Read Ntcham Esaïe 11 Bible Online

Esaïe 11 - Ntcham bible

Esaïe 11

¹Disubambil diba làá dāá kpìtī Jeesee[29] sunyeel pu, disupɔmbil diba làá cɔ́tí u-nyaaŋyi pu.

²Ti-Dindaan Fam làá dāá nīn bí u-pu. Mì làá dāá tīī-u iciin nì mpɔn ú gàntī tin ŋān̄ee nì tin kaa ŋān̄ee. Mì làá dāá tīī-u isaŋki nì dibaatandi. Mì làá dāá yàntī ú béé ti-Dindaan kí nīn fàŋkí-u.

³Kun dāa mɔ̄ǹ-uee di sá ú nīn fàŋkí ti-Dindaan. Waa làá kpèè unil nimbiin ní kí sòoǹ u-bɔti, kaa làá tí pīlifì tin binib sòoǹee ní kí sòoǹ kí ŋāŋkì tibɔti.

⁴U làá dāá sòoǹ binandambi bɔti nì deedee, ní kí dāá sòoǹ kitiŋ nee pu wɔfib bɔti nì ibaamɔn. U-nyɔɔbundi dāa gbáà kitiŋ nee pu nib kii mbambaanee ní, ní tibɔti tin dāa nyēē u-nyɔkɔnee dāa kù bin sá bitɔŋfitiibee[30].

⁵Deedee di làá dāá nīn sá-u dambala, ní ibaamɔn dāa sá-u gbaja u gbìn̄ u-caŋ[31].

⁶Sinsiŋku nì dipibil di dāa kóò dicilpu, ní ugbii ń dāá dòon̄ kí kɔ́ĺ kiŋɔbiki. Dinabil nì digbikintipɔmbil dāa kpáfí dibɔɔbaantiil ki jīǹ, ní kinaacimpɔmbiki dāa kpàá bi-kɔkɔ.

⁷Unasal nì digbiŋgbil dāa pēē kunaakpaapɔɔu, ní bi-biyaamu dāa pēē ŋkɔŋkoon. Gbikinti dāa ŋmóò timool kii unaayee ní.

⁸Kibipɔŋ dāa kā ukoobu faliŋu pu ki gbíiĺ, ní campɔnti ń dāá dū u-ŋal kí bɔ̄ ukoowaati faliŋun.

⁹Baa dāa gíti ŋáań tikpitil, kaa dāa gíti bíiĺ tiba ti-Dindaan circir jool kɔkɔ pu, kun puee bi làá dāá béé ti-Dindaan kitiŋee kɔkɔ pu kii nnyim nín gbéè tiŋku puee[32].

¹⁰Ŋwiin gbantee, Jeesee naantiiu di dāa sá kudaaŋŋu ki tīī duulinya nibuliŋ kɔkɔ. Atimbun kɔkɔ làá dāá nyàab̀-u[33], ní laakin u dāa bée, tinyool làá dāá nīn jìliŋkī.

¹¹Ŋwiin gbantee, ti-Dindaan làá dāá tàntī u-ŋal nliliitiim kí fīī u-nib bin kíǹee kí líí. An dàkà yii bin ŋmátì ki bíń Asuur tiŋki nì Eejipiti tiŋki nì Paatroosi tiŋki nì Kuusi tiŋki nì Eelaam tiŋki nì Sineeyaar tiŋki nì Amaati tiŋki nì ntimu mun ní tiŋku māntìi túee kɔkɔ.

¹²U làá dāá tīī atimbun kɔkɔ kudaaŋŋu, kí kpāafì-ŋi yii u làá fàtīí kóoǹní Isirayeel yab bin bi cūnnì kuyuŋuee, kí kpāfì Juuda naakookun yab bin kpátìi gbí duulinya jaaŋŋi kɔkɔnee.

¹³Niinee ipoompoon in Eefiraayiim yab cáá Juuda yab puee làá gbèen̄, ní bí dāá kpɔ̀ kí céetí Juuda nannanliibi. Eefiraayiim kaa ti làá ŋá Juuda pu ipoompoon, ní Juuda kaa ti làá nīn sá Eefiraayiim nannanliu.

¹⁴Bi làá lúuń Fiiliistii yab ŋwìiń jeetilaŋki pú, kí kpāfì kí fūkul̀ bin kóò ŋwìiń nyalaŋki púee. Bi làá dāá já kí pɔ̄ɔkiǹ Eedoom nì Moowaab yab, ní Amɔn yab ń dāá nīn bí bi-taapu[34].

¹⁵Ti-Dindaan làá yàntī Eejipiti mɔɔl ń kpā, kí dàkà Eefiraati mɔɔl ŋŋal kí kpàtī di-pu. U làá púfí di-pu kí cúú-dì kí yàkatī abuntaa aluli, ní unil dāa ŋūǹ kí táká anaataka kí dùtī[35].

¹⁶Didandi dāa bí u-nibul din kíǹ ki bí dimaŋfalin Asuur tiŋkinee ń dī. Án dāa bí kii bi-naanjab nín nìn nyáń Eejipiti tiŋkin puee ní.