Read Ntcham Esaïe 18 Bible Online

Esaïe 18 - Ntcham bible

Esaïe 18

¹Mbusu dɔ̄ ki cí sii kitiŋ kin ŋaliŋfii cáá ifeen ili, ki dɔ̄ ki nóó Kuusi buŋyee.

²A tūǹ ituun i kàal̀ tikati ŋaliŋfii poon ki còom̄ Niil mɔɔl pu. Nimbi ituun in yáb̀ee, nín̄ gítímaan. Ní gítímaan ni-nibul din nib fɔ̀kɔ̀ bi-wunti jɔ̀m̀ee cee, dinibul din bi fàŋkí duulinyanee cee, dinibul din pɔ̄ɔ̄ ki tà ki mátí di-nannanliibee cee. Ní fàtīí gítí ni-tiŋki kin ní ibun yākatèe cee.

³Nimbi bin kɔkɔ kóò duulinyanee, nimbi bin kɔkɔ kpátìi gbí kitiŋ puee, bi yaa láa cóoǹ kiŋaabiki ajoon puee, ní dāá kpèèmaan, bi yaa láa búń ŋyinee, ní dāá pīlifìmaan!

⁴Di sá yii ti-Dindaan di tùkū-mi yii: «M làá nīn kā m-kɔŋkooŋŋun yilpu ní ki kpèeń tin bíi jītí taapuee soooo, kii ŋwìiń nín ŋmíntí ŋu-walifiŋu tùm̀ puee, kii dimalindi nín tòó kudiceeu yuntiŋu puee.»

⁵Di sá yii, kí wàatī bí kìtī fiinyi biliŋee, ŋyunti ŋun fiinyi sufii púkuḿ ki dóòyee, ŋyunti ŋun mpumpukum kpántì asubil ki bīńee, bi dùŋfī kijiki ní kí gāā mpambiyaamu mun kaa lòoǹee, ní kí páká asupɔmbil nì tifaal.

⁶Bi làá dāá dū Asuur yab kí tīī kaajiikub bin bí ajoon puee, nì ipeecuncuti in bíń kupɔɔunee. - Kaajiikub làá dāá nīn jīǹ niin dipeel pu, ní ipeecuncuti ń dāá nīn jīǹ niin kuseeun -.

⁷Ŋyunti gbantee, bi làá dāá cáań tiwampɔkaal kí tīī ti-Dindaan Mpɔŋkɔdaan. Án dāa sá dinibul din yab fɔ̀kɔ̀ ní bi-wunti jɔ̀m̀ pɔ́lpɔlee ní. Kitiŋ pu nib kɔkɔ fàŋkí-bi ní yɔ́kɔ́ yɔkɔ. Dinibul gbanti nib cáá mpɔn ní ki tà ki mátí bi-nannanliibi, ní ibun cúú bi-tiŋki ki yākatì. Bi làá dāá cáań an wampɔkaatee Siiyɔn jool pu, laakin ní bi jáaḿ ti-Dindaan Mpɔŋkɔdaanee ní.