Read Ntcham Esaïe 25 Bible Online

Esaïe 25 - Ntcham bible

Esaïe 25

¹Ti-Dindaan, sii di sá m-Nimbɔtiu. M làá yòon̄-si yilpu ní kí nyɔ̄ŋkì a-yindi. Di sá yii a ŋáaǹ maamaaci tuuŋŋi ŋin a bɔ́ntì ki yóoǹ dooooyee, ŋi pée bá ki pɔ̄ɔ̄ kaa kpántí.

²A dū kitiŋee ki kpántì ditaŋkpakpukul. Kitiŋ kin bi nìn máń digundi ki túee kpántì adigbun. Binicambi tiŋki kin nìn pɔ̄ɔ̄yee kaa ti sá kitiŋ, bi kpá ki làá gíti náań-kì dalba dalba.

³An pu ní dinibul din cáá mpɔnee tìì-si tinyool, bin néeń tipɔmbɔti tiŋkinee, binib fàŋkí-si.

⁴Di sá yii sii ní binandambi nìn sáń ki kóò, bifalaadambi nìn sáń ki kóò-si ní dinimbinaamandi yuntiŋu. Utaa yaa bíi nèe, sii di sá kibalilaŋ, ŋwìiń yaa tùm̀ee, sii di sá mboon. Di sá yii bin néeń tipɔmbɔtee bum sá kii utaakpaan nín gbáà digundi puee ní,

⁵a lì kii ŋwìiń nín gbáà kitiŋkuliŋŋi puee ní. A yāntì binicambi wooku ŋmíl̀, kii ditagbandi nín lìkintí ŋwìiń pu án sɔ̀ŋkèe ní. A yàntī bin néeń tipɔmbɔtee laŋyi ŋmīlifí.

⁶Ti-Dindaan Mpɔŋkɔdaan làá bɔ́ntí jiŋaal ubɔ dijool nee pu kí tīī anibul kɔkɔ. An dāa sá tijimmɔntiil nì ndamɔntiim ní jiŋaal gbantin, jiŋaal un poon bi dāa ŋmóò tinan tin mèeǹ, ki nyù ndaam min dōoǹ ki wāĺ kílkilee.

⁷Dijool gbanti puee, u làá cúú kpɔsata un anibul kɔkɔ lōōyee kí lēē, ŋŋaabu ŋun bīī atimbun kɔkɔ puee.

⁸U làá kúntí ŋkúm kí nīn cáa cá jaanjaan. Ti-Dindaan Unimbɔti làá pítí báà ŋma nyinnyim[60] kí nyāntí u-nibul icoo in cúú-bi kitiŋ nee poonee. Úǹ ti-Dindaan di lī míǹ.

⁹Ŋwiin gbantee, báà ŋma làá dāá lì yii: «Úǹ di sá ti-Nimbɔtiu! Ti nìn máká u-pu ní u fīī-ti. Úǹ ti-Dindaan pu ní ti nìn máká. Án nīn mɔ̄ǹ-ti tí nīn fàal̀ u nín fīī-tee pu.

¹⁰Ti-Dindaan ŋal làá nīn bīī dijool nee pu!» Ama u làá tāā tāā Moowaab tiŋki kii bi nín tà timool kí ŋmàlim̀ tinaabin poon puee ní.

¹¹Niinee, kì làá kpátí ki-ŋalii kii unyiŋwaŋkil nín kpátí u-ŋalii puee. Ama nì min kɔkɔ u bíi pɔ̄ɔntée, ti-Dindaan làá sìntī u-lambil taapu.

¹²Ti-Dindaan làá téé a-guŋŋi kí lúkú, aguŋfɔkɔ ŋin bi máń ki māntìi tú-see, u làá téé-ŋi ní ŋí lítí ntampukumin.