Read Ntcham Esaïe 13 Bible Online

Esaïe 13 - Ntcham bible

Esaïe 13

¹Tibɔti tin ti-Dindaan sòon̄ Babiloon tiŋki[37] pu ní Amɔtisi jipɔɔn Yeesaya ká dileedakal poonee sèé.

²Ti-Dindaan bí yii: «Ní cóoḿmaan kudaaŋŋu ŋaabiki dijool din kūń isufi nì timool kpée yilpu. Ní kúum̀maan mpɔn kí yíiń bijanjaliibi. Ní kábitiń-bi bí dī akpambal punyɔmmu pu kí kɔ́.

³M tīī binib bin dū bi-ba ki sú-mee mara. M yíiń m-janjaliibi bin sá bimɔntiibee, bin di fàal̀ m-jajil puee, bí dāan̄ kí lēē m-ŋuul kí dàkà.»

⁴Ní pīlifì kuwoou nín gàń ajoon pu puee, a lì kii dinikitikpaandi di bí ki wòoǹee. Ní pīlifì an nín tùm̀ pu dàii abee poonee, anibul ŋin kóoǹ ki kpáfèe kansikinee. An sá ti-Dindaan Mpɔŋkɔdaan di bí ki kpèé bijanjaliibi bin làá cù kujaauee.

⁵Ti-Dindaan nì bin làá lēē u-ŋuul kí dàkèe nyánní ndandati, kitiŋ gbeennyɔkɔ. Bi làá nàan̄ kitiŋ nee kɔkɔ.

⁶Nín̄ sūm̀maan ki yáliŋkí, kun puee ti-Dindaan wiiŋŋu tóobiń! Ŋu dòoń kí nàan̄ tikɔkɔ, Unimbɔti Mpɔŋkɔdaan di túnní-ŋu[38].

⁷An pu ní binib kɔkɔ ŋalii jòon̄, tiwun yɔ̄tì.

⁸Dinyoondi làá kɔ́-bi ní iwàlfi nì ŋwunnyaŋfi ń cúú-bi. Bi làá nīn bí ki yáliŋkí nì bi-ba, kii upɔdaan di kā imatiŋween puee. Bi làá nīn kíǹ ki kpèé tɔb nì bitii, ní bi-nimbiliŋ ń mántí cínciŋ.

⁹Kpèè, ti-Dindaan wiiŋŋu di dòońee, ŋwiin ŋun disaasɔl kaa dāa bée, ŋwiin ŋun di sá u-ŋuukpaandi wiiŋŋuee. U làá dāá yàntī kitiŋ ń kpántí kuteeu, kí dāá céetí bikpitiŋaliibi kɔkɔ.

¹⁰Iŋmalbijaa nín kpáfì kpáfì pu ki bí yilpuee kaa làá ti nín̄ wāĺ. Ŋwìiń tin lì yii ŋu nyēēyee, an fātìi bɔ̄ntì, ní uŋmal mun kaa dāa gíti pīiǹ[39].

¹¹Ti-Dindaan bí yii: «M làá dáaĺ duulinya nib tafal bi-tuŋkpitiŋ pu, m làá dáaĺ binikpitib tafal bi-kpitii pu. M làá kúntí bin dàkà bi-bee bi-lambil pu, kí sìntī bin tɔ́kɔ́ bi-jutiibi puee taapu.

¹²M làá yàntī binifoobi ń taa ti nín̄ gbōō kii sindaariyamɔntee, ń taa ti nín̄ gbōō kii Oofiiri tiŋkin sindaariyauee[40].»

¹³M làá cìŋkì yilpu ní kitiŋ nyeel ń jìkì màkà maka, man ni-Dindaan Mpɔŋkɔdaan ŋuul pu, ŋwiin ŋun dì làá fōō lìblib kii ŋŋmee pu.

¹⁴Niinee, kii upeeman un bi bíi jèe, àá ipii in kaa cáá upikpaalee nín sáń puee, míǹ ní báà ŋma làá dāá sāǹ kí gítí u-nibul cee, báà ŋma làá dāá gítí u-tiŋki pu.

¹⁵Bin kɔkɔ bi làá dāá kée, bi làá dāá yāŋkì-bi ipiin, bin kɔkɔ bi làá dāá cúúyee, kitàataajiki ní bi làá dāá dūú kpɔ̀-bi.

¹⁶Bi-nimbilaaliyin ní bi làá dāá tāā kí mátí bi-biyaamu, kí dāá fūkul̀ bi-wanti tin bí bi-diiŋŋinee, kí dāá cūtì bi-nimpoobi mpɔn kí dòon̄ nì bi.

¹⁷M làá lùkutī Meedeesi yab kí dū-bi kí tɔ̄ bi-pu. Binib gbanti tafal kpá nì animbil, áli gba bi kpèé ki sìŋkīǹ sindaariya ní.

¹⁸Bi làá tɔ̄ binaacimpɔmbi ipiin kí kpɔ̀, kaa làá gàntī mbipɔmu, kaa làá sɔ̄ mbiyaawaamu mun saai.

¹⁹Babiloon tiŋki kin di ŋān̄ abee kansikinee, kitiŋ kin di ŋān̄ Kaaldee yab cee kii dibeedimbilee làá kpántí kii Soodoom nì Goomoora timmu mun Unimbɔti nìn nāaǹee ní.

²⁰Kí yòon̄ kí nīn pée cá jaanjaanee, unil kpá kí gíti kàl̄ Babiloon tiŋkin, kì làá nīn dɔ̄ fám ní kí nīn cá jaanjaan. Biwaŋkpaaliibi bin yìiǹ ki kpàá bi-waŋkutee gba kaa làá dāá cóoń bi-tantib ki-pu, bipikpaaliibi kaa làá dāá kpàà bi-piii ki-pu.

²¹Ilambunti di dāa kíǹ ki kóò kitiŋ gbantin, ní atulinjoo ń dāá gbí ki-diiŋŋin. Kì làá dāá kpántí laakin taataabi kóòyee, ní iŋɔjaa dāa yùkufī ki-digbuŋŋi pu[41].

²²Isaakpan dāa kpátí kí gbí ki-dikpaaŋŋi poon, ní sinsiŋkub ń gbí ki-beeciŋŋi amɔntee poon. Babiloon tiŋki kúntitam tóobiń, an bāań gba, báà ŋwimbaanti kaa làá gbéeǹ.