Read Ntcham Esaïe 22 Bible Online

Esaïe 22 - Ntcham bible

Esaïe 22

¹Tin Unimbɔti lī Dileedakal Tantakal puee sèé. Jeerusaleem, ba ŋá ní a-nib kɔkɔ jɔ́m̀ adiin yilpu ní?

²Ba pu ní a sá kitiŋ kin poon kuwoou bí, an tùm̀ dàii, ki bí jiŋaal poonee ní? Kitàataajiki ní baa dūu kūū a-nib bin kpíìyee, an kaa sá kujaau poon ní bi kūū-bi.

³A-janjakpilib kɔkɔ sáǹ ki kátì pílpil, bijanjaliibi bin tòó ipiinee dū-bi ki kpántì bisarkadambi. Bi nìn cúú bin kɔkɔ bi nìn pée kée dicilpu, ŋyunti ŋun bi nìn bíi sáńee.

⁴An pu ní m bí-ni yii: «Ní yàntīmaan ḿ sɔ̄ lɔ̀lɔ. Bi nāaǹ m-nibul, ama ní taa màkan̄ kí sɔ̀ŋkì m-pɔbil.

⁵Di sá yii díǹ wiiŋŋu nee, ti-Dindaan Unimbɔti Mpɔŋkɔdaan dū fìkil fikil nì dilitil nì dinyoondi ki tɔ́ń ti-pu.» Dileedakal Tantakal poonee, bi wīī digundi din māntìi tú kitiŋee, ní ibiil fōō ki píĺ bin bí ajoon puee ń jòoń-bi.

⁶Eelaam yab yōoǹ abaatan ki bàl̄. Bijanjaliibi bin nìn kā janjatɔrɔkub puee nìn bí ní bitanjakaliibi mun bí. Kiiri janjaliibi bɔ́ntì bi-gbampɔɔŋi.

⁷Jeerusaleem, janjatɔrɔkub gbí a-tantakaŋ ŋin ŋān̄ee poon, ní bitanjakaliibi yú a-punyɔkɔpu kí já nì si.

⁸Juuda beel kaa ti cáá diwundi. Yaadalee, ni fātì ni-nimbikpeeŋu ki túĺ tijanjawan tin bí <Kubambaŋŋu diikunee>[57].

⁹Digundi din māntìi tú Daafiidi Tiŋkee, ni ká laakin bátì bátì ki lítèe nín wīikí puee. Ni kpáafì nnyim dinyimbɔbil din bí taapu púee poon.

¹⁰Ni kàan̄ Jeerusaleem diiŋŋi, ni wīil̀ aba kí mɔ̀tīí tīī kitiŋ gundi mpɔn.

¹¹Ni gbìn̄ dinyimbɔbil agun ali kansikin kí ŋmā kí dáaliń dikpikilee nyim. Ama naa fātì ni-nimbikpeeŋu ki túĺ un ŋá tíǹ kɔkɔee, kaa béè un di túń an tundi ki síiǹ dooooyee.

¹²Yaadalee, ti-Dindaan Unimbɔti Mpɔŋkɔdaan nìn yíiń-ni ní sɔ̄ kí yāliŋkì, kí kòol̀ ni-yiliŋ ní kí dū kpɔsatab kí pèen̄.

¹³Ama kpèèmaan, ni bí ifaal nì mmɔnni! Ni bí ki kù inaa, ki làntī ipii, ki ŋmóò tinan ní ki nyù ndamam ki lì yii: «Tí jī kí nyɔ̀maan, kun puee fool ti làá fu kpú.»

¹⁴Ama ní ti-Dindaan Mpɔŋkɔdaan sòon̄ tibɔti nee an kɔ́ m-tafalin yii: «M pée kpá kí dū ikpiti nee kí pɔ̄-ni kí tin sāā ni-kúm dal.» Ti-Dindaan Unimbɔti Mpɔŋkɔdaan nín lī puee dee.

¹⁵Ti-Dindaan Unimbɔti Mpɔŋkɔdaan bí-mi yii: «Cù kí tùkù ubɔti tɔntɔŋkpiliu Seebina un kpèé dibeecindi tuuŋŋee yii:

¹⁶<Ba ní a cáá doo nee ní? A-yaaja ulɔu di bí doo ní a yāntì bi gbìn̄-si dikaakul doo? Bi gbìn̄-si dikaakul kigbantaŋ yilpu, ki lùkū ditaŋkpal ki bɔ́ntì-si ŋkɔŋkoon.

¹⁷Kpèè, ti-Dindaan làá tɔ̄-si kí fá ndan, u làá gúĺ-si kí bíĺ.

¹⁸U làá kúntí-si á kpántí kii dinantaŋkulee, kí dū-si kí tɔ̄ á tin lítí kitiŋ kin wāāyee poon. Niin ní a làá tin kpú, niin mun ní a-janjatɔrɔkub bin yì a-nyootee làá tin gbíntí, sii un sá icoo ki tīī a-kpiliu dicaŋkuee!>

¹⁹M làá dāá jà-si mpaan ŋun pu a kēe, m làá dāá fōō tikpiti paaŋŋu ŋun pu a bée.

²⁰Yaadal gbantee, m làá dāá yíiń m-tɔntɔnliu Eeliyaakiim, Ilikiyawuu jipɔɔn.

²¹M làá dāá dū a-bɔkutil poon yal kí pèen̄-u, kí dāá dū ŋŋaabu dambalau un a gbìǹee kí gbìn̄-u, ní kí dū mpɔn ŋun ní a cááyee kí tīī-u. U làá dāá nīn sá ubaati ní ki tīī Jeerusaleem yab nì Juuda beel kɔkɔ yab.

²²M làá dāá dū Daafiidi beel saafiiu kí ŋúbiǹ-u. U yaa láa pīitì kipunyɔkɔee, ubɔ dāa kpá kí pìin̄, u yaa láa tí dūu pīiǹee, ubɔ dāa kpá kí pìitī.

²³M làá dāá cóoń-u kii dikpakpaalee, mpaan ŋun pu u làá nīn cɔ́ ki pɔ̄ɔ̄ tiŋanee. U-pu ní u-baa dicaŋku kɔkɔ làá dāá ká tinyool.»

²⁴U-baa dicaŋkun nyooti kɔkɔ làá nīn lúń úǹ baba pu ní, kii bi nín dù tisamɔŋwan kí yòon̄ asambil kí cáá sāā aboon kí lúntí dikpakpaal pu puee ní.

²⁵«Ŋwiin ŋubɔee, dikpakpaal din bi cóoǹ laakin pɔ̄ɔ̄ tiŋanee làá gíí kí kɔ̄fì ní kí lítí kitiŋ, ní diwaŋgul din nìn lúń di-puee kɔkɔ ń bīil̀.» Ti-Dindaan nín sòon̄ puee dee.