Read Ntcham Esaïe 24 Bible Online

Esaïe 24 - Ntcham bible

Esaïe 24

¹Kpèè, ti-Dindaan làá nàan̄ kitiŋ kí bīil̀-kì, u làá kpēelikì-kì ní ki-nib kɔkɔ ń yàl̄.

²Tin làá bàń usaraaŋalee di làá bàń unifantanti, ukpil nì u-tɔntɔnliu, unimpu nì u-yumbusapɔɔŋwu, uwandal nì unyampu, un pìntée nì un bi pìntée, un bi cáá dipɔndee nì u-pɔ̀nliu.

³Bi làá nàan̄ kitiŋ ní kí fūkul̀ ki-wanti pílpil. Di sá yii ti-Dindaan di sòon̄ an bɔti ki yóoǹ.

⁴Kitiŋ bí ki yáliŋkí ki nàantí ki cá. Duulinya kɔkɔ bí ki kōō ki nàantí ki cá, kitiŋ bíi bíiĺ ki kpáaǹ yilpu.

⁵Kitiŋ pu doo nib kɔ́ǹ-kì tijɔkɔndi, di sá yii baa nóó Unimbɔti marab, kaa dū u-bɔkpaaŋi ki yíiń tiba, ní ki kpītì u-poondi din bí ki cá talkuee.

⁶An pu ní mbusu jéetì kitiŋ pu kii ŋŋmi nín fòol̄ tiwan kí wà búkú buku puee, ní ki-nib fōō bi-kpitii tafadaaldi. An pu ní kitiŋ pu nib bíi kúù kúù, ki kíǹ fiii.

⁷Ndapɔm bɔti dūu pɔ́ɔkì, fiinyi sufii kɔkɔ yɔ́ĺ yɔ́ĺ, ní bin nìn fàal̀ee kíǹ ki yáliŋkí.

⁸Bi nín bɔ̀ɔ́ agaŋgan an mɔ̄ puee kaa ti bí, binib nín jīǹ jiŋaal ki tátí puee gbēeǹ, ní bi nín bɔ̀ɔ́ tibati an mɔ̄ puee kúntì.

⁹Binib kaa ti nyù ndamam ki gà ilan, ndaam min pɔ̄ɔ̄yee kíǹ ki tū ní binyɔliibi cee.

¹⁰Kitiŋ kin kaa bí tibanee kpántì adigbun ŋma, adiin kɔkɔ pīī báà ubɔ kaa ŋūǹ kí kɔ́.

¹¹Binib bí adan pu ki yáliŋkí yii ndaam kpá. Mmɔn kaa ti bí, ní dipɔɔpindi kúntì kitiŋ nee pu.

¹²Adigbun di kíǹ ki yú kitiŋee poon, ní bi gbáń ki wīī ki-punyɔkɔki kɔkɔ pílpil.

¹³Kitiŋ nee puee, án làá nīn bí anibul kansikin kii bi nín yaa kītì ɔliifi biliŋ, àá bi nín yaa kītì fiinyi biliŋ ki dóò ŋin kīntí isufi pu bí lūlifèe ní.

¹⁴Binib bin ŋmátèe bíi tátí ki fàal̀, bi bíi gà ilan ki sòoǹ ti-Dindaan kpaanti pu. Bi nyánní ŋwìiń jeetilaŋki pú ki kūuntí nì dipɔɔpindi.

¹⁵«Nyɔ̄ŋkìmaan ti-Dindaan, nimbi bin bí ŋwìiń nyalaŋki púee. Nimbi bin kóò ntimu mun nnyim māntìi túee, nyɔ̄ŋkìmaan ti-Dindaan, Isirayeel Nimbɔtiu yindi.»

¹⁶Ti gbìl̀ ilan tùm̀ kitiŋ kúntilaŋki ki lì yii: «Deedeedaan ń ká tinyool!» Ama man bí yii: «An dóò m-pu ní! An dóò m-pu ní! Nnaabu ŋulɔŋu dee!» Binib bin nyēē bi-jutiibi boonee bí ki nyēē, bi nyēē bi-jutiibi boon an kaa cáá yii bi gbēeǹ.

¹⁷Tifaandi nì mbòó nì kulaaŋŋu dɔ̄ ki cí nimbi bin kóò kitiŋ puee.

¹⁸Un yaa láa sáǹ ki nyáń tifaandi ŋaanee, làá dāá jēetí mbòó poon ní. Un yaa láa ŋúń ki nyáń mbòó poonee, kulaaŋŋu poon ní u làá dāá kɔ́. Di sá yii yilpu tɔkɔlab cúu pīitì, ní kitiŋ nyeel cīŋkì.

¹⁹Kitiŋ fáá fáá iwèeń, kì cīŋkì ki wīī.

²⁰Kitiŋ bíi kpìntī kii udanyɔgbilee, kì cìŋkī kii kibiŋ ní kubuŋu cìŋkēe. Ki-kpitii nyìm̀ ki-pu, kì lítì ní kaa ti ŋūǹ kí yīkì.

²¹Ŋwiin gbantee, ti-Dindaan làá já nì ipɔn in kɔkɔ pée bí yilpuee, nì bibɔtiibi bin bí kitiŋ puee.

²²Bi làá dāá kóoǹ-bi kí kpāfì dicilpu kubòóun. Bi làá dāá dū-bi kí pìin̄ kusaarkadiin. Bi làá dāá kàl̄ niin kí yúntí ní bí dāá sòoǹ bi-bɔti.

²³Icoo làá cúú uŋmal nì ŋwìiń. Di sá yii ti-Dindaan Mpɔŋkɔdaan làá nīn sá ubɔti Siiyɔn jool pu, an dàkà yii Jeerusaleem tiŋki pu. U-nyooti làá nīn jìl̀ bitindaŋkpilib nimbiin.