Read Ntcham Esaïe 15 Bible Online

Esaïe 15 - Ntcham bible

Esaïe 15

¹Tin ti-Dindaan sòon̄ Moowaab tiŋki puee sɔ̀. Kunyabambaantiiu ní bi nāaǹ Aari tiŋki kin bí Moowaabee, an pée dóò ki-pu dee! Kunyabambaantiiu ní bi nāaǹ Kiiri tiŋki kin bí Moowaabee, an pée dóò ki-pu dee[47]!

²Diibɔn tiŋkin yab jɔ́m̀ bi-waatootipaaŋyi pu kí sɔ̄. Moowaab yab jɔ́m̀ Neeboo jool pu nì Meedeeba tiŋkin kí yāliŋkì. Bi-kɔkɔ kōol̀ abaakpan ní ki cáń bi-nyimpuliŋ.

³Bi pēē kpɔsatab ki còom̄ adan pu. Adiin ŋin bi bɔ̀b̄ee yilpu nì kpacantib puee, bi gà ikpiisilan ní báà ŋma sūǹ[48].

⁴Eesbɔn nì Eelalee timmu yab bíi gbáà ibiil, bi tin gbìl̀ bi-neen pu doooo Yakaasi tiŋkin ní. An pu ní Moowaab janjaliibi bí ki kūuntí, bi-wunti yɔ̄tì[49].

⁵M bíi nyàab̀ un làá jòoń Moowaab tiŋkee. Ki-nib biba sáǹ ki bàn̄ Soowaar tiŋkin, ní biba bàn̄ Eegilati Seeliisiya tiŋkin. Bi sūǹ ki dàb̀ Luwiiti gbantaŋki, ki gbáà ibiil nì kunimbaau ki tàkā Ooroonayiim saŋŋu pu[50].

⁶Niimriim buŋŋu fóotì. Timool kūń kaa ti nyēē, timɔsɔn kaa ti pée bí.

⁷An pu ní binib kóoǹ bi-wanti tin kíǹ-bee ki kpáàa sáǹ ki dūtì peepiliiyee sufii buŋŋu.

⁸Ibiil di pée tùm̀ dàii Moowaab tiŋki kɔkɔn. Bi gbìl̀ iyaliŋki pu Eegilayiim tiŋkin, bi gbìl̀ i-pu doooo Beer-Eeliim.

⁹Mbun ŋun jītí Dimɔn tiŋkinee máǹ fatiku, ní m làá kūtì Dimɔn yab nnaabu ŋubɔ mun. Gbikinti ubɔ làá cūtì Moowaab yab bin kíǹ bi-tiŋkin kaa kpíìyee.