Read Ntcham Esaïe 3 Bible Online

Esaïe 3 - Ntcham bible

Esaïe 3

¹Ti-Dindaan Unimbɔti Mpɔŋkɔdaan làá ŋmìntī Jeerusaleem tiŋki nì Juuda beel tijikaal nì nnyim. U làá ŋmìntī-bi tin máaǹ kí nīn tíkí-bee kɔkɔ:

²an dàkà yii ubaatandaan nì ujanjal, ubɔsoonli nì Unimbɔti bɔnaatiliu, ubɔɔ nì utindaŋkpil,

³ujanjakpil nì dibɔtibil, usaŋkil nì ukpaŋkpanti nì usoopu.

⁴Ti-Dindaan di lī yii: «M làá lēē mbiyaamu kí tīī-bi mú nīn sá bi-kpilib, ní múǹ ń nīn kpòotī-bi kii mu nín là puee.»

⁵Binib làá nīn ŋáań tɔb tipɔmbɔti, báà ŋma làá nīn ŋáań u-juti tipɔmbɔti. Kibiki làá jɔ̄m̀ utikpil pu, ní unifan ń jɔ̄m̀ unikpaan pu.

⁶Unil làá dāá cúú u-nabiki kin u nì un pēē kubaabinaatoouee kí lì-u yii: «Sii cáá dibɔkutil kí pèen̄ee, kpántí ti-kpiliu kí nīn kpòotī-ti fikil fikil yuntiŋu nee poon!»

⁷Ní udaan ń dāá kíí yaadal gbanti yii: «Maa ŋūǹ kí ŋá tiba kí tīī-ni. M-dumpuee, tijikaal kaa báaa, tiwampeeŋkaal mun kpá. Naa ŋūǹ kí lēē-mi ḿ nīn sá ukpil!»

⁸Jeerusaleem tiŋki gbéetì, ní Juuda beel lítì. Di sá yii bi jáà nì ti-Dindaan bi-sòontam nì bi-ŋáaǹtam poon, ki kpèé-u fám.

⁹Bi-nimbikpeeŋu di sòoǹ ki kù bi-bɔti. Bi sòoǹ bi-kpitii pu mpaampiin pu kii Soodoom tiŋki yab nín nìn ŋáań puee, baa bāal̀ i-pu binib cee. Bíǹ bi-ba naabuŋu ní bi bíi bɔ́ntí!

¹⁰Lìmaan yii deedeedambi bí mmɔnneeee! Di sá yii bi làá dāá páatí tin ní bi ŋée pu.

¹¹Ama mbusu dɔ̄ ki cí binikpitib, tiba pée kpá kí nīn ŋān̄ ki tīī-bi. Di sá yii bi-tuuŋŋi paati ní bi làá fōō.

¹²Ti-Dindaan bí yii: «M-nibul, mbiyaamu di wɔ́b́-si, binimpoobi di ŋúb́ a-tiŋki ki kpòotī. M-nibul, a-tindaŋkpilib kíiĺ-si ní, bi kpòotī-si ki cáǹ nsaŋkpiti pu ní.»

¹³Ti-Dindaan bɔ́ntì kí sòoǹ ibɔsoon, u yíkìi yúl̀ kí sòoǹ anibul bɔti.

¹⁴Ti-Dindaan bíi sòoǹ u-nibul kpootiliibi nì bi-tindaŋkpilib bɔti yii: «Nimbi di bíil̀ m-fiinyi sufii kpaabu. Ni jíitì biwɔfib wanti ki gbéeǹ ni-diiŋŋi.»

¹⁵Ti-Dindaan, duulinya kɔkɔ Nimbɔtiu bí yii: «Ba ŋá ní ni bí ki nà m-nibul, ki wɔ́b́ biwɔfib míǹ?»

¹⁶Ti-Dindaan bí yii: «Jeerusaleem nimpoobi mɔ̀ɔǹ tikpil. Bi còom̄ bi-silii tèen̄, ki cáá bi-nimbikpeeŋu ki sàtī bininjab. Bi còom̄ diba diba, ní ki yàntī abɔmbil ŋin bi fúuń bi-taaŋee gbáà tɔb ki sūǹ.»

¹⁷An puee ti-Dindaan làá yàntī digbàndi ń cúú bi-yiliŋ bi-yikpiti ń kùfì ní bi-yigbeeŋi ń kpántí akulim.

¹⁸Yaadalee ti-Dindaan làá dāá cúú tinyaantiwan kɔkɔ kí gbākal̀ bi-wunti pu, an dàkà yii abɔmbil ŋin bi fūuntí ataayee nì nlaamu mun bi cáa cútí tiyikpitee nì tiléeŋkaal tin gɔ́ĺ kii uŋmapɔɔnee,

¹⁹nì falfatib nì abɔmbil ŋin bi fūuntí iŋalee nì iŋaabu in bi bìintí ayil puee,

²⁰nì iŋaayilkaa, nì ikusaka in bi cáa fūuntí titafatee nì dambalab nì asab nì icaŋŋmii,

²¹nì mbɔmbiyaamu nì mbɔmbiyaamu mun bi tūuntí dimaŋfalee,

²²nì jiŋaal wampeeŋkaati nì abɔkutifɔkɔ ŋin wāāyee nì iŋaapaaŋkaa nì ntɔkɔlimu,

²³nì agiti nì iŋaabu in bí fálfalee bɔkutiŋ nì iŋaabu in bi cáa fìǹ diyilee nì in mun bi cáa pāantí tigbigbipati puee.

²⁴Tiwansuundi nunuŋu di làá dāá fōō talaalu sɔnsɔfiŋu, ŋŋmii di làá dāá fōō dambala paaŋŋu, dibaakpandi di làá dāá fōō tiyikpilukaal tin nyáń ti-bee paaŋŋu, kpɔsatab di làá dāá fōō tiwannyaandi paaŋŋu, ní icoo daaŋku ń dāá fōō kunyaaŋŋu paaŋŋu.

²⁵Jeerusaleem, a-nib làá gbíntí kujaau poon, a-janjaliibi làá kpúń dikɔ̀ndi poon.

²⁶Niinee a-tiŋki nib kɔkɔ làá dāá nīn sūǹ ki yáliŋkí, kii unimpu un kaa ti cáá báà tiba ki gbíntì ki kā kitiŋee.