Read Ntcham Esaïe 10 Bible Online

Esaïe 10 - Ntcham bible

Esaïe 10

¹Mbusu dɔ̄ ki cí binib bin yōontí marab bin kaa bí deedeeyee, binib bin ŋmà marab bin kɔ̄ntí bi-jutiibi falaayee ki yōontée.

²Baa tìì biwɔfib dinyɔɔbundi ibɔsoon laŋki ki ŋmìntī m-nibul nandambi tin sá bi-yatee. Bi fìkì bikpiipoobi, ki fúkuĺ ataŋkpiibil wanti.

³Mimmee ditafadaaldi wiiŋŋu dal, ni yaa láa ká kubuŋkpaaŋŋu páaǹnée, ni làá dāá nín ŋá mana dee? Ŋma ní ni làá dāá sāǹ kí kɔ́ kí ká dijòońdi dee? La ní ni làá dāá yóoń ni-gaajati dee?

⁴Kun ni dāa pée ŋūǹ kí ŋée di sá ní nīn bōō bisarkadambi kansikin, àá ní lítí kí nīn dɔ̄ anikpil kansikin. Ama nì míǹ kɔkɔee, ti-Dindaan ŋuul kaa sɔ̄ŋkì, u-ŋuul dáá gbíntìi dàn̄ bi-pu.

⁵Ti-Dindaan lī yii: «Mbusu dɔ̄ ki cí Asuur tiŋki[25] kin sá m-ŋuul bambaaŋŋuee. Ndɔ ŋun kā u-ŋaan nee ní m làá dūú dàkà m-bum.

⁶M dū-kì ki tú kí cùú já nì ditimbundi din kaa dū Unimbɔti ki yíiń tibee. M tīī-kì ditundi kí cùú já nì dinibul din gbítí m-ŋuulee, kí fūkul̀-kì kí kóoǹ ki-gaajawanti, kí tāā-kì kii didandi pu kpatee.

⁷Ama Asuur tiŋki kíǹ kaa dàkafī míǹ, ki-landɔkɔŋu nyáń ŋu-ba. Di sá yii kíǹ pée dàkafī dinàandi pu ní, kí kúntí atimbun tikpil tikpil.

⁸Kì lì yii: <M-janjakpilib kɔkɔ kaa sá bibɔtiibi níii?

⁹Maa ŋá Kalnoo tiŋki kii m nín ŋá Kaarkeemiisi tiŋki pueeee? Maa ŋá Amati tiŋki kii m nín ŋá Aripaadi tiŋki pueeee? Maa ŋá Samaarii tiŋki kii m nín ŋá Damaasi tiŋki pueeee?

¹⁰M ŋúń ki jáń ki fōō awaa beeŋi, laakin awaa nìn bí ki wīikí ki jítiǹ Jeerusaleem nì Samaarii timmu yaŋee.

¹¹M nín ŋá Samaarii nì ki-waaŋi pu nee, maa làá ŋmā kí ŋá Jeerusaleem nì ki-waaŋi mimmaaa?>»

¹²Ti-Dindaan yaa láa dóò ditundi din u cáá kí tɔ̄ Jeerusaleem tiŋki nì Siiyɔn jool puee, u làá dāá dáaĺ Asuur bɔtiu tafal u nín cáá dilambil ki dàkà u-bee pu.

¹³Di sá yii ubɔti gbanti lī yii: «An sá m-ŋal pɔŋŋu nì m-ciiŋyi pu ní m ŋá tin bí nee kɔkɔ, kun puee man cáá dinyil ní. M kpītì ŋkpaanyɔmu mun nìn bí anibul kansikinee, ki fúkúl̀ bi-wanti tin bi kpáafèe. M kpákatì bi-bɔtiibi bi-beeŋi pu kii ubaatandaanee ní.

¹⁴Kii unil nín dàatī u-ŋal kí páatí kunɔndii puee, míǹ ní m kóoǹ anibul gaajati. Kii bi nín wúkutí ajin ŋin unoon yíkìi fée puee, míǹ ní m kóoǹ tiwan kɔkɔ kitiŋ pu, ní báà unil kaa cīŋkì u-baaa, kaa wāaǹ kinyɔkɔ ní kaa nín múlifì.»

¹⁵Kicɔkɔ mun ŋūǹ kí dàkà ki-ba un di ŋúb́-kì ki cáa gàatēe ceeee? Kijiseekikaai ŋūǹ kí gúntí ki-ba un cáá-kì ki tūǹ ditundee puɔɔɔ? Mbambaan kaa ŋūǹ kí fíiǹ un ŋúb́-ŋuee ŋal, míǹ ní ndɔ kaa tí ŋūǹ kí dúkutí un ŋúb́-ŋuee ŋal.

¹⁶An pu ní ti-Dindaan Unimbɔti Mpɔŋkɔdaan làá yàntī u-nib bin gbìfèe ń dúntí. Ŋŋmi làá pōō u-nyooti taapu.

