Read Ntcham Esaïe 30 Bible Online

Esaïe 30 - Ntcham bible

Esaïe 30

¹Ti-Dindaan di lī yii: «Mbusu dɔ̄ ki cí nimbi pɔɔgaatib. Ni bɔ́ntí kí ŋá tin kaa nyánní m-ceeyee. Ni ŋáań ipèé in kaa kā m-naŋki puee, ní ki ŋáań ikpiti ki kútí ikpiti pu.

²Ni nín cá Eejipiti tiŋkinee, naa bālifì-mi ki wāatì. Faaroo cee ní ni nyàab̀ diwundi, ní ki sáń kí kɔ́ Eejipiti tiŋki booŋŋun.

³Ama Faaroo wundee làá dāá kɔ́ǹ-ni icoo ní, Eejipiti tiŋki booŋŋuee làá dāá yàntī ní fá ni-jilmau.

⁴Ni-kàliŋkpilib bí Soowan tiŋkin léelee, ni-tuuŋyi mun bàn̄ Aneesi tiŋkin.

⁵Ama icoo làá cúú bi-kɔkɔ dinibul din kaa ŋūǹ kí kèetī-bee pu. Eejipiti yab kaa ŋūǹ kí tūtuǹ-bi, kaa làá cáań-bi ipaati iba. Kun bi pée ŋūǹ kí tīī-nee di sá bí kɔ́ǹ-ni icoo, ní kí yàntī ní fá ni-jilmau.»

⁶Tiwaŋkuti tú tiwan ki còom̄ ki pùntī Neegeeb teeku. Ku sá kunimbaau nì dinimbinaamandi tiŋki ní. Igbikintinaŋkpil nì ijaa, ikoowaati nì tipeebilindi tin ŋàaǹee kóò niin ní. Mmamu tú bi-gaajawanti mu-booŋyi ní igutaamu tú bi-gaajati i-guliŋ pu, ní bi cáǹ kí tīī dinibul din kaa làá kèetī-bee.

⁷Eejipiti tiŋki jòońdi bí kii kubuŋuee ní, dàa bí tiban. An puee ní m páaǹ-kì diyindi yii: «Rakaab un kaa ŋáań báà tibee».

⁸Ní ti-Dindaan bí Yeesaya yii: «Kɔŋkɔnnee, dū tibɔti nee kí ŋmà kutaŋkpapiliŋu pu, kí dū-tì kí ŋmà kugbɔŋu poon Jeerusaleem yab nimbiin. Án di làá nīn sá foolboon seera kí nīn cá jaanjaan.»

⁹Bi sá dinibul din jáà nì ti-Dindaanee, ki sá binyimɔndambi, binib bin yíití kaa pílifí ti-Dindaan dakalee.

¹⁰Bi lì Unimbɔti bɔnaatiliibi yii: «Ní taa ti ká aleedaka. Ní taa nàatī-ti tin sá tibɔŋmanee! Nín̄ sòom̀maan nì ti tin di mɔ̄ dipilifilee, nín̄ nàatīmaan-ti tinyimɔmbɔti.

¹¹Ní sútímaan kí wàatī nsammɔnti, ní fàtīmaan ni-boon kí tīī nsan ŋun tèen̄ee. Ní taa ti sòoǹ nì ti Isirayeel Circir Nimbɔtiu pu!»

¹²An pu ní Isirayeel circir Nimbɔtiu lī yii: «Ni dū m-nyɔɔbundi ki fá. Ni máká bin ŋáań tipɔmbɔtee nì binyimɔndambi pu, ní ki kíǹ ki báká bi-pu.

¹³Diyìntil gbanti làá nīn sá ni-cee kii diguŋfɔkɔl din di fáá ŋwèeńee ní. Digul diba làá tɔ̄ digundee pu ní dí wùtī dicilpu dicilpu.

¹⁴Digundee làá wīī kii uyɔɔmaati boolee ní. Baa ti ŋūǹ kí ŋá mbamin. Baa ti ŋūǹ kí ká kikalii kí dūú mɔ́fí ŋŋmi ŋfannaaa, kí dūú jōō nnyim nnyimbunni.»

¹⁵Di sá yii ti-Dindaan Mpɔŋkɔdaan, Isirayeel Circir Nimbɔtiu bí yii: «Ni yaa kaa fātìi gítìń m-cee ki kāl̀ soooo, ni pée kpá kí ká difiil. Ni-pɔŋŋu kɔkɔ di sá yii ní cúú ni-ba soooo ní kí nīn máká man pu. Ama ní naa là míǹ.

¹⁶Ni lì yii: <Aayee! Ti làá kàl̄ itaamu kí sāǹ.> Tiŋman, ni làá lafun sāǹ. Ni lì yii: <Ti-taamui yáb̀ ní.> Too, bin làá dāá jà-nee mun dāa yáb̀ míǹ ní.

¹⁷Bi-kansikin ubɔbɔ yaa láa kpìl̄ nimbi binib kutukuee, ni-wunti dāa gbáà ní kpàkpakpa. Binannanliibi binib biŋmoo ja di dāa kpìl̀-ni ní ni-kɔkɔ ń sāǹ kí kátí. Ni-kansikin bin làá dāá kíńee dāa bí kii kudaaŋŋu ŋaabiki di cɔ́ dijool puee, a lì kii kiŋaabiki di cɔ́ kigbantaŋ yilpuee.»

