Read Ntcham Esaïe 2 Bible Online

Esaïe 2 - Ntcham bible

Esaïe 2

¹Tibɔti tin an lēē ki dàkā Amɔtisi jipɔɔn Yeesaya Juuda beel nì Jeerusaleem tiŋki puee sèé.

²Ŋwiin bí ki dòoń, dijool din pu ti-Dindaan diiku tɔ́kɔ́ee làá dāá lìbitī ajoon kɔkɔ pu. Di làá dāá nīn fɔ̀kɔǹ ŋgbantamu kɔkɔ[7]. Anibul kɔkɔ làá dāá nīn bìtifī ki dòoń di-cee.

³Anibul tikpil làá dāá tàkan̄ nsan ki cá ki lì yii: «Dāam̄maan! Tí jɔ̄m̀maan ti-Dindaan jool pu, tí jɔ̄m̀maan Jaakɔb Nimbɔtiu diikun. U làá tin dàkà-ti tin ní u là tí ŋée, ní tí nóó u-sàmbiyaamu pu.» Tiŋman, Siiyɔn ní Mara làá nyānní, u-nyɔɔbundi làá nyānní Jeerusaleem ní.

⁴U làá dāá sòoǹ kí ŋāŋkì atimbun kansikin bɔti, kí dāá pàtī anibul tikpil bí taa ti já. Bi làá dāá dū bi-tàataajimmu kí mɔ́ɔ́ akoo, ní kí dāá dū bi-kpammu kí mɔ́ɔ́ igɔti[8]. Ditimbundi diba kaa dāa gíti jáà nì di-juti, ní binib kaa dāa gíti bífí bi nín jáà kujaau puee.

⁵Jaakɔb naantiibi, dāam̄maan tí còom̀ ti-Dindaan walifiŋun.

⁶Ti-Dindaan, a dū a-nibul Jaakɔb naantiibi ki fá. Kun puee ŋwìiń nyalaŋki pú bɔɔbi di kíǹ ki gbí bi-tiŋkin. Bin kpèé iŋmalbijaa ki cáa būū tibɔɔlee gbóotì kii Fiiliistii yab ceeyee. A-nibul nì binicambi di kíǹ ki sòoǹ ki ŋàatī tɔb pu.

⁷Animbil kúti nì sindaariya gbí bi-tiŋkin, ní ki-gaajawanti wīikí tikpil an kaa cáá bí lì. Itaamu gbí bi-tiŋkin, ní bi-janjatɔrɔkub wīikí tikpil.

⁸Awaa gbí bi-tiŋkin, bi gbàantí ki jáaḿ awaa, tiwan tin bi dū bi-ŋalii ki mɔ́ɔ́yee.

⁹An pu ní binib kɔkɔ làá nīn dɔ̄ kitiŋ ki fìlim̀, ama ti-Dindaan, á taa yòon̄-bi kí síiń.

¹⁰Kɔ́maan kí báĺ itaŋkpalɔkɔ poon, ní kɔ́ kitiŋ taapu kí báĺ kí sāǹ ti-Dindaan ŋuukpaandi, kí sāǹ u-kpaanti nín ŋmóò pu nyàlibuee nimbiin[9].

¹¹Unil un yòontí u-ba yilpuee làá dāá tìntī u-yil, bilambidambi làá dāá sìntī bi-ba taapu. Ŋwiin gbantee, ti-Dindaan baba ní bi làá dāá tīī tinyool.

¹²Di sá yii ti-Dindaan Mpɔŋkɔdaan lēē ŋwiin ŋun ní u làá dāá sòoǹ bilambidambi nì bin dàkà bi-bee nì binib bin yòontí bi-ba yilpuee bɔti, ní kí dāá sìntī-bi taapu.

¹³U làá dāá sòoǹ Leebanɔn tiŋki sufii in bi yíì seedir i fɔ̀kɔ̀ tikpilee bɔti, kí dāá sòoǹ Baasan tiŋki waasufii in bi yíì seenee bɔti,

¹⁴kí dāá sòoǹ ajoon ŋin fɔ̀kɔ̀ee kɔkɔ bɔti, kí dāá sòoǹ ŋgbantamu mun dúkutèe kɔkɔ bɔti,

¹⁵kí dāá sòoǹ adiin ŋin fɔ̀kɔ̀ líkí likee kɔkɔ bɔti, nì agun ŋin baa ŋūǹ kí dàb̄ee kɔkɔ bɔti,

¹⁶kí dāá sòoǹ Taarsiisi tiŋkin meelab kɔkɔ bɔti, ní kí dāá sòoǹ meelanyaambi kɔkɔ bɔti.

¹⁷Unil un yòontí u-ba yilpuee làá dāá tìntī u-yil, bilambidambi làá dāá sìntī bi-ba taapu. Ŋwiin gbantee, ti-Dindaan baba ní bi làá dāá tīī tinyool.

¹⁸Awaa kɔkɔ làá dāá wāŋkì.

¹⁹Kɔ́maan kí báĺ itaŋkpalɔkɔ poon, ní kɔ́maan kí báĺ afaginni kí sāǹ ti-Dindaan ŋuukpaandi, kí sāǹ u-kpaanti nín ŋmóò pu nyàlibuee nimbiin, u yaa láa yíkì ki bíi kɔ̄ntí kitiŋ kɔkɔ dinyoondee.

²⁰Yaadalee, binib làá dāá dū awaa ŋin bi dū animbil kúti nì sindaariya ki mɔ́ɔ́ ki gbàantí ŋi-nimbiin ki jáaḿee kí lúkú isiiboo nì tinanjin.

²¹Binib làá kɔ́ kí báĺ itaŋkpalɔkɔ poon, kí kɔ́ kí báĺ ntaŋkpafaŋfakamin kí sāǹ ti-Dindaan ŋuukpaandi, kí sāǹ u-kpaanti nín ŋmóò pu nyàlibuee nimbiin, u yaa láa yíkì ki bíi kɔ̄ntí kitiŋ kɔkɔ dinyoondee.

²²Ní taa nín̄ máká nisaaleen pu, kufoou kun u cááyee pu ní u bí. An yaa sá fám, unil sá ba?