Read Ntcham Esaïe 23 Bible Online

Esaïe 23 - Ntcham bible

Esaïe 23

¹Tin ti-Dindaan sòon̄ Tiir tiŋki puee sɔ̀[58]. «Nín̄ yáliŋkímaan, Taarsiisi meelab! Bi nāaǹ Tiir tiŋki kɔkɔ, báà kudii kaa kíǹ.» Bi bàn̄ Kiitiim tiŋkinee ní ki gbìl̄ an bɔti gbanti.

²Ní ŋmīĺmaan fɔ́ŋfɔŋ nimbi bin kóò ditiŋkugbandee, nimbi Siidɔn nyampoobi bin tūǹ binib bi dùtī tiŋkuee.

³Tin bi būul̀ Niil mɔɔl puee, nì tin bi cēē di-gbándee di sá Siidɔn gaajati. Kíǹ di nìn kpántì atimbun kɔkɔ nyɔŋki.

⁴Siidɔn tiŋki, icoo ń cúú-si, sii un di sá tiŋku balilaŋkee. Di sá yii tiŋku sòon̄ yii: «Maa làá yāliŋkì imatiŋween ní kaa nín màl̄ kibiki. Maa làá kpàà binaacimpɔmbi, ní kaa nín kpēē bisapɔmbi bi cíkitì.»

⁵Eejipiti yab yaa gbìl̄ tibɔti nee, dinyoondi làá cúú-bi kii bi nín gbìl̄ Tiir yati an cúú-bi puee.

⁶Ní dùtīmaan tiŋku kí cù Taarsiisi tiŋkin, yāliŋkìmaan, nimbi bin kóò ditiŋkugbandee!

⁷Ni-tiŋki kin nìn nyìm̀ ki sá kitiŋkpiŋkpikiiyee sɔ̀ɔɔ? Kitiŋ kin nìn cūtì ndandati ki jáń ki fōō ntimu ki kāl̀ee sɔ̀ɔɔ?

⁸Tiir tiŋki nìn yàkatī mbeefuulimu ní. Ki-nyampoobi sá kii abɔtibilee, ní ki-wannyafiliibi sá binikpaambi kitiŋ pu. Ŋma di lēē ki síiǹ yii bí bīil̀ kitiŋ gbanti ní?

⁹Ti-Dindaan Mpɔŋkɔdaan di sòon̄ ki yóoǹ míǹ, kí bīil̀ bin bi tìì jilmee lambil, kí sìntī kitiŋ nee pu nikpaambi taapu.

¹⁰Tiir yab, cùú nīn kùmaan ni-kpaatanti, kii bi nín kù Niil mɔɔgbandi puee, di sá yii naa ti cáá laakin meelab sīlifée.

¹¹Ti-Dindaan tāntì u-ŋal tiŋku pu ki yāntì abee cīŋkì. U tīī mara yii bí kpìtī Kanaan tiŋki laakin bi wúń tiŋanee.

¹²U bí yii: «Siidɔn yab, ni kpá kí gíti jī jiŋaal, ni bí kii usapɔɔn un bi bíil̀ee ní! Báà ni yaa kíĺ nsan ki cūtìi póotì Kiitiim tiŋki, naa làá ŋmā kí ká niin mun diŋuŋfil.

¹³Kpèèmaan Kaldee yab tiŋki, dinibul gbanti kaa ti bí kitiŋ pu. Asuur yab dū-kì ki kpántì laakin ní ilambunti kóòyee. Bi máń adifɔkɔ ŋin pu bi yūlifí sintilee, ki wīil̀ ki-dinyaaŋŋi ní ki yāntì kì kpántì adigbun ŋma.

¹⁴Nín̄ yáliŋkímaan, Taarsiisi meelab, di sá yii bi wīī ni-balilaŋki.»

¹⁵Ŋwiin gbantee, bi làá dāá súntí Tiir tiŋki pu abin imuŋku ita nì saalaa, an dàkà yii ubɔti maŋfal wiiŋyi nín sá puee. Abin imuŋku ita nì saalaa gbanti boonee, án làá dāá ŋá Tiir tiŋki kii bi nín gà kinimpulaakpaai nlan puee yii:

¹⁶Sii kinimpulaakpaai kin pu bi súntèe, yòon̄ kubeeu[59] kí yìiǹ kí màntī kitiŋ nee kɔkɔ! Bɔ̀ɔ̀ kubeeu tiŋan, gāā a-laŋyi kí fàtīí gāā, án nín làá ŋá pu binib ń téetí a-puee.

¹⁷Abin imuŋku ita nì saalaa gbanti boonee, ti-Dindaan làá dāá sɔ̄ Tiir tiŋki saai. Kì làá dāá fàtīí ká animbil. Kì làá dāá kíĺ kí nīn ŋáań tilaakpaal kitiŋ pu doo beeŋi kɔkɔ poon.

¹⁸Ama bi làá dū ki-paatii nì ki-paati kɔkɔee kí sú ti-Dindaan ní. Baa làá dāá kóoǹ-tì kí kpāfì, kaa làá dāá kpāafì-tì mun. Bi-paati ní bi làá dāá nīn cáa dāā tijin ki kpīintí binib bin bí ti-Dindaan nimbiin ki tūǹ u-tundee bí jī kí díkí, ní kí kíń kí dā tiwannyaandi kí pèen̄-bi.