¹⁸Nì míǹ kɔkɔee ti-Dindaan cí ŋyunti ŋun ní u làá ŋá-ni tiŋanee ní. U làá dāá yīkì kí sɔ̄ ni-saai, di sá yii ti-Dindaan sá deedee Nimbɔtiu ní. Binib bin máká u-puee kɔkɔ bí mmɔnneeee!

¹⁹Tiŋman, sii dinibul din kóò Siiyɔn jool puee, sii dinibul din kóò Jeerusaleem tiŋkinee, a kpá kí gíti sɔ̄ jaanjaan. A yaa láa kúuǹ ki yíiń ti-Dindaanee, u làá dāá pīlifiǹ-si, u yaa láa gbìl̄ a yíiń-uee, u làá dāá kíí-si.

²⁰A yaa láa bí dinimbinaamandinee, ti-Dindaan làá dāá tīī-si tijin á jī. U làá tīī-si nnyim diwɔ́bil yuntiŋu á nyɔ̀. Un sá a-dàkaliuee kaa làá ti báĺ. A làá dāá ká-u nì a-nimbibulii.

²¹A làá dāá gbìl̄ nneel ŋubɔ sòoǹ nì si a-boon pú yii: «Kpèè nsan ŋun a máaǹ kí dī kí cù ŋŋaŋgan pú àá ŋŋaŋgiil púee sɔ̀.»

²²Awaa ŋin a kpítì ki dū animbil kúti ki nyūntèe, nì ŋin a mɔ́ɔ́ ki dū sindaariya ki nyūntèe làá dāá kpántí ni-cee tijɔkɔŋwan. A làá dāá dū-ŋi kí fá kii titampummoolee ní kí lì-ŋi yii: «Nyāmaan doo!»

²³U làá dāá yàntī utaa ń nì iwambool in a búĺee pu. Tijin tin làá lòoǹ a-tiŋki puee làá dāá nīn wīikí tikpil kí nīn ŋān̄. Ŋwiin gbantee, a-waŋkuti làá cù kunaakpaapɔɔu kun wāāyee poon kí jī.

²⁴Inaa nì mmamu mun kù a-satee dāa ŋmóò timool tin bi ŋmālim̀ ŋyaamee ní. Bi làá dāá nīn cáá peela nì adɔpantampal ní ki kàfī timool gbanti ki yàantí kitiŋ.

²⁵Ŋwiin ŋun bi làá dāá bɔ̀fì binibee, sintil difɔŋfɔkɔŋi yaa láa lítèe, mbùmbiyaamu làá dāá pùub̀ ajoon nì ŋgbantamu pu.

²⁶Ŋwiin ŋun ti-Dindaan làá dāá póob́ u-nibul buuŋyi kí cáaǹ tiweendi tin bi fōōyee, uŋmal làá dāá nīn wāĺ kii ŋwìińee ní, ní ŋwìiń walifiŋu ń dāá nīn pɔ̄ɔ̄ miluli pu kii iwìiń iluli walifiŋuee.

²⁷Kpèè, ti-Dindaan di páaǹní ndanee. U-ŋuul fòolìń lìblib ki pɔ̄ɔ̄ kpaŋkpam. U yaa sòoǹee, diŋuul bí u-nyunculiŋ pu, ní u-limbil bí kii ŋŋmi ŋun wù ki céetí tikɔkɔee.

²⁸U-fooku bí kii mbun ŋun gbí ki sāā unil neenee. U dòoń kí cìŋkì atimbun ŋkpitim pu. U làá kpàl̄ anibul nyɔmmu tikúti kí nīn cáá-bi ki yìiǹ laakin baa lèe.

²⁹Nimbi Jeerusaleem yab, ni làá nīn bí ki gà ilan kii ni bí jiŋaal poon kunyeeuee. Ni làá dāá nīn bí dipɔɔpindin kii bi búǹ awul ní ni còom̄ ki yìkintí ki cá ti-Dindaan jool pu, Isirayeel Taŋkpanaakooku ceeyee.

³⁰Ti-Dindaan làá yàntī bí gbìl̄ u-neel ŋun sá ŋkpaanee pu, ní kí yàntī bí ká u-ŋal pɔŋŋu. U làá dàkà u-ŋuukpaandi aŋmilimbil ŋin wù ki céetí tikɔkɔee poon, ní kí yàntī utaa ń tɔ̄, utaaja ń nì ní ataanyiŋkumbil ń lítí.

³¹Ti-Dindaan neel làá yàntī dinyoondi ń kɔ́ Asuur yab, u làá dāá dū u-dɔŋu kí fáá-bi.

³²Ti-Dindaan yaa láa fáá-bi ndɔee, ní bí dāá bɔ̀ɔ̀ ŋgaŋgamu nì tibati. U làá dāá yòon̄ u-ŋal yilpu ní kí já nì bi.

³³Bi pée bɔ́ntì ŋŋmi dooooyee, ŋŋmi gbanti sá ki tīī ubɔti mun. Mbòó ŋun wāā ki nyóòyee poonee, bi dū idɔ tikpil ki bíl̀ dikuŋkundi kí kpāā ŋŋmi. Ti-Dindaan fooku kun bí kii farwata ŋmiŋuee di làá dāá fōō idɔee kii farwata di kpáatìi sītì di-puee.