¹⁷Ti-Dindaan un sá Isirayeel tiŋki walifiŋuee làá kpántí kii ŋŋmee ní, circir Nimbɔtiu ŋmilimbiliŋ kí fōō ikuŋkum nì abɔjanaakun, kí wà kɔkɔ múb ŋwimbaanti.

¹⁸U làá wà kí bīil̀ u-bambannyaaŋku nì u-subiŋmɔkaaŋi kpaabu kɔkɔ. U làá dāá nīn náań nì unil un iween ŋmɔ́ ki bíil̀ee ní.

¹⁹Án làá dāá pée kíń isufi fiii yéè ní Asuur bambaŋkun áli gba campɔnti dāa ŋūǹ kí kàaǹ-i.

²⁰Ŋyunti gbantee, Isirayeel yab bin làá dāá nīn bí dimaŋfalinee, Jaakɔb nibul bin làá dāá kíńee kaa dāa gíti cɔ́tí un di bí ki gbáà-bee pu. Bi làá dāá nīn kíǹ ki cɔ́tí ti-Dindaan pu, Isirayeel circir Nimbɔtiu pu ní.

²¹Bin làá dāá kíńee làá dāá gítiń Unimbɔti Mpɔŋkɔdaan cee, Jaakɔb naantiibi bin làá dāá kíńee làá fàtīí gítiń.

²²Isirayeel, báà a-naantiibi yaa wīikí kii dibul din dɔ̄ tiŋku gbandee, bi-kansikin biba di làá fàtīí gítiń ti-Dindaan cee. Ti-Dindaan nín lēē ki síiǹ yii u làá nàan̄-kèe, see ú ŋá míǹ, ní deedee ń dāá gbí kitiŋ pu kii mbunee.

²³Tiŋman, ti-Dindaan Unimbɔti Mpɔŋkɔdaan nín sòon̄ ki yóoǹ pu yii u làá nàan̄ kitiŋ kɔkɔee, see u nāaǹ-kì[26].

²⁴An pu ní ti-Dindaan Unimbɔti Mpɔŋkɔdaan lī yii: «M-nibul yab bin kóò Siiyɔn jool puee, ní taa fàŋkì Asuur yab bin ŋúb́ mbambaan ki gbáà-ni, ki ŋúb́ ni-boon ndɔ kii Eejipiti yab nín nìn ŋáań-ni pu dooooyee.

²⁵Ama an kíǹ ŋyunti fiii nàanyɔkɔ diŋuul din m gíí ni-puee ń sɔ̀ŋkì ní ḿ fōō Asuur yab pu mbum kí nàan̄-bi.»

²⁶Ti-Dindaan Mpɔŋkɔdaan làá dúkutí u-bambaaŋŋu kí fáá Asuur yab kii u nín nìn fáá Madiyan yab pu Ooreeb jool puee, ní kí tàntī u-kpandɔŋu dimɔɔl pu kii u nín nìn ŋá pu Eejipitee[27].

²⁷Ŋwiin gbantee, u làá dāá páatí diwaŋgul din pá ni-gbigbipati puee, ní kí túutí-ni ditúndi din u túǹ-ni ni-silii gīīyee. Diwaŋgul làá dāá wāŋkì ní án bútí-ni. Unannanli nín jɔ́ḿ Samaarii tiŋkin,

²⁸bi bāań Ayaati tiŋkin. Bi cōom̀ ki jítì Miigirɔn tiŋki pu, ní ki cáá bi-wanti ki yóoǹ Miikimaasi tiŋkin.

²⁹Bi cōom̀ ki jítì ntaŋkpafaŋfakamin ki bí yii: «Tí gbíntí kí dòom̄maan Geeba tiŋkin.» Niinee dinyoondi kɔ́ Raama tiŋkin yab, ní binib bin kóò Giibeeya, Sayuul tiŋkinee sáǹ ki kátì.

³⁰Galiim tiŋkin yab, nín̄ tátímaan! Layiisa tiŋkin yab, ní pīlifì. Anatooti yab gbí isaa[28]!

³¹Madimeena tiŋki yab bíi sáń kí ŋmátí, ní bin kóò Geebiim tiŋkinee bíi nyàab̀ kibalilaŋ.

³²Ŋwiin gbantee binannanliibi làá dāá yūĺ Noob tiŋkin, ní ki dāa sòoǹ ki dàkà Siiyɔn jool, Jeerusaleem gbantaŋki ŋŋal.

³³Kpèè, ti-Dindaan Unimbɔti Mpɔŋkɔdaan di kɔ́fí asupan nì mpɔnee. U gāatì isukpaan ki lúkufì, isufi in fɔ̀kɔ̀ee dɔ̄ kitiŋ.

³⁴Ti-Dindaan làá dāá dū kicɔkɔ kí gàatì kubambaŋŋun sugboomu, ní Leebanɔn seedir sufii in ŋān̄ee lítì ki dɔ̄ kitiŋ.