yiliŋ gáatèe. Ni dū ti-Dindaan ki fá, ki kpēē Isirayeel Circir Nimbɔtiu[1] fám, ki fātì ni-boon ki tīī-u.

⁵Ni nín gbíntìi jáà nì u nee, ni-la ní u làá gíti fáá ní? Diyil kɔkɔ fōō tiweendi, dipɔbil kɔkɔ gīī ki yúl̀.

⁶Kí yòon̄ titafati kí cáá sāā diyilee, laaba kaa ti bí mmɔm. Tiwun kɔkɔ fōō tiweendi, ki lākatì lākatì, ki kpántì ibuun. Ubɔ kaa fíntì-i, kaa póob́-i, kaa ŋá-i ŋkpam kí bàtī iween pu.

⁷Ni-tiŋki kpántì kuteeu, ni-timmu wùn̄ ŋŋmi kɔkɔ múb. Ni-nimbilaaliyin ní binicambi bí ki ŋàfī ni-kpaajinti. An kpéelikì ni-sati nyíki nyiki kii binannanliibi di jítèe.

⁸Siiyɔn[2] tiŋki baba di pée kíǹ, kii kibiŋ di yú fiinyi kpaabunee, kii uciitil bìŋ́ki di yú aputaajul kpaabunee, kii kitiŋ ní bijanjaliibi māntìi túee.

⁹Ti-Dindaan Mpɔŋkɔdaan yaa kaa bàà yāntì ti-kansikin binikaaŋkaabi ŋmátèe, ti bàà làá nīn bí kii Soodoom yabee ní, kí nīn náań nì Goomoora yab[3].

¹⁰Pīlifìmaan ti-Dindaan nyɔɔbundi, Soodoom kpilib. Ní ŋátí ni-tafal kí pīlifì ti-Nimbɔtiu dàkatam, Goomoora nibul[4].

¹¹Ti-Dindaan bí yii: «Ba ní m làá ŋá nì saraabi bin ni ŋáań tikpil nee? M núutiǹ ipijaa saraawɔkaabi nì anabil kpam. M gīī nì inajaa nì apibil nì iŋoobu fatikuu[5].

¹²Ni nín dòoń ki yūlifí m-nimbiinee, man di bí yii ni-taal ń tāā m-cindinaaa?

¹³Ní taa ti cáań-mi saraabi, an kaa kèetī tiba. M ná talaalub bin ni tùutēe nyiim! Ni jīǹ uŋmapɔɔn nì ŋwiŋŋuŋfikaa jiŋaalib ki kpáfí ki jīǹ jiŋaalib ki ŋáań ikpiti. Maa ti là kí ká míǹ.

¹⁴M ná uŋmapɔɔn jiŋaalib bin ni jīǹee, ni-kpafiŋ kpántì diwaŋgul ní ki tīī-mi, ní m túǹ ki gīī m-naŋki nyáń[6].

¹⁵Ni yaa tāntì ni-ŋalii kí mèèyee, m fàtī m-kpaŋkpamboon ní kí tīī-ni. Báà ní mèè kí gíti mèè, maa làá pīlifì-ni, kun puee ni-ŋalii táká fatiku.

¹⁶Ní fàl̀maan, kí ŋámaan ni-ba circir. Ní nyāntí ni-tuŋkpitiŋ m-nimbiin, kí gbèen̄ kí taa ti ŋá ikpiti.

¹⁷Ní bīfì kí nīn ŋáań tin ŋān̄ee. Ní nyàab̀ kí nīn nóó deedee saŋŋu. Ní nīn kpòotī bin wɔ́b̀ bi-jutiibee. Ní sòoǹ kí pɔ̀ ditaŋkpiibil, kí sòoǹ kí mɔ̄tì ukpiipu pu.»

¹⁸Ti-Dindaan bí yii: «Ní dāam̄maan tí sòoǹ kí gbìlīǹ tɔb. Báà ni-kpitii yaa yāntìi máǹ cíncinciŋ kii fatikuee, i làá pīil̀ káŋkaŋkaŋ kii ntaayimee. Báà i yaa máǹ kii ŋwɔmee, i làá pīil̀ kii upipiin kutee ní.

¹⁹Ni yaa kíí ki pílifì m-nyɔkɔ, ni làá jī tijin tin kitiŋ nee lòon̄ee.

²⁰Ama ni yaa yíì kaa pílifì, ní ki gbíntìi jáà nì mee, kitàataajiki ní bi làá dūú kúntí-ni.» Ti-Dindaan di sòon̄ míǹ.

²¹An ŋá mana ní kitiŋ kin kaa nìn cáá tijɔkɔndee dūu kpántì kii kinimpulaakpaayee ní? Dooooyee, ki-nib nìn nóó ibaamɔn saŋŋu, ní ki nìn bí deedee. Ama kɔŋkɔnnee, binikpɔliibi di kíǹ ki gbí ki-ni.

²²A-nimbiliŋ kúti kaa ti nyìm̀, ní bi cēeǹ a-damɔmmɔntiimin nnyim!

²³A-bɔtiibi sá pɔɔgaatib ní, bi nì binaayub di pēē kinyɔkɔ. Bi-kɔkɔ néeń tiwampɔkaal, ki jòó ki pá dinyɔɔŋeebil jim boon. Baa pɔ̀ ditaŋkpiibil, kaa mɔ́tí ukpiipu pu.

²⁴An pu ní ti-Dindaan Unimbɔti Mpɔŋkɔdaan un di sá Isirayeel Nimbɔtikpaaŋwuee lī yii: «Mbusu dɔ̄ ki cí-ni! M làá téeǹ nimbi bin ná-mee! M làá tɔ̀ nimbi m-nannanliibi ipɔntoon!

²⁵Jeerusaleem, m làá tāā kí bīikì a-pu. M làá dū kaŋwa kí fàl̀-si á nyā, m làá nyāntí-si a-jɔkɔnti kɔkɔn.

²⁶M làá yàntī a-bɔsoonliibi ń kpántí kii njamin yabee, kí yàntī a-saŋkiliibi ń nīn bí kii cannaaku yabee. Ní bí dāá nīn kíǹ ki yíì-si yii <Ibaamɔn Tiŋki, Kitiŋ kin yú nì Unimbɔti deedeeyee>».

²⁷Ibaamɔn làá fīī Siiyɔn tiŋki, ní deedee ń yàntī ki-nib bin kpántì bi-bee ń ŋmátí.

²⁸Ama pɔɔgaatib nì bikpitiŋaliibi làá nàan̄, ní bin dū ti-Dindaan ki fée ń kúntí.

²⁹Icoo làá cúú-ni iwaasufi in ni néeń tikpilee pu. Ni-wunti làá yɔ̀tī ni-kpaaŋŋi ŋin ni lēē kí nīn tòotī awaayee poon.

³⁰Kun puee ni làá dāá nīn sá kii buwaasubu bun faati yɔ́ĺee ní, kii bukpaa bun poon ní nnyim fóotèe.

³¹Upɔɔl làá dāá nīn sá usá, ní u-tuuŋŋi dāa sá kii ŋŋmiyatiyaalee. Bi-liitil làá dāá fōō ŋŋmi, ní ubɔ kaa dāa bí kí gbíntí.