Read Ntcham Esaïe 28 Bible Online

Esaïe 28 - Ntcham bible

Esaïe 28

¹Mbusu dɔ̄ ki cí Samaarii tiŋki, kitiŋ kin di náań nì kibeefuulii ní Eefiraayiim danyɔgbiliibi cáá ki-pu dilambilee! Kì tɔ́kɔ́ digbantandi pu, ditantakal din kpaatanti cáá ntiŋkpamee yilpu, ní bi nyɔ̄kɔntì-kì ní kì ŋān̄. Ama kì náań nì mpumpukum min yɔ́ĺ, ki pá bidanyɔgbiliibi bin gbí ki dɔ̄ ki gèeǹee yil puee ní.

²Kpèè, ubaatandaan un pɔ̄ɔ̄yee di dòońee, ti-Dindaan di túnní-u. U náań nì utaa un nì ataanyiŋkumbil lítée ní, kubuŋkpaaŋŋu kun jītí ki bíiĺ tikɔkɔee, utaakpaan un nì ibun gbéèyee. U kpéelikí tikɔkɔ nì mpɔn ní.

³U làá dāá téé kitiŋ kin di náań nì kibeefuulii ní Eefiraayiim danyɔgbiliibi cáá ki-pu dilambilee kí lúkú binib ń nīn tà.

⁴Mpumpukum min yɔ́ĺ bi dūu nyáantì-kì kì tɔ́kɔ́ digbantandi pu ditantakal din kpaatanti cáá ntiŋkpamee yilpuee, làá dāá nīn náań nì fiigi subil din péé ki mántèe ní. Unil tin lì yii u wālifí-dèe u kìtī-dì ní kí kpáàa dūú pɔ̀kɔ̄.

⁵Ŋwiin gbantee, ti-Dindaan Mpɔŋkɔdaan u-ba di làá dāá nīn sá u-nibul din kíǹee beefuuliiki kin ŋān̄ ki jìl̀ee.

⁶U làá dāá tīī bibɔsoonliibi deedee Fam, ní kí dāá tīī bin yú kitiŋ punyɔkɔpu ki jì binannanliibee mpɔn.

⁷Ki kpáaǹ gba ndaam yāntì bisaraaŋaliibi nì Unimbɔti bɔnaatiliibi gáatì. Ndaam min pɔ̄ɔ̄yee yāntì bi còom̄ ki kpìntī. Ndaam yāntì bi gáatì kaa ti nyí tin poon bi bée. Ndaam min pɔ̄ɔ̄yee yāntì bi còom̄ ki kpìntī, kaa ŋūǹ kí nàatī tin bi wál̀ee. Baa ti wāĺ kí sòoǹ ibɔsoon tiŋan.

⁸Bi wūliŋkì ki gbéeǹ bi-teebilib kɔkɔ, laaba kaa ti kíǹ ki ŋān̄.

⁹Bi bí ki lì yii: «Ŋma ní u kalin là kí dàkà dinyil ní? Ŋma ní u là kí lēē tin u wāĺee taapu kí dàkà ní? Mbiyaawaamu mun ní bi dáá bābitì dibiilee ní u làá dàkàaa, campɔntib bin bi dáá gíí dibiilee ní?

¹⁰U lì ki bùsī yii: b+a = ba, b+oo = boo d+a = da, d+oo = doo.»

¹¹Too, kɔŋkɔnnee, ti-Dindaan làá sòoǹ nì dinibulee isooncaan ní, isoon in ní baa gbìl̀ee.

¹²U nìn pée tùkū-bi yii: «Diŋuŋfil laŋki sèé, yàntīmaan un kamaa gīīyee ń ŋùŋfì. Doo di sá laakin ní diŋuŋfil bée.» Ama ní baa pílifiǹ-u[65].

¹³An pu ní ti-Dindaan mun làá sòoǹ nì bi yii: b+a = ba, b+oo = boo, d+a = da, d+oo = doo, án nín làá ŋá pu bi yaa bíi còom̄ee, bí lítí tiwantampin kí kɔ̄fì bi-cammuee. Kutaliŋŋu làá sàl̄-bi ní bí cúú-bi kuyuŋu.

¹⁴Nimbi bibeeliliibi bin kpòotī dinibul nee Jeerusaleem tiŋkinee, pīlifìmaan ti-Dindaan nín lī puee.

