Read Ntcham Esaïe 29 Bible Online

Esaïe 29 - Ntcham bible

Esaïe 29

¹«Ariyeel, Ariyeel, mbusu dɔ̄ ki cí-si, sii Jeerusaleem tiŋki ní Daafiidi nìn jáń ki fōō. A ŋūǹ kí nīn jīǹ jiŋaalib kɔkɔ dibintil kamaa,

²ama m làá nàan̄ sii Ariyeel tiŋki. A-nib làá nīn sūǹ ki yáliŋkí, a làá nīn sá-mi nsaraafan ní.

³M làá gāā m-janjanaapaal kí màntīí tū-si ní kí jáǹ-si. M làá mā aguŋfɔkɔ kí màntīí tū-si, m làá bɔ́ntí tin máaǹee kí já nì si.

⁴A dāa lítí taapu taapu ní a-neel dāa bí kii a dɔ̄ kitiŋ taapuee. A-nyɔɔbuŋŋi dāa nyēē ntamin ní baa gbìl̀. A-neel dāa náań nì ufaŋfanti yɔŋu, ní ki nyēeń doooo kitiŋ taapu taapu, ní a-nyɔɔbuŋŋi dāa nyēeń ntamin ki náań nì ŋfoon.

⁵A-nannanliibi bin wīikí tikpilee làá dāá kpátí kí gbí kii ŋkpɔŋkpɔmee. Binib bin wɔ́b̀-see kitil làá dāá nīn bí kii tifeel tin kubuŋu yòontée ní.» Ama ní dicilpu kpalaayee,

⁶ti-Dindaan Mpɔŋkɔdaan làá dāá dī ditaadundi pu, nì kuwookpaaŋŋu pu, nì kubuŋkpaaŋŋu nì utaaja pu, nì aŋmilimbil ŋin wùee pu kí já kí tīī-si.

⁷Kii kudamintiiu àá kunyeeu leedakal nín wáŋkí puee, míǹ ní atimbun dikitil din jáà nì sii Ariyeel tiŋkee, bin kɔkɔ bíi tákà-si, ki māntìi tú-si ki wɔ́b́-see làá nīn bí.

⁸Án làá dāá nīn bí kii unil un ŋkùm cáá ní u dɔ̄ ki dámintí yii u bíi jīǹ ki dāa fīntì ŋkùm gbíntìi cááyee, àá kii unil un nnyinnyoo cáá, ní u dɔ̄ ki dámintí yii u bíi nyù nnyim, ki fīntì nnyinnyoo gbíntìi cáá-uee ní. Míǹ ní án dāa sá ki tīī atimbun kupaau ŋin nìn bí ki jáà nì Siiyɔn joolee.

⁹Ní bàkatī sèeee án ŋá-ni bitii. Kpántímaan bijɔfub kí taa ti nín̄ wāĺ. Ní gbímaan, ama an taa nín̄ sá yii ndamam ní ni nyùn̄. Nín̄ kpìntīmaan, ama an taa nín̄ sá yii ndaam min pɔ̄ɔ̄yee ní ni nyùn̄.

¹⁰Di sá yii ti-Dindaan di dū ŋgeembiim miba ki tɔ́ ni-pu[67]. - U bɔ̄ntì nimbi bibɔnaatiliibi nimbiliŋ -, - ki dū iŋaabu ki bīiǹ nimbi bibɔɔbi nimbiin -.

¹¹Dileedakal nee kɔkɔ bí ni-cee kii tibɔti tin bi ŋmàn̄ ki ŋá kugbɔŋu kun bi kpáb́ ki nyīī ŋŋalee ní. Bi dū-ku ki tīī un ŋūǹ kí kàaǹee, ki bí-u yii: «Fōō kí kàaǹ», ní udaan kíí yii: «Maa ŋūǹ kí kàaǹ, di sá yii bi kpáb́ kugbɔŋuee ki nyīī ŋŋal».

¹²Bi tí dū-ku ki tīī unil un kaa ŋūǹ kí kàaǹee ki bí-u yii: «Fōō kí kàaǹ», ama ní udaan kíí yii: «Maa nyí bi nín kàaǹ puee».

¹³Ti-Dindaan sòon̄ dinibul nee pu yii: «Binib nee pìlīǹ-mi kinyɔkɔn fám ní. Bi nyɔ́ŋkí-mi nì bi-nyɔmmu fám ní. Ama bi-pɔbiliŋ poonee, bi dátiǹ-mi ní. Bi nín lì yii bi tɔ́-mee, binib marab bin bi dūu dàkā-bee ní bi nóó[68].

¹⁴An pu ní man làá mɔ̀tīí ŋá atuŋkpaan ní án ŋá dinibul nee bitii. Bi-ciŋfitiibi ciiŋyi làá dāá wāŋkì, ní bi-nyiliibi nyil ń dāá kúntí[69].»

¹⁵Mbusu di dɔ̄ ki cí binib bin bɔ́ntí tin bi làá ŋée dibalin ki cáa bāal̀ ti-Dindaanee. Bi tūǹ bi-tuuŋŋi dibɔmbɔndin ní ki lì yii: «Ŋma wāĺ-ti? Ŋma nyí tin ti bíi ŋáańee?»

¹⁶Ba ní ni líbití tibɔti mimmee? Uyɔɔmaati nì kuyɔkɔu ŋmàaa? Tin bi máńee ŋūǹ kí lì un máń-tèe yii: «Úǹ di kaa máń-maaa»? Dibool ŋūǹ kí lì uyɔɔmaati yii: «Waa nyí dimalaaa»?

¹⁷An kíǹ fiii nàanyɔkɔ, Leebanɔn bambaŋku làá kpántí asubiŋmɔkaa kpaabu, ní asubiŋmɔkaa kpaabu ń kpántí kubambaŋŋu.

¹⁸Ŋwiin gbantee, bi làá dāá kàaǹ tin kā kugbɔŋuee poonee bitafakpaafub ń gbìl̄. Bijɔfub làá dāá nyā dibɔmbɔŋkpaandin ní bi-nimbiliŋ ń cúú kí ŋúbití ní bí wāl̀.

¹⁹Binib bin sīntiǹ bi-ba taapuee làá dāá nīn fàal̀ ti-Dindaan ni, ní biwɔfib ń dāá nīn nyàkantī Isirayeel circir Nimbɔtiu pu.

²⁰Biwɔ́biliibi làá dāá kúntí, bibeeliliibi làá dāá wāŋkì, ní bin nyàab̀ kí ŋá bi-jutiibi tikpitilee ń dāá céetí.

²¹Bin tūntí bi-jutiibi pu abɔgaan, ki pīil̀ bibɔsoonliibi titalindi, ní ki yàntī bi kù maanyiiba bɔtee, bíǹ gbanti kɔkɔ làá dāá wāŋkì.

²²An puee ní ti-Dindaan un nìn fīī Abraam ki líìyee bí Jaakɔb dicaŋkun yab yii: «Kí yòon̄ kɔŋkɔnnee kí nīn cée, icoo kaa ti làá cúú Jaakɔb yab, baa ti làá tìntī bi-yiliŋ nì icoo.

²³Di sá yii bi nì bi-biyaamu yaa láa ká tin m làá dāá ŋá bi-kansikinee, bi làá dāá béé yii man di sá Jaakɔb Nimbɔtiu un bí circiree. Bi làá dāá fàŋkì kí taa yìntīǹ man Isirayeel Nimbɔtiu.

²⁴Binib bin yiliŋ gáatèe làá dāá ká dinyil, ní bin nìn bí ki gbùkum̄ee ń dāá kíí bí dàkà-bi iciin.»