Read Ntcham Esaïe 14 Bible Online

Esaïe 14 - Ntcham bible

Esaïe 14

¹Ti-Dindaan làá sɔ̄ Jaakɔb naantiibi saai. U làá fàtīí lēē Isirayeel nibul dí nīn sá u-yal. U làá fàtīí kàan̄-bi bi-tiŋki pu. Binicambi làá kūtì bi-pu ní bi nì Jaakɔb naantiibi ń ŋá ubaanti.

²Anibul aba làá dāá yòon̄ní Isirayeel yab kí fàtīí gíiǹní bi-tiŋki pu. Ti-Dindaan tiŋki pu niinee, Isirayeel yab làá dāá dū binicambi gbanti, bininjab nì binimpoobi kɔkɔ kí kpántí bi-yumbui. Bi làá dāá cúú binib bin nìn cúú-bi kuyuŋuee kuyuŋu. Bin nìn wɔ́b́-bee làá dāá nīn kíǹ ki bí bi-taapu.

³Isirayeel nibul, a-gìńdi nì a-yaliŋkii nì kuyuŋu kun bi cúú-see boonee, ti-Dindaan làá tīī-si diŋuŋfil.

⁴Niinee a dāa gà nlan nee kí bèel̀ Babiloon bɔtiu yii: «An kúntiǹ uwɔ́bilee mana ní? U-lambilee bí la ní?

⁵Ti-Dindaan cúú bitɔŋfitiibi tambɔndi ki gíì, u cúú biwɔ́biliibi kpandɔŋu ki kɔ́fì.

⁶Un nìn tàfí anibul nì diŋuul, ki nìn gbáà binib kaa gbèentí, ki nìn cáá tipɔmbɔti ki jīǹ atimbun pu dibeel, ki nìn kā ŋi-pu kàtì kati.

⁷Kɔŋkɔnnee kitiŋ kɔkɔ ŋūŋfì ki ká dipɔɔsɔŋkil. Báà ŋma kíǹ ki fàal̀.

⁸A-puee, ki kpáaǹ siipreesi sufii bí ifaal poon, ní a nín lítì ki dɔ̄ee, Leebanɔn seedir sufii lì yii: <Un nìn jɔ́miń ki gàatī-tee kaa ti làá jɔ̄mìń.>»

⁹Taapu taŋkpiilin yab nín gbìl̄ yii a dòońee, ní bi bí ki bɔ́ntí bi-ba ki cí yii á dāan̄. A-puee bi fīkitì bitaŋkpiibi bin nìn sá bikpaambi kitiŋ puee, ní ki yāntì atimbun kɔkɔ bɔtiibi yíkì bi-beejaliŋ pu ki yúl̀ a-pu.

¹⁰Bi-kɔkɔ làá sòoǹ kí lì yii: «Si mun kaa ti cáá mpɔn kii timbee dee, ti nì si ŋá ubaanti dee!»

¹¹Bi bíi bɔ̀ɔ́ tibati ní ki téé a-kpaanti ki tɔ́ ditaŋkpiilin. Akoosibil di kíǹ ki sá-si kilambaŋ, ní ijiliŋkpaam sá-si satabiiŋkaa.

¹²Sii utaafaaŋmalbija un wāĺ kílkilee[42], an dī mana ní a nyánní yilpu ki lítìń ní? Sii un nìn jáà ki pɔ́ɔkíǹ atimbunee, an dī mana ní bi téé-si ki lúkú míǹ?

¹³A nìn bí ki lì a-ban yii: «Man làá jɔ̄m̀ kutaa pu, m làá jɔ̄ntiǹ m-beejal yilpu kí nīn bí Unimbɔti ŋmalbijaai yilpu. M làá kàl̄ dibeel dijool yilpu, laakin ní inimbɔti kàal̀ ki kpáfí, ŋwìiń nyalaŋki pú kúntilaŋkee.

¹⁴M làá jɔ̄m̀ atagban yilpu kúntí kunti, m làá nīn bí kii Yilpu Fɔ́ŋŋŋ Nimbɔtiuee ní.»

¹⁵Ama a sīntì ki bàn̄ ditaŋkpiilin, kubookpaaŋŋu taapu taapu[43].

¹⁶Bin ká-see kpèé-si dímmm ní ki lì yii: «Mimmee unil un nìn yàntī kitiŋ pu nib jìkì, ní abee cìŋkēe sèéee?

¹⁷Úǹ di kaa nìn nàantí ntimu, ki nìn yàntī kitiŋ kpántí kuteeu kaa líikí bisarkadambeeee?»