¹⁵Di sá ni bí ki lì yii: «Ti nì ŋkúm pūtì ki pōoǹ tɔb, ti nì ditaŋkpiilin yab ŋá mpèé. Báà nnaabu yaa bāań, ŋuaa làá ká-ti, kun puee inyimɔn di sá-ti ŋkɔŋkoon, ní mili mili sá-ti kibalilaŋ.»

¹⁶An puee ti-Dindaan Mpɔŋkɔdaan nín lī puee sèé: «Kpèè, m bíl̀ Siiyɔn jool pu ditaŋkpal din sá ditampinjal m cɔ́ŋkèe, ditaŋkpal din ŋúb́ kudii pɔŋŋu, ki bá ki pɔ̄ɔ̄yee dí nīn sá dinyeel[66]. Un kamaa yaa dū u-ba ki dīntì di-puee pée kpá kí lítí.

¹⁷Ibaamɔn di làá nīn sá ŋŋmii ŋun m cáa ŋmàntēe, ní deedee sá ŋŋmii ŋun m dūu béè yii an tèen̄ee.» Ataanyiŋkumbil làá dāá nàan̄ ni-nyimɔŋkɔŋkooŋyi ní nnyim ń dāá kùntī ni-balilaŋki.

¹⁸Ni nì ŋkúm nín pūtì ki pōoǹ tɔb puee làá kpìtī, mpèé ŋun ni nì ditaŋkpiilin yab ŋée kaa làá kàl̄. Nnaabu yaa láa bāańee, ŋu làá dāá nà-ni.

¹⁹Ŋu làá nīn pée jītí ní ŋwiin kamaa, ŋwiimpu nì kunyeeu. Ŋyunti ŋun kamaa ŋu yaa jítèee, see ŋú kpáaǹ-ni. Binib yaa láa gbìl̄ ŋu-nyɔɔbundi taapuee, dinyoondi làá dāá kɔ́-bi.

²⁰Kii dilaŋkpandi nín lī puee yii: «Ndoo kaa làá nīn fɔ̀kɔ̀ unil ń ŋmā kí dòon̄, sata kaa làá nīn wāā unil ń ŋmā kí dūú bìin̄.»

²¹Tiŋman, ti-Dindaan làá dāá yīkì yilpu kii u nín nìn ŋá pu Peerasiim jool puee ní. U làá dāá gíí diŋuul kii u nín nìn gíí diŋuul Gabawɔn tantakalin puee, kí tɔ̄ u-tundi, u-tundi din di sá atulimee, kí tɔ́ u-tundi din sá maamaaci tundee.

²²Kɔŋkɔnnee, ní gbèen̄ ibeel. An yaa sá fám ikusaka in bóob́-nee làá mɔ̀tīí síkí. Di sá yii m gbìl̄ ti-Dindaan Unimbɔti Mpɔŋkɔdaan lī yii u lēē ki síiǹ kí nàan̄ kitiŋ nee kɔkɔ.

²³Kpòom̄maan ni-tafaliŋ kí pīlifiǹ-mi! Ní pīlifìmaan m-nyɔɔbuŋŋi tiŋan!

²⁴Mimmee ŋyunti kamaa ní ukpaal kù kí bɔ̄l̀ kaa gbèentáaa? U cátí adan, ki wìil̄ atannaapiki kaa gbèentáaa?

²⁵U yaa kpátì bukpaa tāntèe, ní ú yàaǹ aneeti boolii, kí bɔ̄l̀ kumiini biliŋ. Míǹ boonee ní ú bɔ̄l̀ bilee nì idi nì ɔɔji ipɔ̀n pu, ní kí bɔ̄l̀ tijimpin tiba mun ŋkpaabuku.

²⁶U-Nimbɔtiu di kpōotì-u ú ŋá míǹ, úǹ di dàkā-u min ní an máaǹ ú ŋée.

²⁷Baa dùŋfī tɔrɔku un inaa dátí ki gbáà tijimpinee kí gbá aneeti, baa tí dū tɔrɔku taaŋi kí tāā kí gbátí kumiini. Ama ndɔ ní bi cáa gbáà aneeti, ní ki cáá kidɔbiki ki gbáà kumiini.

²⁸Ukpaal yaa gbáà bileeyee, waa gbáà kaa gbèentí. U yàntī tɔrɔku taaŋi nì kuwaŋkuluu kun dàtī-uee di tà bilee, ama baa tà kí mátí abil.

²⁹Tíǹ gbanti kɔkɔ nyánní ti-Dindaan Mpɔŋkɔdaan cee ní. Úǹ di sá maamaaci saŋkiliu, ní ki tūǹ atuŋkpaan mun.