Read Ntcham Esaïe 31 Bible Online

Esaïe 31 - Ntcham bible

Esaïe 31

¹Mbusu dɔ̄ ki cí binib bin sìntī Eejipiti tiŋkin ki nyàab̀ dijòońdee! Bi máká itaamu pu, ki máká janjatɔrɔkub pu, kun puee bi wīikí tikpil, ki máká bitanjakaliibi pu, bi nín cáá mpɔŋkpaanee pu. Ama baa fātì bi-nimbikpeeŋu Isirayeel circir Nimbɔtiu watil pú, kaa nyàab̄ ti-Dindaan.

²Ama u mun cáá iciin ki ŋūǹ kí cáań nnaabu. U yaa lī puee, míǹ ní u ŋáań. U jáà nì binikpitib kitil, ki jáà nì dijòońdi din nyánní binikpitib ceeyee.

³Eejipiti yab sá binib ní, baa sá inimbɔti. Bi-taamui cáá tiwunnan ní, iaa sá ŋfam. Ti-Dindaan yaa tāntì u-ŋalee, un bàà sá kí jòòyee lítí ní, ní un bālifì dijòońdee ń lítí, ní bi-liitil ń kpāfì kí kpú.

⁴Ti-Dindaan nín tùkū-mi puee sèé: «Gbikinti àá kigbikintibiki yaa cúú kuwaŋkuluu ki mùuǹ ki mɔ́tí ku-puee, bi yíì bipikpaaliibi kupaau ní kí kpāfì. Ama ní úǹ kaa fàŋkí bi-tantatii, ní bi-kuŋkuuntii kaa tùkù-u tiba. Míǹ ní man ni-Dindaan Mpɔŋkɔdaan yaa láa sīntìń Siiyɔn jool pu kí já kujaauee, án làá dāá nīn bí.»

⁵Kii unoon nín kpátí u-feeŋyi kí bìin̄ u-biyaamu pu puee, míǹ ní ti-Dindaan Mpɔŋkɔdaan làá dāá wúń Jeerusaleem tiŋki pu. U làá dāá wúń ki-pu kí fīī-kì, u làá dāá mɔ̄tì ki-pu kí fōō-kì kí líí.

⁶Isirayeel yab, ni fātì ni-boon ki tīī ti-Dindaan tikpil. Fàtīí gítiḿmaan u-cee.

⁷Di sá yii yaadalee, báà ŋma làá dāá fá animbil kúti nì sindaariya waaŋi ŋin ni dū ni-ŋalii in sá ikpiti ŋaliiyee ki mɔ́ɔ́yee.

⁸Kitàataajiki ní bi làá dūú kpɔ̀ Asuur yab, ama an kaa làá nīn sá unil yaka. Kitàataajiki di làá nàan̄-bi, ama án kaa dāa sá nisaal tàataajiki. Asuur yab làá dāá sāǹ kitàataajiki gbanti, ní bí dāá cúú bi-janjaliibi bin pɔ̀ɔǹee kí dāá yàntī bí nīn tūǹ atuun ŋin pɔ̄ɔ̄yee.

⁹Dinyoondi làá dāá kɔ́ bin pɔ̄ɔ̄ kii ditaŋkpalee bí sāǹ, ní kufaaŋŋu ń kɔ́ bi-janjakpilib ní bí sāǹ kí fá bi-ŋaabiki. Ti-Dindaan di lī míǹ, úǹ un ŋmilimbil bí Siiyɔn jool pu, ní u-ŋmiŋu fòol̄ lìblib Jeerusaleem tiŋkinee.