¹⁸Atimbun bɔtiibi kɔkɔ yaa kpíìyee, báà ŋma dɔ̀ u-kaakulin nì tinyool ní kí ŋùŋfì.

¹⁹Ama siiyee, bi dū-si ki fá, kaa síb́-si a-kaakulin[44]. A bí kii kibiki kin bi màl̄ kaa yōoǹ kì dɔ̄ kaa bí ŋkpèéyee ní. A dɔ̄ binib bin bi kūūyee nyìkī a-pu. Bi dū kitàataajiki ki sāatì ki cífì cífì-si, ki téé-si ki tɔ́ kubookpaaŋŋun ataŋkpee pu, kii dinikpil din dɔ̄ binib tà ki jītée.

²⁰Baa làá kpāfì sii nì bi kuceeu, kun puee a nāaǹ a-tiŋki, ní ki kūū sisi a-ba nibul. Dalba dalba baa làá ti pútí a-nibooliŋu binikpitib nee yindi.

²¹Ní bɔ́ntí kí kpɔ̀ mbininjabiyaamu inikpiti in mu-baabi ŋáaǹee pu! Án nín làá ŋà pu bí taa láa yīkì kí já kí fōō kitiŋ kí náań ntimu kí gbéeǹ duulinya kɔkɔnee.

²²Ti-Dindaan Mpɔŋkɔdaan bí yii: «M làá jáǹ Babiloon yab. M làá kúntí Babiloon yindi nì ki-nib bin kíǹee, nì bi-biyaamu nì bi-naantiibi kɔkɔ.» Man ni-Dindaan di lī míǹ.

²³«M làá yàntī Babiloon tiŋki ń kpántí kubɔɔu, laakin ní jɔmbaaŋkib kóòyee. M làá dū dinàandi ŋaaŋŋu kí ŋàtī-kì.» Man ni-Dindaan Mpɔŋkɔdaan di lī míǹ.

²⁴Ti-Dindaan Mpɔŋkɔdaan di pūtì ki lī yii: «Tiŋman pu, tin m bɔ́ntì kí ŋée, see án ŋá míǹ, m nín lēē kí ŋá puee, see án ŋá míǹ.

²⁵M làá kúntí Asuur yab pɔŋŋu m-tiŋki pu, m làá tāā kí mátí-bi m-jooŋŋi pu. M làá léetí kpancikil un bi léeǹ m-nibee pu, kí túutí-bi ditúndi din bi túee.

²⁶Ti-Dindaan nín sòon̄ tin ki yóoǹ duulinya kɔkɔ puee dee, u nín bɔ́ntì pu ki yóoǹ kí dáaĺ atimbun kɔkɔ tafal puee dee.»

²⁷Ti-Dindaan Mpɔŋkɔdaan yaa lēē kí ŋá puee, ŋma di ŋūǹ kí lì yii ú taa ŋá míǹ? U yaa gúntì u-ŋal, ŋma di ŋūǹ kí cúú-ŋu?

²⁸Dibindi din ubɔti Akaasi kpíìyee ní bi báakì tibɔti tin bí nee[45].

²⁹Nimbi Fiiliistii yab kɔkɔ[46], án taa nín̄ mɔ̄ǹ-ni yii ndɔ ŋun bi dūu gbáń-nee nín gíìyee. Di sá yii ukoobu un kpíìyee poon ní ukoowaati làá nyānní, ní ukoowaatee ń màal̀ kukoobiliŋŋu kun ŋàaǹee.

³⁰Binandambi làá dāá ká kí jī kí díkí, biwɔfib làá dāá ŋùŋfì nì ŋgbansɔŋfi. Ama m làá yàntī sii biyaamu ń kpú ŋkùm, ní kí yàntī bí kpɔ̀ mun kíǹee.

³¹Kitiŋ punyɔkɔki, nín̄ yáliŋkí, ntimu, nín̄ sūǹ ki tátímaan. Fiiliistii yab kɔkɔ wunti yɔ̄tì, di sá yii nnyiim miba nyánní ŋgan pú ki dòoń. Binannanliibi gbanti kansikinee, báà unil kaa sáǹ ki wāatì dijanjakitil.

³²Ti làá dāá kíí ditimbundee tuuŋyi yii ba? Yii: «Ti-Dindaan u-ba di náań Siiyɔn tiŋki. Niin ní u-nibul yab bin sá biwɔfibee làá dāá sāǹ kí kɔ́.»