Read Ntcham Esaïe 17 Bible Online

Esaïe 17 - Ntcham bible

Esaïe 17

¹Tin ti-Dindaan sòon̄ Damaasi tiŋki puee sɔ̀[53]. Damaasi tiŋki kaa làá nīn gíti sá kitiŋ ki bí, kì làá kpántí adigbun ŋma ní.

²Binib làá yīkì kí fá Arooweer timmu. Tiwaŋkuti di làá jī mpaan mu-poon kí nīn bí ní báà uniseen kaa dāa bí ki páb̀-tì.

³Ntimu mun bi máń agun ki túee kaa ti làá nīn bí Eefiraayiim beelin. Damaasi tiŋki kaa dāa gíti cáá ubɔti. Aram yab bin làá dāá kíńee nì Isirayeel yab wíiŋŋu làá dāá nīn ŋmà ní. Ti-Dindaan Mpɔŋkɔdaan di lī míǹ.

⁴Ŋwiin gbantee, Jaakɔb nyooti làá bàtī, ní u-wunti tin nìn bí màlmalee ń sāǹ.

⁵Án làá dāá nīn bí kii dijincal yuntiŋu, ukpaal nín cēē tikpaajin kí kóoǹ kí bíĺ abɔn abɔn puee ní. Án làá nīn bí kii bi nín lúlifí tikpaajin Reefayiim tantakalin puee ní.

⁶<Án làá dāá pée kíń tijinlulifikaal ní, tin ní bi lúlifèe, kii bi nín yaa kītì ɔliifi subiliŋ, an nín kīntí abil ali kii ata pu ki lúń yilpuee, àá abil anaa kii aŋmoo ŋin kīntí asupan puee. Tibɔti tin ní ti-Dindaan Mpɔŋkɔdaan, Isirayeel Nimbɔtiu sòon̄ee dee.

⁷Yaadalee, binib làá dāá dū bi-nimbikpeeŋu kí báań bi-náanliu pu, bi làá dāá fàtī bi-nimbiin kí túĺ Isirayeel circir Nimbɔtiu cee.

⁸Baa dāa gíti fàtīí kpèè isaraafan in bíǹ bi-ba máńee. Baa dāa gíti fàtīí kpèè diwaal Aseera windɔi àá isaraafan in pu bi tùutī talaalubee watil pú.

⁹Yaadalee bi làá dāá sāǹ kí fá bi-timmu mun bi máń agun ki túee, kii dooooyee Eefi yab nì Amɔɔr yab nín nìn sáǹ ki fá bi-timmu pu Isirayeel yab nimbiinee ní. Bi-timmu gbanti làá dāá kpántí kii kuteeuee.

¹⁰Isirayeel, a súntì Unimbɔti un fīī-see pu. Aa ti téetí ditaŋkpal din a sáǹ ki kɔ́ee pu. An pu ní a cóoǹ isufi in cáá kunyaaŋŋuee, ní ki búĺ asubil ŋin di nyánní ntincamunee.

¹¹Ŋwiin ŋun a cóoǹ-iee, ní i yíkì ki wíiǹ, kutaafaauee ní iwambool in a búĺee ń púkuḿ. Ama ní nnaabu wiiŋŋu dalee, tin a cáńee kɔkɔ ń wāŋkì a-cee, ní án kaa dāa cáá dicáaǹdi.

¹²Mbusu bɔti! Anibul kupaau di dòońee. Kuwoou kun bi gàńee náań nì tiŋku wooku ní. Atimbun bintindi náań nì tinyiŋgban nín yíkí ki yāŋkí tɔb puee ní.

¹³Atimbun gbanti wooku náań nì nnyiŋkpaam wooku ní. Ti-Dindaan kpìl̄-mì ní mì sáǹ ki nín cá ndandati, a lì kii dijool pu buŋku nín yòontí timɔkulindi ki féeń puee, kii kubuŋu nín yòontí kikuŋkumbɔŋ biliŋ puee, a lì kii kubuŋkpaaŋŋu nín yòontí kukpɔŋkpɔŋu puee.

¹⁴Kujoouee, an sá dinyoondi ní, ama ku dāa lì yii ku wúntée, bi wáŋkì. Binib bin dòoń ki fúkuĺ-ti ki gbákaĺ-tee, kun dɔ̄ ki cí-bee dee.