Read Ntcham Esaïe 21 Bible Online

Esaïe 21 - Ntcham bible

Esaïe 21

¹Tibɔti tin ní Unimbɔti sòon̄ <tiŋku caŋin teeku> puee sèé. Kii kunaakpaabuŋŋu nín jītí Neegeeb tiŋki pu puee, míǹ ní unannanli nyánní kuteeu pú tiŋki, kitiŋ kin báà ŋma fàŋkée poon.

²Tibɔti tin m ká dileedakal poonee pɔ̄ɔ̄ tikpil. U nì un nìn pēē kinyɔkɔee nyáń u-boon, ní un nàantée bíi nàantí. Ti-Dindaan lī yii: «Eelam yab, cùú já nì kì! Meedii yab, cùú màntīí tū-kì! M làá kúntí iyaliŋki kɔkɔ.»

³M nín ká mimmee ní tiwool kɔ́-mi. M gbìl̄ iwàlfi pu kii imatiŋweenee. Kunimbaau kɔ́-mi ki yāntì m-tafaliŋ kpáá, dinyoondi kɔ́-mi ki yāntì maa ti wāĺ.

⁴M-pɔbil bíil̀ ní tifaandi kɔ́-mi m-wunti kíǹ ki jìkì. M nín bàà kā ki cí yii án sɔ̀ŋkì m-pu kujoouee, ní an dūu kpántì-mi dinyoondi.

⁵Bi síiǹ teebilib ki kpátì iŋaabu ki bīiǹ, ní binib kíĺ ki bíi jīǹ ki nyù. Kpalaayee ní ubɔ téeń yii: «Bijanjakpilib, yīkìmaan, ŋmìtī ni-gbampɔɔŋi ŋkpam!»

⁶Ti-Dindaan nín sòon̄-mi puee sèé: «Cùú yóoń un làá nīn cí sintilee, tin ní u làá kée, ú dūú bāakì.

⁷U yaa láa ká janjatɔrɔku páaǹní itaamu ili dátée, ki ká binib kā mmamu pu àá binib kā igutaamu puee, ú dāá kpèè tiŋan, kí gíti kpèè tiŋan!»

⁸Ní un bí ki kpèéyee téeń ki lī yii: «Ukpil, ŋwiimpu kɔkɔee, m yú laakin ní m cée, kunyeeu mun kɔkɔee m yú laakin sá ḿ nīn yú ki cée ní.

⁹Kpèè, unil ubɔ di dòońee. U kāń janjatɔrɔku pu itaamu ili dátí-u. U bí ki sòoǹ ki lì yii: <Kitiŋee lítì ní, Babiloon tiŋki lítì. Awaa ŋin ki-nib jáaḿee kɔkɔ dɔ̄ kitiŋ ki wīil̀.>

¹⁰«M-nibul, sii un ní ti-Dindaan gbáń kii bi nín gbáà bilee dinaapaal pu puee, ti-Dindaan Mpɔŋkɔdaan, Isirayeel Nimbɔtiu cee ní m gbìl̄ an bɔti, ní ki cáa bíi nàatī-si.

¹¹Unimbɔti sòon̄ Duuma tiŋki pu. Ubɔ sòon̄ní-mi doooo Seeyiir tiŋkin ki lī yii: «Uciitil, kunyeeu dáá dátàaa? Uciitil, kunyeeu dáá dátàaa?»

¹²Ní uciitil kíí yii: «Kutaa bíi wúntí, ama kunyeeu làá gíti mɔ́. Ni yaa là bí kíí-nee, ní fàtīí gítiń kí bàlifì.»

¹³Tibɔti tin Unimbɔti sòon̄ Bilaalibub tiŋki puee sèé. Nimbi Deedan yab bin kā igutaamu ki jītée, bilaalibub tiŋki bambaŋkun ní ni làá dòon̄ díǹ nyeeku!

¹⁴Nimbi bin kóò Teema tiŋkinee, tīīmaan bin nnyinnyoo cááyee nnyim bí nyɔ̀, kí tīī bin sáń kí ŋmátée tijin bí jī.

¹⁵Kun puee bi bíi sáń ntàataajimu mun bi dáaĺ ki fúutì kujitoounee, ki bíi sáń itɔfi in bi dáaĺ ki làá tɔ̄ee, ki bíi sáń kujaau nín yíkìi pɔ́ɔkì puee.

¹⁶Di sá yii ti-Dindaan nín lī-mi puee sèé: «Kí yòon̄ díǹ kí cáá sāā dibindi deedeeyee, Keedaar yab nyooti kɔkɔ làá kúntí.

¹⁷Keedaar yab kansikin bibaatandambi bin tòó ipiinee kaa làá dāá kíń ki náaǹ.» Ti-Dindaan, Isirayeel Nimbɔtiu di lī míǹ.