Read Ntcham Esaïe 19 Bible Online

Esaïe 19 - Ntcham bible

Esaïe 19

¹Tibɔti tin Unimbɔti sòon̄ Eejipiti tiŋki puee sèé. Kpèè, ti-Dindaan di kāń ditagbandi din yáb̀ee pu ki jàkà ki dòoń Eejipiti tiŋkinee. Tifaandi kɔ́ Eejipiti waaŋi u-nimbiin, ní Eejipiti yab bi-ba pɔbil bíil̀ tikpil[54].

²Ti-Dindaan bí yii: «M làá jáaǹ Eejipiti yab, unil nì u-nabiki làá nīn jáà, ní unil nì u-juti ń nīn jáà. Kitiŋ kiba làá nīn jáà nì kin kíǹ, ní dibeel diba ń nīn jáà nì din kíǹ.

³M làá yàntī Eejipiti yab wunti ń yɔ̀tī, kí yàntī tin bi bɔ́ntì kí ŋée ń gbíntí fám. Niinee bi làá cù bi-waaŋi nì bin yíì bitaŋkpiibee nì bi-bɔɔbi cee dibalifil.

⁴M làá dū Eejipiti yab kí ŋá bikpilib bin bɔti pɔ̄ɔ̄yee ŋaan. Ubɔti un cáá mpɔnee di làá jī dibeel bi-pu.» Ti-Dindaan Mpɔŋkɔdaan di lī míǹ.

⁵Niil mɔɔl làá fóotí, dimɔɔl gbanti làá kpā.

⁶Ibun làá dāá nūukì, Niil buntaaŋi poonee, nnyim làá dāá fóotí ní ŋí kpā, ní tikati nì dikal ń dāá yɔ́ĺ.

⁷Timool tin nyēē Niil mɔɔgbandi nì laakin ní di-nyim dì ki kóò tiŋkunee, tikpaajin tin bi kùn̄ dimɔɔgbandee làá kpā. Kubuŋu làá yòon̄ kí fá, ní báà tiba kaa ti làá kíń ki yú.

⁸Bijɔncuuliibi làá dāá yāliŋkì. Bin kɔkɔ tòó ijɔmpiin Niil mɔɔlinee, làá nīn bí kunimbaaun ní bin tòó tilaandi di-nyiminee wunti ń yɔ̀tī ní án wà-bi tikpil.

⁹Icoo cúú bin bɔ́ntí gulfapiin un bí fálfalee, nì bin cáa lùee.

¹⁰Bisataluliibi naŋki làá nyā nì bi-ba, ní bitɔntɔnliibi kɔkɔ wunti ń yɔ̀tī.

¹¹Soowan bɔtibiliŋ sá bigbaambi ŋma ní. Biciŋfitiibi bin sáŋkí Faarooyee kaa nyí tiba. Mana ní ni ŋūǹ kí tùkù Faaroo yii: «Ti sá biciŋfitiibi naantiibi, ti sá dooooyee bɔtiibi naantiibi ní?»

¹²Faaroo, a-ciŋfitiibee bí la sɔ̀? Bí lēē kí dàkà-si á béé tin ní ti-Dindaan Mpɔŋkɔdaan bɔ́ntì kí ŋá Eejipiti tiŋkee!

¹³Soowan yab bɔtibiliŋ kpántì bigbaambi, ní Nɔfi yab kpilib bíi kíiĺ bi-ba. Bíǹ bin bàà sá yii bí kpòotī Eejipiti tiŋkee, bíǹ di bíi gáatí-kì.

¹⁴Ti-Dindaan dū kunyiŋfuŋfuŋu fam ki tɔ́ bi-pu, ki yāntì Eejipiti yab kaa bá ki pɔ̄ɔ̄, kii udanyɔgbil nín kpìntī ki wùliŋkī puee.

¹⁵Diyileeee, dijuuleeee, kukpakpaliueeee, kukaluueeee, ubɔ kaa dāa ŋūǹ kí ŋá tiba kí tīī Eejipiti.

¹⁶Ŋwindalee, Eejipiti yab làá dāá nīn bí kii binimpoobee ní. Dinyoondi làá dāá kɔ́-bi ní bi-wunti jìkì ŋyunti ŋun bi yaa láa ká ti-Dindaan Mpɔŋkɔdaan tāntì u-ŋal kí dáaĺ bi-tafalee.

¹⁷Juuda tiŋki làá dāá yàntī dinyoondi ń kɔ́ Eejipiti yab. Bi yaa láa pée pútì Juuda tiŋki yindi bi-ceeyee, ní bí kíĺ ki bíi jìkì tin ti-Dindaan Mpɔŋkɔdaan sòon̄ ki yóoǹ kí ŋá-bee pu.

¹⁸Ŋwindalee, binib làá dāá sòoǹ eebru sooŋyi Eejipiti timmu muŋmoo poon ní, kí dāá pùtī kí pòon̄ yii bi làá nīn kíǹ ki jáaḿ ti-Dindaan Mpɔŋkɔdaan baba. Ntimu gbanti kiba ní bi dāa yíì yii Iir-Ayeereesi, taapu di sá yii «ŋwìiń tiŋki»[55].

¹⁹Ŋwindalee, bi làá dāá mā ti-Dindaan nsaraafan Eejipiti tiŋki pɔ̀ti pu, ní kí dāá cóoń ditaŋkpal Eejipiti tiŋki kpaanyɔkɔki kí nīn téetí ti-Dindaan pu.

²⁰Án di dāa sá kudaaŋŋu yii ti-Dindaan Mpɔŋkɔdaan bí Eejipiti tiŋkin. Eejipiti yab yaa láa kúuǹ ki yíiń ti-Dindaan bin bíi wɔ́b̀-bee puee, u làá dāá tɔ̄ ufiil ubɔ ú cùú mɔ̄tì bi-pu ní kí fīī-bi kí líí.

²¹Niinee, ti-Dindaan làá dāá lēē u-ba kí dàkà Eejipiti yab, ní bíǹ ń dāá béé-u. Bi làá dāá ŋá saraabi kí cáań tiwampɔkaal kí jāam̀ ti-Dindaan. Bi làá dāá pòon̄ ti-Dindaan ipoon ní kí dāá ŋá tin ní bi pōoǹee.

²²Ti-Dindaan làá dāá dáaĺ Eejipiti yab tafal. U làá dāá fáá-bi, ama ní kí cáaǹ-bi. Bi làá dāá fàtīí gítí ti-Dindaan cee, ní ú fōō bi-wimmeem kí cáaǹ-bi.

²³Ŋwindalee, didandi làá dāá nyā Eejipiti tiŋkin kí cù Asuur tiŋkin. Asuur yab làá dāá dāan̄ Eejipiti yab tiŋkin, ní Eejipiti yab mun ń cù Asuur yab tiŋkin. Eejipiti yab nì Asuur yab làá dāá kpāfì kí jāam̀ Unimbɔti.

²⁴Ŋwindalee, ti-Dindaan làá dāá bìin̄ duulinya pu: Isirayeel tiŋki làá dāá nīn sá kitintataatii kin pu u làá bìin̄ee, kí kūtì Eejipiti nì Asuur timmu pu.

²⁵Ti-Dindaan Mpɔŋkɔdaan làá dāá bìin̄ duulinya pu kí lì yii: «M bīiǹ Eejipiti yab m-nibul pu, ki bīiǹ Asuur yab bin m náań nì m-ŋaliiyee pu, ní ki bīiǹ Isirayeel yab bin ní m gāntì ki yóoǹ m-bee pu[56].»