Read Ntcham Esaïe 26 Bible Online

Esaïe 26 - Ntcham bible

Esaïe 26

¹Ŋwiin gbantee, bi làá dāá gāā nlan nee Juuda tiŋkin: «Ti cáá kitiŋ kin pɔ̄ɔ̄yee. Kí ŋmā kí wúń ti-puee, ti-Dindaan dū agun ali ní ki māntìi tú-kì.

²Pìitīmaan mpunyɔmu kí wàan̄ ditimbundi din nib sá ibaamɔn dambi, ki yú nì Unimbɔti deedeeyee ń jītí kí kɔ́[61].

³Un di yaa nóó-si nì dipɔbil dibee, sii ti-Dindaan tìì udaan ŋgbansɔŋfi, kun puee sii baba pu ní u máká.

⁴Nín̄ mákámaan ti-Dindaan pu kí nīn cá jaanjaan, ti-Dindaan un di sá talku taŋkpalee.

⁵U téé bin nìn kóò ajoon yilpuee ki lúkú, ki nāaǹ kitiŋ kin báà ubɔ kaa nìn ŋūǹ kí já kí fōōyee. U téé-kì ki lúkú, ki dū-kì ki tɔ́ ntampukumin.

⁶Binib bin kaa bí tibanee, bin sá biwɔfibee, bíǹ di kíǹ ki tà ki-pu ki còom̄ bi nín là puee.»

⁷Deedeedaan saŋŋu tèen̄ ní, ti-Dindaan, a tàntī u-saŋŋu ní an kaa cáá disampɔl.

⁸Ti tàkā nsan ŋun a tīī-ti mara yii tí nóóyee pu, ti-Dindaan, sii pu ní ti máká. Tin ti lèe di sá tí yíiń a-yindi, kí dàkafì a-pu.

⁹Kunyeeuee, m-naŋki fèefī ki nyàab̀-si ní, m nyàab̀-si nì m-pɔbil kɔkɔ. Di sá yii a yaa bíi sòoǹ kitiŋ pu nib bɔtee, ní duulinya nib béetí tin di sá deedee bɔtee.

¹⁰Ama unil yaa súń binikpitib saayee, baa béetí tin bi máaǹ kí ŋá án fáatíǹ-see. Báà gba kitiŋ kin poon binib ŋáań tiŋanee, bíǹ ŋáań tin kaa ŋān̄ee ní, kaa wāĺ sii ti-Dindaan nín sá ukpaan puee.

¹¹Ti-Dindaan, a dúkutì a-ŋal kí dáaĺ bi-tafal, ama bíǹ kaa wāĺ-ŋu. Bi làá dāá ká a nín mɔ́tí a-nibul pu nì dineendee, ní icoo ń dāá cúú-bi. Ŋŋmi ŋun a bɔ́ntì ki síiǹ a-nannanliibee di làá dāá wà-bi[62].

¹²Ti-Dindaan, a tìì-ti dipɔɔsɔŋkil, ní tin kɔkɔ ti bɔ́ntì kí ŋée, sii di fōō ki ŋá ki tīī-ti.

¹³Ti-Dindaan ti-Nimbɔtiu, bikpilib bin kaa sá siiyee di nìn kpōotì-ti, ama sii baba yindi ní ti yíì.

¹⁴Bin kpíìyee kaa ti làá gítiń. Bin kaa ti bée kpántì kii mboonee ní, baa ti làá yīkì. Sii di dáaĺ bi-tafal ki nāaǹ-bi pílpil, ubɔ ń taa ti téetí bi-pu dalba dalba.

¹⁵Ti-Dindaan, a yāntì ti-timbundi wíiǹ, a yāntì ti-timbundi wíiǹ ki dàkā a-nyooti, a yāntì ti-tiŋki wāaǹ.

¹⁶Ti-Dindaan, dinimbinaamandi poonee, sii watil pú ní ti fàtī ti-nimbikpeeŋu kí túĺ. A yaa dáaĺ ti-tafalee ní ti kíǹ ki bí ki mèé-si.

¹⁷Ti-Dindaan, ti nìn bí a-nimbiin kii upɔdaan di làá màal̀ee. U yáliŋkí imatiŋween ní ki gbáà ibiil.

¹⁸Ti mun nìn cáá dipool, ki yáliŋkì imatiŋween, ama ní ki dāa dūu màl̄ kubuŋu. Taa nìn ŋúń ki cáań difiil kitiŋ pu, kaa tí ŋúń ki cáań binib duulinyan.

¹⁹A-yab bin kpíìyee làá fàtīí ká dimaŋfal, a-taŋkpiibi làá fìkitī. Binib bin dɔ̄ ntampukuminee làá fìntī ní kí nīn tátí nì dipɔɔpindi. Ti-Dindaan làá dāá tīiń-si ŋwalifi malindi, di-puee, kitiŋ ń dāá yàntī bitaŋkpiibi ń fìkitī.

²⁰M-nibul, yīkì kí kɔ́ a-dumpu, kí dáaĺ a-kampiiŋi liitil kí pìin̄ a-ba pu. Kɔ́ kí báĺ ŋyunti ŋubɔ poon kí nīn cí ti-Dindaan ŋuul ń sɔ̀ŋkì.

²¹Kpèè, ti-Dindaan di nyánní u-kɔŋkooŋŋunee. U làá cùú dáaĺ kitiŋ pu nib tafal bi-kpitii pu. Kitiŋ làá nyāntí fatiku un bi yāaǹee mpaampiin pu, kàa ti làá báĺ binib bin bi nìn kūū kūūyee pu.