Read Ntcham Esaïe 27 Bible Online

Esaïe 27 - Ntcham bible

Esaïe 27

¹Yaadalee, ti-Dindaan làá dāá yòon̄ u-tàataajiki kin jītí, ki sá kikpaŋkpaaŋŋi, ki cáá mpɔnee kí dáaĺ Leefiyatan, ukoobu un sáńee, Leefiyatan, ukoobu un nyí diŋmatindee tafal. U làá dāá kpɔ̀ tiŋkun peebilinti gbanti[63].

²Ŋwiin gbantee, ní dāá gāā fiinyi sufii kpaabu bun damam mɔ̄ee nlan.

³«Man ni-Dindaan di sá bukpaa gbanti ciitiliu. M yàantí-bu nnyim ní ŋyunti sá kamaa. Ŋwiimpu nì kunyeeuee, m cí-bu ubɔ ń taa pée ŋá-bu ikpiti iba.

⁴Maa ti gíí diŋuul bu-pu. M yaa ká abɔjanaakun nì ikuŋkum bu-poonee, m làá gāā-i kí dū-i kí tɔ̄ ŋŋmin í wà.

⁵Ama un yaa sáǹ ki kɔ́-mee, man nì udaan làá sòoǹ kí gbìlīǹ tɔb ŋgbansɔŋfi ń nīn bí ti-kansikin.»

⁶Iyunti in bí ki dòoń nee poonee, Jaakɔb nibul làá dāá báań inyaan, Isirayeel làá dāá tɔ̄ mpamu kí púkuḿ, ní kí lòoǹ abil kí gbéeǹ duulinya kɔkɔ.

⁷Ni ká ti-Dindaan dáaĺ u-nibul yab tafal kii u nín nìn dáaĺ bin sàantí-bee tafal pueeee? Ni ká u kūū-bi kii u nín nìn kūū bin nìn kù-bee pueeee?

⁸Aayee, u dáaĺ bi-tafal ní ki jìn̄-bi ki tɔ́ kuyuŋun ntincamun. Kii ŋwìiń nyalaŋki pú buŋku nín jītí puee, míǹ ní u yāntì u-buŋkpaaŋku yōoǹ-bi ki cáa búntì.

⁹Jaakɔb nibul kpitii nín làá pítí puee sèé, dikpántil din ní bi-kpitii pɔ̄tam làá cáańee sèé: Bi làá nà isaraafan taŋkpeeŋi dúsi dusi, kii bi nín nà kaluu taŋkpeeŋi ŋí kpántí ŋyim puee. Iwindɔ nì talaalutuukaa saraafaŋyi kaa ti làá nīn cɔ́.

¹⁰Báà uniseen kaa ti kóò kitiŋ kin ní bi máń digundi ki māntìi túee. Kì kíǹ ki bí fám ní kii kuteeuee. Anabil làá nīn dòoń niin ní ki jīǹ, ki dɔ̀ niin ki ŋùŋfī, ní ki ŋmóò tifaapibiti.

¹¹Tikpaŋkpaal yaa kūń ki kɔ́fì kɔ́fèe, ní binimpoobi ń dāan̄ kí dū ŋŋmi kí sēē. Tiŋman ní, dinibul nee kaa gbìl̀ tibɔti taapu. An pu ní Unimbɔti un náań-bee kaa làá sɔ̄ bi-pu, un di máń-bee kaa làá sɔ̄ bi-saai.

¹²Ŋwiin gbantee, ti-Dindaan làá dāá gbá u-jimpinti, kí yòon̄ Eefiraati mɔɔl kí tin cáá sāā Eejipiti buŋŋu[64]. U làá dāá kóoǹ nimbi Isirayeel yab ubɔ ubɔ kii idifinee.

¹³Ŋwiin gbantee, bi làá dāá búń ŋyiŋkpaan. Niinee, bin nìn wáŋkì ki bíń Asuur tiŋkinee, bin bi nìn jìn̄ ki tɔ́ Eejipiti tiŋkinee ń dāá tíntiń. Bi-kɔkɔ làá dāá dāan̄ kí gbàan̄ ti-Dindaan nimbiin kí jāam̀-u u-circir jool pu, Jeerusaleem tiŋkin.