Read Ntcham Esaïe 16 Bible Online

Esaïe 16 - Ntcham bible

Esaïe 16

¹«Ní yòom̄maan dipibil doooo Seera tiŋki kin bí kuteeu watil púee kí cùnnì kí tīī Juuda bɔtiu un kóò Siiyɔn jool puee.»

²Moowaab yab nimpoobi bí Arinɔn buŋŋu laakin bi ŋūǹ kí còom̀ kí dùtēe. Bi náań nì inoon in bi jìn̄ ki nyántì i-diikun i yàl̄ee.

³Bi bí ki lì Jeerusaleem yii: «Tùkù-ti kun ti máaǹ kí ŋée, ŋá tiba kí tīī-ti. Wúń ti-pu kuwiŋkaŋu nee pu, kii kunyeeu, dibɔmbɔndi nín bīī puee. Dū ti-yab bin sáǹ ki kɔ́-see kí báĺ, taa bìitī bin bíi sáńee pu.

⁴Yàntī Moowaab yab bin sáǹ ki kɔ́-see ń kàl̄ a-cee, nín̄ sá-bi kibalilaŋ unàanli cee. Diwɔ́bil bɔti làá gbèen̄, tipɔmbɔti làá kúntí. Unàanli làá yīkì ti-tiŋki pu.

⁵Niinee a-ŋanti puee, ubɔti beel làá nīn bá ki pɔ̄ɔ̄. U làá dāá kpòotī Daafiidi beel nì deedee. U làá dāá nīn bí kii ubɔsoonli un deedee bɔti máǹ u-nimbiliŋ, ní u néeń ibaamɔn bɔti tikpilee.»

⁶Ti gbìl̄ bi sòoǹ Moowaab yab lambikpaandi pu. Ba lambikpaandi díǹ bulifi dee! Bi dàkà bi-ba, ki yòontí bi-ba yilpu ki mɔ̀ɔǹ tikpil, ama tin bi sòoǹee kaa cáá taapu.

⁷Kɔŋkɔnnee Moowaab yab bíi sūǹ bi-tiŋki pu, bi-kɔkɔ bíi sūǹ. Bi yaa téetì fiinyi subiliŋ kalaabi bin bi nìn ŋmóò Kiiri-Areeseeti tiŋki puee, bi yáliŋkí ní. Bi-wunti yɔ̄tì kpataaa!

⁸Di sá yii Eesbɔn tiŋki sati kɔkɔ bíil̀ kii Siibima tiŋki fiinyi sufiiyee. Ŋyunti puee, isufi gbanti damam di nìn gbéè bin nìn sá atimbun kpilibee. I nìn yú ki tin bàn̄ Yaseer tiŋkin, ki nìn nyēē kuteeun an kɔkɔ pu. I nìn tɔ́ apan an lákatì Ŋyaam mɔɔl pu.

⁹An pu ní m kútì Yaseer yab pu ki bíi sūǹ Siibima fiinyi sufii pu. Eesbɔn nì Eelalee, m làá dū m-nyinnyim kí yàaǹ-ni ní sɔ̀ŋkì. Kun puee ni nín nìn kìtī ni-subiliŋ, ki cēē ni-jikaati nì dipɔɔpindi ki fàal̀ puee kɔkɔ kúntì.

¹⁰Dipɔɔpindi nì ifaal kúntì ni-kpaaŋŋin. Naa ti gà ilan ki kūuntí ni-fiinyi kpaaŋŋin. Kubɔbiku kun poon ni nìn tà fiinyi biliŋ ndamam còol̀ee kūń. Dipɔɔpindi faalii kúntì[51].

¹¹An pu ní m bí ki sūǹ Moowaab tiŋki pu. M bíi yáliŋkí kii bi nín bɔ̀ɔ́ kubeeu ki gà kunimbaau laŋyi puee. M bíi yáliŋkí m-pɔbil poon Kiiri-Areesi pu[52].

¹²Moowaab yab làá gīī kí dàb̄ ŋgbantamu pu. Bi làá cùú kɔ́ bi-waadiikun kí tīminsì, ama tiba kaa làá kpántí.

¹³Tibɔti tin ti-Dindaan nìn sòon̄ Moowaab tiŋki pu dooooyee dee.

¹⁴Ama kɔŋkɔnnee ti-Dindaan bí yii: «Kí yòon̄ díǹ kí cáá sāā abin ata deedeeyee, Moowaab tindaŋkpilib nì samaa kɔkɔ kaa dāa gíti bí tiban. Bin làá dāá kíńee kaa làá dāá nīn náaǹ, ní kaa dāa pɔ̄ɔ̄ mun.»